¹ Awo Yekolaamu mutaane wa Akabu n'atandika okufuga Isiraeri mu Samaliya mu mwaka ogw'e ikumi n'o munaana ogwa Yekosafaati kabaka we Yuda, n'afugira emyaka ikumi n'a ibiri. ² N'akola ebyabbaire mu maiso ga Mukama ebibbiibi; naye obutafaanana itaaye n'o kufaanana maye: kubanga yatoirewo empango ya Baali itaaye gye yakolere. ³ Naye ne yeegaita n'e bibbiibi bya Yerobowaamu mutaane wa Nebati bye yayonooneserye Isiraeri; tiyabiviiremu. ⁴ Era Mesa kabaka wa Mowaabu yabbaire musumba w'e ntama; n'awangayo eri kabaka wa Isiraeri ebyoya by'a baana b'e ntama kasiriivu n'e by'e ntama enume kasiriivu. ⁵ Naye olwatuukire Akabu bwe yafiire kabaka we Mowaabu n'ajeemera kabaka we Isiraeri. ⁶ Kabaka Yekolaamu n'ava mu Samaliya mu biseera ebyo, n'ayolesya Isiraeri yenayena. ⁷ Awo n'ayaba n'atumira Yekosafaati kabaka we Yuda ng'atumula nti Kabaka w'e Mowaabu anjeemeire: watabaala Mowaabu wamu nanze? N'atumula nti Nayambuka: nze ninga we bw'oli, abantu bange ng'abantu bo, embalaasi gyange ng'embalaasi gyo. ⁸ N'atumula nti twayambuka mu ngira ki? N'airamu nti Mu ngira ery'o mu idungu erya Edomu. ⁹ Awo kabaka w'e Isiraeri n'ayaba n'o kabaka we Yuda n'o kabaka w'Edomu: ne beetooloola olugendo lw'e enaku musanvu: so nga wabula maizi g'e igye waire ag'e nsolo egy'abasengererya. ¹⁰ Awo kabaka wa Isiraeri n'atumula nti Gitusangire! kubanga Mukama ayetere bakabaka bano abasatu okukuŋaana okubagabula mu mukono gwa Mowaabu. ¹¹ Naye Yekosafaati n'atumula nti wabula wano nabbi wa Mukama tubuulirye mu iye eri Mukama? Awo omumu ku baidu ba kabaka wa Isiraeri n'airamu n'atumula nti Erisa mutaane wa Safati wano eyafukiriranga amaizi mu ngalo gya Eriya. ¹² Awo Yekosafaati n'atumula nti Ekigambo kya Mukama kiri naye. Awo kabaka wa Isiraeri n'o Yekosafaati n'o kabaka wa Edomu ne baserengeta gy'ali. ¹³ Erisa n'akoba kabaka wa Isiraeri nti nfaayo ki eri iwe? Yaba eri banabbi ba Itaawo n'eri banabbi ba mawo. Kabaka wa Isiraeri n'amukoba nti bbe: kubanga Mukama ayetere bakabaka bano abasatu okukuŋaana okubagabula mu mukono gwa Mowaabu. ¹⁴ Erisa n'atumula nti nga Mukama w'e igye bw'ali omulamu gwe nyememera mu maiso ge, mazima singa tindowooza Yekosafaati kabaka wa Yuda okubbaawo, tunandikulingiriire so tinandikuboine. ¹⁵ Naye ndeetera omukubbi w'e nanga. Awo olwatuukire omukubbi w'e nanga bwe yakubbire, omukono gwa Mukama ni gumwizaku. ¹⁶ N'atumula nti Atyo bw'atumula Mukama nti Mwizulye ekiwonvu kino ensalosalo. ¹⁷ Kubanga atyo bw'atumula Mukama nti Temwabone mbuyaga so temwanone maizi, naye ekiwonvu ekyo kyaizula amaizi: mwena mwanywa, imwe n'ebisibo byanyu n'e nsolo gyanyu. ¹⁸ Era kino kigambo kitono so ti kikulu mu maiso ga Mukama: era aligabula n'Abamowaabu mu mukono gwanyu. ¹⁹ Era mulimenya buli kibuga ekiriku enkomera na buli kibuga ekironde ni mutema buli musaale omusa ni muziba ensulo gyonagyona egy'a maizi ni mwonoona buli musiri omusa n'amabbaale. ²⁰ Awo olwatuukire Amakeeri mu kiseera eky'okuwaayo ekitone, kale, bona, amaizi ne gaiza nga gafuluma mu ngira ey'e Edomu, ensi n'eizula amaizi. ²¹ Awo Abamowaabu bonabona bwe baawuliire bakabaka nga bambukire okulwana nabo, ne bakuŋaana bonabona abasoboire okuvaala ebyokulwanisya n'okusingawo, ni bemerera okutabaala. ²² Awo ne bagolokoka Amakeeri mu makeeri, eisana n'elyaka ku maizi, Abamowaabu ne babona amaizi agaboolekeire nga gamyukire ng'omusaayi: ²³ awo ne batumula nti Guno niigwo musaayi: bakabaka tebalemere kuzikirizibwa, era baitire buli muntu mwinaye: kale, Mowaabu, mugwe ku munyago. ²⁴ Awo bwe baatukire mu lusiisira lwa Isiraeri, Abaisiraeri ne bagolokoka ne bakubba Abamowaabu n'okwiruka ne bairuka mu maiso gaabwe: ne beeyongerayo mu nsi nga bakubba Abamowaabu. ²⁵ Ne bamenyamenya ebibuga; n'awali omusiri omusa ogw'e itakali ni bakasuka buli muntu eibbaale lye ne waizula; ni baziba ensulo gyonagyona egy'a maizi, ni batema emisaale gyonagyona emisa okutuusya lwe basigairyewo mu Kirukalesesi amabbaale gamu gonka; naye ab'envuumuulo ni batambulatambula mu nsi ne bagikubba. ²⁶ Awo kabaka wa Mowaabu bwe yaboine olutalo nga lumuyingiriire, n'atwala abasaiza lusanvu abaasowolanga ebitala, okuwaguzya okutuuka eri kabaka w’e Edomu: naye ne batasobola. ²⁷ Awo n'airira mutaane we omuberyeberye eyandifugire mu kifo kye, n'amuwaayo okubba ekiweebwayo ekyokyebwa ku bugwe. Ne wabba obusungu bungi eri Isiraeri: ni bamuvaaku ne bairayo mu nsi yaabwe.