¹ Awo abaana ba banabbi ni bakoba Erisa nti Bona ekifo kye tubbamu mu maiso go kituyingire obutono. ² Tukwegayiriire twabe ku Yoludaani tutooleyo buli muntu omusaale, twekolere eyo ekifo eky'okubbamu. N'airamu nti mwabe. ³ Awo ni wabba atumula nti nkwegayiriire, ikirirya oyabe n'abaidu bo. N'airamu nti Nayaba. ⁴ Awo n'ayaba nabo. Awo bwe baatuukire ku Yoludaani, ni batema emisaale. ⁵ Naye omumu bwe yabbaire atema omusaale, empasa n'egwa mu maizi: n'akunga n'atumula nti Ginsangire, mukama wange! kubanga ebbaire njazike. ⁶ Omusaiza wa Katonda n'atumula nti egwire waina? N'amulaga ekifo. N'atema omusaale n'agusuulawo n'aibbulukusya ekyoma. ⁷ N'atumula nti gironde. N'agolola omukono gwe n'agikwata. ⁸ Awo kabaka w’e Busuuli n'alwana ne Isiraeri; n'ateesya n'abaidu be ng'atumula nti Engindi niiyo eribba olusiisira lwange. ⁹ Omusaiza wa Katonda n'atumira kabaka wa Isiraeri ng'atumula nti wekuume oleke okubita egindi; kubanga eyo Abasuuli gye baserengetere. ¹⁰ Kabaka wa Isiraeri n'atuma mu kifo ekyo omusaiza wa Katonda ky'amukobeire ng'amulabula: n'awonera eyo omulundi ti gumu so ti ibiri. ¹¹ Awo omwoyo gwa kabaka w'e Busuuli ni gweraliikirira inu olw'e kigambo ekyo; n'ayeta abaidu be n'abakoba nti Temwantegeezye ali ku ife ali ku lwa kabaka wa Isiraeri? ¹² Omumu ku baidu be n'atumula nti Bbe, mukama wange, ai kabaka; naye Erisa nabbi ali mu Isiraeri niiye akobera kabaka wa Isiraeri ebigambo by'otumulira mu nyumba yo gy'ogonamu. ¹³ N'atumula nti mwabe mubone gy'ali, ntume musyome. Ne bamukobera nti bona, ali mu Dosani. ¹⁴ Awo n'atumayo embalaasi n'amagaali n'eigye lingi: ne baiza obwire ne bazingizya ekibuga. ¹⁵ Awo omwidu w'o musaiza wa Katonda bwe yagolokokere Amakeeri n'afuluma, bona, eigye n'embalaasi n'amagaali nga bazingizirye ekibuga. omwidu we n'amukoba nti gitusangire, mukama wange! twakola tutya? ¹⁶ N'airamu nti totya: kubanga abali naife bangi okusinga abali nabo. ¹⁷ Erisa n'asaba n’atumula nti Mukama wange, nkwegayiriire, omuzibule amaiso ge abone. Awo Mukama n'azibula amaiso g'o mwisuka; n'abona: awo; bona, olusozi nga lwizwire embalaasi n'a magaali ag'omusyo ageetooloire Erisa. ¹⁸ Awo bwe baserengetere gy'ali Erisa n'asaba Mukama n'atumula nti nkwegayiriire, ziba amaiso g'abantu bano. N'aziba amaiso gaabwe ng'e kigambo kya Erisa bwe kyabbaire. ¹⁹ Erisa n'akoba nti Eno ti niiyo engira so ne kino ti niikyo ekibuga: munsengererye nzena n'abatuukya eri omusaiza gwe musagira. N'abatwala e Samaliya. ²⁰ Awo alwatuukire bwe baatuukire mu Samaliya, Erisa n'atumula nti Mukama: wange, zibula amaiso g'a bantu bano babone. Awo Mukama n'azibula amaiso gaabwe ni babona; kale bona, nga bali mu Samaliya wakati ²¹ Awo kabaka wa Isiraeri n'akoba Erisa bwe yababoine nti itawange mbakubbe? mbakubbe? ²² N'airamu nti Tobakubba: otaka okukubba abo b'o wambire n'e kitala kyo n'omutego gwo? teeka emere n'a maizi mu maiso gaabwe balye banywe baire eri mukama waabwe. ²³ N'abateekerateekera bingi: awo bwe bamalire okulya n'o kunywa n'abasindika ne baaba eri mukama waabwe. Awo ebibiina eby'e Busuuli nga tebikaali biiza ate mu nsi y'e Isiraeri. ²⁴ Awo olwatuukire oluvanyuma lw'ebyo Benikadadi kabaka w’e Busuuli n'akuŋaanya eigye lye lyonalyona, n'ayambuka n'a zingizya Samaliya. ²⁵ Awo mu Samaliya nga mulimu enjala nyingi: kale, bona ni bakizingizya okutuusya lwe batundire omutwe gw'e ndogoyi olw'e bitundu eby'e feeza kinaana, n'e kitundu eky'okuna eky'e kibya eky'o busa bw'a mayemba nga babutunda olw'e bitundu by'e feeza bitaanu. ²⁶ Awo kabaka we Isiraeri bwe yabbaire ng'a bitawo ku bugwe, omukali n'amukungirira ng'atumula nti Mbeera, mukama wange, ai kabaka. ²⁷ N'atumula nti Mukama bw'ataakuyambe, nze natoola waina eby'okukuyamba? mu iguuliro oba mu isogolero? ²⁸ Kabaka n'amukoba nti Obbaire ki? N'airamu nti Omukali ono yankobere nti waayo omwana wo ow'o bwisuka tumulye watyanu era twalya omwana wange ow'o bwisuka Amakeeri. ²⁹ Awo ne tufumba omwana wange ni tumulya ne mukoba ku lunaku olw'o kubiri nti waayo omwana wo tumulye yena omwana we amugisire. ³⁰ Awo olwatuukire kabaka bwe yawuliire ebigambo by'o mukali n'akanula ebivaalo bye; (era yabbaire ng'abitawo ku bugwe;) abantu ne batandika, kale, bona, ng'avaire ebinyakinyaki munda ku mubiri gwe. ³¹ Awo n'atumula nti Katonda ankole atyo n'okusingawo, omutwe gwa Erisa mutaane wa Safati bwe gwabba ku iye watyanu. ³² Naye Erisa n'atyama mu nyumba ye n'abakaire ni batyama naye; kabaka n'atuma omusaiza okuva gy'ali: naye omubaka nga akaali kutuuka gy'ali n'akoba abakaire nti muboine ono omwana w'o mwiti bw'atumire okuntoolaku omutwe? kale omubaka bweyaiza, mwigaleewo olwigi munyigirirye olwigi ku iye: ebisinde by'ebigere bya mukama we tibiri nyuma we? ³³ Awo ng'akaali atumula nabo, bona, omubaka n'aserengeta gy'ali: n'atumula nti bona, akabbiibi kano kaviire eri Mukama; kiki ekyabba kinindirirya ate Mukama?