¹ Awo Erisa n'atumula nti muwulire ekigambo kya Mukama: atyo bw'atumula Mukama nti eizo bwe bwabba nga kampegaano ekigero ky'o bwita obusa kyatundibwa sekeri, n'ebigero bibiri ebya sayiri sekeri mu wankaaki w'e Samaliya. ² Awo omwami kabaka gwe yeesigikanga ku mukono gwe n'airamu omusaiza wa Katonda n'atumula nti bona, Mukama bweyakola ebituli mu igulu, ekigambo ekyo kyandisobokere okubbaawo? N'atumula nti bona, olikibona n'amaiso go, naye toliryaku. ³ Awo wabbairewo abasaiza bana abagenge awayingirirwa mu wankaaki: ne bakobagana nti Kiki ekitutyamisya wano okutuusya lwe tulifa? ⁴ Oba nga twakoba nti Twayingira mu kibuga, kale enjala ng'eri mu kibuga, kale twafiira omwo: era oba nga twatyama wano butyami, era twafa. Kale mwize tusenge eigye ly'Abasuuli: bwe batuwonya nga balamu, kale tulibba balamu; era bwe batwita, twamala gafa. ⁵ Awo ni bagolokoka obwire okwaba mu lusiisira olw'Abasuuli: awo bwe baatuukire ku lusiisira olw'Abasuuli we lukoma, bona, nga ebulayo muntu. ⁶ Kubanga Mukama yabbaire awuliirye eigye ly'Abasuuli eidoboozi ly'amagaali n'eidoboozi ly'embalaasi, eidoboozi ly'eigye eringi: ni bakobagana nti bona, kabaka wa Isiraeri atuweereireku bakabaka b'Abakiiti na bakabaka b'Abamisiri okututabaala. ⁷ Awo nu bagolokoka ni bairuka bwire, ne baleka eweema gyabwe n'e mbalaasi gyabwe, n'e ndogoyi gyabwe, olusiisira nga bwe lwabbaire, ni bairuka olw'o bulamu bwabwe. ⁸ Awo abagenge abo bwe baatuukire ku lusiisira we lukoma, ni bayingira mu weema imu ni balya ni banywa; ni batoolamu efeeza n'e zaabu n'e bivaalo, ne baaba ne babigisa; ni bairawo ne bayingira mu weema egendi ni baiza n'o mwo ne baaba ne begisa. ⁹ Awo ne bakobagana nti Tetukola kusa: Watyanu lunaku lwe bigambo bisa fena tusirika: bwe twalindirira obwire ne bukya, twaizirwa okubonerezebwa: kale mwize twabe tukobere ab'o mu nyumba ya kabaka. ¹⁰ Awo ne baiza ni bakoowoola omwigali w'e kibuga: ne babakobera nti twatuukire mu lusiisira lw'Abasuuli, kale, bona, nga mubula muntu waire eidoboozi ly'o muntu, naye embalaasi nga gisibiibwe n'e ndogoyi nga gisibiibwe n'e weema nga bwe gyabbaire. ¹¹ Awo n'ayeta abaigali; ne bakobera ab'o mu nyumba ya kabaka munda. ¹² Awo kabaka n'agolokoka bwire n'akoba abaidu be nti atyanu nabategeeza Abasuuli kye batukolere. Bamaite ng'e njala etuluma; kyebaviire bava mu lusiisira okwegisa mu nsiko nga batumula nti bwe baviire mu kibuga twabawamba nga balamu, ni tuyingira mu kibuga. ¹³ Awo omumu ku baidu be n'airamu n'atumula nti batwale ku mbalaasi egisigaire itaanu, nkwegayirire, egisigaire mu kibuga, (bona, giri ng'e kibiina kyonakyona ekya Isiraeri ekisigaire mu kyo; bona, giri ng'e kibiina kyonakyona ekya Isiraeri ekimaliibwewo:) tutume tubone. ¹⁴ Awo ne batwala amagaali mabiri n'e mbalaasi; kabaka n'atuma okusengererya eigye ly'Abasuuli ng'atumula nti mwabe mubone. ¹⁵ Ne babasengererya okutuuka ku Yoludaani: kale, bona, engira yonayona nga eizwire ebivaalo n'e bintu Abasuuli bye baswire nga banguwa. Ababaka ni bairawo ni bakobera kabaka. ¹⁶ Awo abantu ne bafuluma ne banyaga olusiisira olw'Abasuuli. Awo ekigero ky'obwita obusa ne babutunda sekeri, n’e bigero ebye sayiri bibiri sekeri, ng'e kigambo kya Mukama bwe Kyabbaire. ¹⁷ Awo kabaka n'ateekawo omwami gwe yeesigikanga ku mukono gwe okulabirira wankaaki, abantu ni bamuniinirira mu mulyango n'afa ng'o musaiza wa Katonda bwe yakobere eyatumwire kabaka bwe yaserengetere gy'ali. ¹⁸ Awo ni kituukirira ng'o musaiza wa Katonda bwe yakobere kabaka nti ebigero ebya sayiri bibiri bye sekeri, n'e kigero ky'o bwita obusa kye sekeri, bwe kiribba kityo mu mulyango gw'e Samaliya amakeeri bulibba nga kampegaano; ¹⁹ omwami oyo n'airamu omusaiza wa Katonda n'atumula nti bona, Mukama bweyakola ebituli mu igulu, ekigambo ekyenkaniire awo kyandisobokere okubbaawo? n'atumula nti bona, olikibona n'a maiso go, naye toliryaku: ²⁰ ne kituukirira gy'ali kityo; kubanga abantu bamuniiniriire mu mulyango n'afa.