¹ Awo olwatuukire Mukama bwe yatakire okuniinisya Eriya n'empunga egya kampusi mu igulu, Eriya n'ayaba n'e Erisa ng'ava e Girugaali. ² Awo Eriya n'akoba Erisa nti bba wano, nkwegayiriire; kubanga Mukama antumire e Beseri. Erisa n'atumula nti Nga Mukama bw'ali omulamu n'emeeme yo nga bw'eri enamu, tinjaba kukuleka. Awo ni baserengeta ni baiza e Beseri. ³ Awo abaana ba banabbi ababbaire e Beseri ne bafuluma eri Erisa, ne bamukoba nti Omaite nga Mukama yatoola mukama wo ku mutwe gwo atyanu? N'atumula nti Niiwo awo, maite; imwe musirike. ⁴ Awo Eriya n'amukoba nti Erisa, bba wano. nkwegayiriire; kubanga Mukama antumire e Yeriko. N'atumula nti nga Mukama bw’ali omulamu n'e meeme yo nga bw'eri enamu, tinjaba kukuleka. Awo ne baiza e Yeriko. ⁵ Awo abaana ba banabbi ababbaire e Yeriko ni bafuluma eri Erisa, ni basemberera Erisa ni bamukoba nti Omaite nga Mukama yatoola mukama wo ku mutwe gwo watyanu? N'airamu nti Niiwo awo, maite; imwe musirike. ⁶ Awo Eriya n'amukoba nti Nkwegayiriire, bba wano; kubanga Mukama antumire e Yoludaani. N'atumula nti nga Mukama bw'ali omulamu n'e meeme yo nga bw'eri enamu, tinjaba kukuleka. Awo abo bombiri ni batambula. ⁷ Awo abasaiza ataanu ab'oku baana ba banabbi ne baaba ni bemerera okuboolekera wala nabo; abo bombiri ne bemerera ku Yoludaani. ⁸ Awo Eriya n'airira omunagiro gwe n'aguzinga wamu n'akubba amaizi ni gaawulibwamu eruuyi n'eruuyi n'okubita ni babita bombiri ku lukalu. ⁹ Awo olwatuukirw bwe baamalire okusomoka Eriya n'akoba Erisa nti Saba kye nakukolera nga nkaali kukutolebwaku. Erisa n'atumula nti Nkwegayiriire emigabo ibiri egy'omwoyo gwo gibbe ku nze. ¹⁰ N'atumula nti osabye kizibu: naye bwewambona bwe naakutoolebwaku kyabba kityo gy'oli; naye bw'otombone tikyabbe kityo. ¹¹ Awo olwatuukire nga bakaali batambula nga batumula, bona, ni waboneka eigaali ery'o musyo n'e mbalaasi egy'o musyo ne gibaawula bombiri; Eriya n'aniina mu igulu n'e mpunga egya kampusi. ¹² Era Erisa n'akibona n'atumulira waigulu nti Itawange, Itawange, amagaali ga Isiraeri n'embalaasi gye! N'atambula ate: n'akwata ebivaalo bye n'abikanulamu ebitundu bibiri. ¹³ Era n'alonda n'ekivaalo kya Eriya ky'aswire, n'airayo n'ayemerera ku lubalama lwa Yoludaani. ¹⁴ N'airira ekivaalo kya Eriya ky'aswire, n'akubba amaizi n'atumula nti Ali luuyi waina Mukama Katonda w'Eriya? awo ng'amalire okukubba amaizi yena, ni gaawulibwamu eruuyi n'eruuyi: Erisa n'asomoka. ¹⁵ Awo abaana ba banabbi ababbaire e Yeriko okumwolekera bwe bamuboine, ne batumula nti Omwoyo gw'Eriya gutyama ku Erisa. Ni baiza okumusisinkana, ne bavuunama mu maiso ge. ¹⁶ Awo ne bamukoba nti bona waliwo abasaiza ataanu Ab'amaani wamu n'abaidu bo; tukwegayiriire baabe basagire mukama wo: Koizi omwoyo gwa Mukama gumusitwiire ni gumusuula ku lusozi oba mu kiwonvu; N'atumula nti timubatuma. ¹⁷ Awo bwe bamutayiriire okutuusya ensoni lwe gyamukwaite, n'atumula nti mutume. Awo ne batuma abasaiza ataanu; ne basagira enaku isatu naye ne batamubona. ¹⁸ Awo ne bairawo gy'ali ng'akaali alinda e Yeriko; n'abakoba nti tinabakobere nti Temwayaba? ¹⁹ Awo abasaiza ab'omu kibuga ne bakoba Erisa nti Bona, tukwegayiriire, awali ekibuga kino wasa nga mukama wange bw'abona: naye amaizi gabulaku kye gagasa, n'e nsi tekulya mere. ²⁰ N'atumula nti Mundeetere akacupa akayaka, muteeke omwo omunyu. Ni bakaleeta gy'ali. ²¹ N'afuluma n'aiza awali ensulo y'amaizi, n'asuula omwo omunnyu n'atumula nti Atyo bw'atumula Mukama nti mponyerye amaizi gano; temukaali muvaamu ate lumbe newaire obutakulya mere. ²² Awo amaizi ni gawona ne watynu ng'e kigambo bwe kyabbaire ekya Erisa kye yatumwire. ²³ Awo n'avaayo n'ayambuka n'ayaba e Beseri: awo ng'ali mu ngira ng'ayambuka abaana abatobato ni bava mu kibuga ni bamuduulira ni bamukoba nti Yambuka, iwe ow'e mpaata; yambuka, iwe ow'e mpaata. ²⁴ N'akebuka n'ababona n'abalaama mu liina lya Mukama. Amadubu mabiri amakali ni gava mu kibira ni gataagula abaana ana na babiri ku ibo. ²⁵ Awo n'avaayo n'ayaba eri olusozi Kalumeeri, n'avaayo n'airawo e Samaliya.