¹ Okwatanga omwezi Abibu, weekuumenga okubitaku eri Mukama Katonda wo: kubanga mu mwezi Abibu Mukama Katonda wo mwe yakutooleire mu Misiri obwire. ² Era waitiranga okubitaku Mukama Katonda wo, ku mbuli n'o ku nte, mu kifo Mukama ky'a lyeroboza okutyamisya omwo eriina lye. ³ Tolyanga mere nzimbulukusye wamu nakwo; wamalanga enaku musanvu ng'olya emere eteri nzimbulukusye wamu nakwo, niiyo mere ey'o kunakuwala; kubanga waviire mu nsi y'e Misiri ng'o yanguwa: oijukirenga olunaku lwe waviriiremu mu nsi y'e Misiri enaku gyonagyona egy'o bulamu bwo. ⁴ So ti wabonekanga gy'oli kizimbulukusya mu nsalo gyo gyonagyona enaku musanvu; so ti wasigalangawo ku nyama, gy'e waitanga ku lunaku olw'o luberyeberye olw'e igulo, okugonawo okukyeesya obwire. ⁵ Toitiranga Kubitaku munda mw'o lwigi lwonalwona ku njigi gyo, Mukama Katonda wo gy'a kuwa: ⁶ naye mu kifo Mukama Katonda wo ky'a lyeroboza okutyamisya omwo eriina lye, eyo gyewaitiranga okubitaku olw'e igulo, eisana nga ligwa, mu biseera bye waviliriiremu mu Misiri. ⁷ Era wakwokyanga n'o kuliiranga mu kifo Mukama Katonda wo ky'a lyeroboza: era wakyukanga amakeeri, n'o yaba mu weema gyo. ⁸ Enaku mukaaga walyanga emere eteri nzimbulukusye: n'o ku lunaku olw'o musanvu wabbanga okukuŋaana okutukuvu eri Mukama Katonda wo; tolukolerangaku mulimu gwonagwona. ⁹ Webaliranga sabbiiti musanvu: okuva ku biseera by'otandikiramu okuteeka ekiwabyo ku ŋaanu ng'e kaali mu nimiro kwewasookeranga okubona sabbiiti omusanvu. ¹⁰ Era wekuumanga embaga eya sabbiiti eri Mukama Katonda wo ng'o muwa omusolo ogw'e kyo ky'o waayo ku bubwo eky'o mukono gwo, kyewawangayo nga Mukama Katonda wo bw'a kuwa omukisa: ¹¹ era wasanyukiranga mu maiso ga Mukama Katonda wo, iwe n'o mutaane wo n'o muwala wo n'o mwidu wo n'o muzaana wo n'o muleevi ali munda mw'e njigi gyo n'o muna igwanga n'o mulekwa n'o namwandu, abali wakati wo, mu kiseera Mukama Katonda wo ky'a lyeroboza okutyamisya omwo eriina lye. ¹² Era waijukiranga nga wabbaire mwidu mu Misiri: era wakwatanga wakolanga amateeka gano. ¹³ Wekuumiranga embaga ey'e nsiisira enaku musanvu, bwewabbanga omalire okugisa eby'o mwiguliro lyo n'e by'omu isogolero lyo: ¹⁴ era wasanyukiranga embaga yo, iwe n'o mutaane wo n'o muwala wo, n'o mwidu wo n'o muzaana wo, n'o muleevi n'o muna igwanga n'o mulekwa n'o namwandu, abali munda mw'e njigi gyo. ¹⁵ Enaku musanvu wekuumanga embaga eri Mukama Katonda wo mu kifo Mukama ky'a lyeroboza: kubanga Mukama Katonda wo yakuwanga omukisa mu bibala byo by'o nabyona, n'o mu mulimu gwonagwona ogw'e ngalo gyo, era wabbanga n'e isanyu lyereere. Emirundi isatu buli mwaka abasaiza bo bonabona babonekanga mu maiso ga Mukama Katonda wo mu kifo ky'a lyeroboza: ku mbaga ey'e mere eteri nzimbulukusye, n'o ku mbaga eya sabbiiti, n'o ku mbaga ey'e nsiisira: so ti babonekanga mu maiso ga Mukama nga babula kintu: ¹⁶ Emirundi isatu buli mwaka abasaiza bo bonabona babonekanga mu maiso ga Mukama Katonda wo mu kifo ky'a lyeroboza: ku mbaga ey'e mere eteri nzimbulukusye, n'o ku mbaga eya sabbiiti, n'o ku mbaga ey'e nsiisira: so ti babonekanga mu maiso ga Mukama nga babula kintu: ¹⁷ buli muntu yawanga nga bweyasobolanga, ng'o mukisa bwe gwabbanga ogwa Mukama Katonda wo gw'a kuwaire: ¹⁸ Abalamuli n'a baami wateekangawo mu njigi gyo gyonagyona Mukama Katonda wo gy'akuwa, ng'e bika byo bwe biri: era basaliranga abantu emisango egy'e nsonga. ¹⁹ Tokyamyanga musango; tosaliriryanga bantu: so tolyanga nguzi; kubanga enguzi egibba amaiso g'a b'a magezi, era ekyusakyusa ebigambo by'a batuukirivu. ²⁰ Eby'o butuukirivu dala byewasengereryanga, kaisi obbenga omulamu, osikire ensi Mukama Katonda wo gy'a kuwa. ²¹ Teweesimbiranga musaale gwonagwona okubba Asera ku mbali kw'e kyoto kya Mukama Katonda wo, kyewekoleranga. ²² So ti weeyemerereryanga mpango; Mukama Katonda wo gy'a kyawa. Ensuula