¹ Awo omukali omumu ow'oku bakali b'a baana ba banabbi n'atumulira waigulu eri Erisa ng'atumula nti Omwidu wo ibawange yafiire: era omaite ng’omwidu wo yatyanga Mukama: era ow'e ibbanja aizire okwetwalira abaana bange bombiri okubba abaidu. ² Erisa n'a mukoba nti Nakukolera ki? Nkobera: olina ki mu nyumba? N'atumula nti Omuzaana wo abula kintu mu nyumba wabula akacupa ak'a mafuta. ³ Awo n'atumula nti yaba weeyazike ebintu ewanza mu bainawo bonabona, ebintu ebyereere; weeyazike bingiku. ⁴ Awo n'oyingira weigalire iwe na bataane bo, oitululire mu bintu ebyo byonabyona; ogise ebiizwire. ⁵ Awo n'ava w'ali ni yeigalira iye na batabane be; ne bamuleetera ebintu n'aitulula. ⁶ Awo olwatuukire ebintu bwe byaizwire n'akoba mutaane we nti ndeetera ate ekintu. N'amukoba nti tewakaali waliwo ate kintu. Amafuta ni gakoma. ⁷ Awo n’aiza n'akobera omusaiza wa Katonda. N'atumula nti Yaba otunde amafuta osasule eibbanja lyo, ebyafiikawo bikuliisyenga iwe na bataane bo. ⁸ Awo olwatuukire lwabbaire lumu Erisa n'abita n'ayaba e Sunemu eyabbaire Omukali omukulu; n'amuwalirilya okulya ku mere. Awo olwatuukanga buli lwe yabitangawo n'akyamiranga omwo okulya ku mere. ⁹ N'akoba ibaye nti bona, ntegeire ng'ono musaiza mutukuvu wa Katonda atubitaku buli kaseera. ¹⁰ Nkwegayiriire tukookere ku kisenge; tumuteekere eyo ekitanda n'emeenza n'entebe n'eky'etabaaza: awo olwatuukanga bw'eyayizanga gye tuli yakyamiranga omwo. ¹¹ Awo olunaku lwabbaire lumu n'aizayo n'akyamira mu nyumba n'agalamira omwo. ¹² N'akoba Gekazi omwodu we nti Yeta omusunamu ono. Awo bwe yamwetere n'ayemerera mu maiso ge. ¹³ N'amukoba nti mukobe nti bona, watujanjabire okujanjaba okwekankana awo; kiki ekyabba kikukolerwa? otaka okutumulirwa eri kabaka oba eri omukulu w'eigye? N'airamu nti ntyama mu bantu bange nze. ¹⁴ N'atumula nti Kale kiki ekyabba kimukolerwa? Gekazi n'airamu nti Mazima abula mwana wo bwisuka no ibaaye mukaire. ¹⁵ N'atumula nti mwete. Awo bwe yamwetere n'ayemerera ku mulyango. ¹⁶ N'atumula nti Mu kiseera kino Ebiseera bwe biriira, oliwambaatira omwana ow'obwisuka. N'atumula nti, mukama wange, iwe omusajja wa Katonda, tobbeya muzaana wo. ¹⁷ Omukali n'abba ekida n'azaalira omwana ow'obwisuka mu kiseera ekyo ebiseera bwe byairire nga Erisa bwe yamukobere. ¹⁸ Awo omwana bwe yakulire olunaku lwabbaire lumu n'afuluma n'ayaba eri itaaye eri abakunguli. ¹⁹ N'akoba itaaye nti Omutwe gwange, omutwe gwange. N'akoba omwidu we nti musitule omutwale eri maye. ²⁰ Awo bwe yamutwaire n'amutuukya eri maye, n'atyama ku makumbo ge okutuusya eiyangwe kaisi n'afa. ²¹ N'aniina n'amugalamirya ku kitanda ky'omusaiza wa Katonda, n'amwigalira olwigi n'afuluma. ²² N'ayeta ibaye n'atumula nti nkwegayiriire, mpeererya omumu ku baidu n'e imu ku ndogoyi njabe mbiro eri omusaiza wa Katonda ngirewo. ²³ N'atumula nti kiki ekikutakirya okwaba gy'ali atyanu? ti lunaku lwo mwezi ogwakaboneka so ti sabbiiti. N'atumula nti mirembe. ²⁴ Awo n'atandiika endogoyi n'akoba omwidu we nti bbinga otambule; toita ku bigere wabula nga nkukobere. ²⁵ Awo n'ayaba n'atuuka eri omusaiza wa Katonda ku lusozi Kalumeeri. Awo olwatuukiire omusaiza wa Katonda bwe yamulengeire ng'akaali wala, n'akoba Gekazi omwidu we nti bona, Omusunammu wuuyo: ²⁶ Nkwegayiriire, iruka mbiro omusisinkane omukobe nti oli kusa? Ibaawo ali kusa? omwana ali kusa? N'airamu nti kusa. ²⁷ Awo bwe yatuukire eri omusaiza wa Katonda ku lusozi, n'amukwata ku bigere. Gekazi n'asembera okumusindika; naye omusaiza wa Katonda n'atumula nti muleke: kubanga emeeme ye enyiikaire mukati mu iye; era Mukama akingisire so tankobeire. ²⁸ Awo n'atumula nti Natakire omwana ow'obwisuka eri mukama wange? Tinatumwire nti tombeya? ²⁹ Awo n'ankoba Gekazi nti Weesibe ekimyu oirire omwigo gwange mu mukono gwo oyabe: bw'e wasanga omuntu yenayena tomusugirya; era omuntu yenayena bweyakusugirya, tomwiramu: oteeke omwigo gwange ku maiso g'omwana. ³⁰ Maye w'o mwana n'atumula nti Nga Mukama bw'ali omulamu n'e meeme yo nga bw'eri enamu, Tinjaba kukuleka. N'agolokoka n'amusengererya. ³¹ Awo Gekazi n'abitamu n'abatangira n'ateeka omwigo ku maiso g'o mwana; naye ne watabba idoboozi waire okuwulira. Kyeyaviire airawo okumusisinkana, n'amukobera nti omwana tazuukire. ³² Awo Erisa bwe yayingiire mu nyumba, bona, omwana ng'afiire era ng'a galamiire ku kitanda kye. ³³ Awo n'ayingira ni yeigalira naye bombiri n'asaba Mukama. ³⁴ N'aniina n'agalamira ku mwana n'ateeka omunwa gwe ku munwa gwe n’a maiso ge ku maiso ge n'e mikono gye ku mikono gye: ni yeegololera ku iye; omubiri gw'o mwana ni gubuguma. ³⁵ Awo n'airawo n’atambula mu nyumba omulundi ogumu eruuyi n'o mulundi ogumu eruuyi; n'a niina ne yeegololera ku iye: omwana n'ayasimula emirundi musanvu, omwana n'azibula amaiso. ³⁶ N'ayeta Gekazi n'atumula nti nwete Omusunamu oyo. Awo n'amweta. Awo ng'ayingiire gy'ali n'atumula nti situla omwana wo. ³⁷ Awo n'ayingira n'avuunama ku bigere bye n'akutama wansi; n'asitula omwana we n'afuluma. ³⁸ Awo Erisa n'aiza ate e Girugaali: ne waba enjala mu nsi; abaana ba banabbi ne batyama mu maiso ge: n'akoba omwidu we nti teekaku entamu enene, ofumbire abaana ba banabbi eiva. ³⁹ Awo omumu n'afuluma n'ayaba ku itale okunoga amaboga, n'asanga omuzabbibu ogw'o mu nsiko, n'anogako amaboga ag'o mu nsiko n'aizulya olugoye lwe, n'aiza n'agatyemulatyemulira mu ntamu eimu eiva: kubanga tebaagamaite. ⁴⁰ Awo ne baiwulira abantu okulya. Awo olwatuukire bwe babbaire nga balya ku iva, ne batumulira waigulu nga bakoba nti Ai omusaiza wa Katonda, mu ntamu mulimu okufa. So tebasobola kugiryaku. ⁴¹ Yeena n'atumula nti kale muleete obwita. N'abusuula mu ntamu; n'atumura nti Mwiwulire abantu balye. Ni watabba kabbiibi mu ntamu. ⁴² Awo omusaiza n'aiza ng'ava e Baalusalisa, n'aleetera omusaiza wa Katonda emere ey'o kubiberyeberye, emigaati egya sayiri abiri n'ebiyemba eby'e ŋaanu ebibisi mu nsawo ye. N'atumula nti Bawe abantu balye. ⁴³ Awo omwidu we n'atumula nti! nteeke kino mu maiso g'abasaiza ekikumi? Yeena n'atumula nti bawe abantu balye; kubanga atyo bw'atumula Mukama nti Baalya ne balemwa. ⁴⁴ Awo n'agiteeka mu maiso gaabwe, ni balya ni balemwa ng'e kigambo kya Mukama bwe kyabbaire.