¹ Ku mirembe gye Nebukaduneeza kabaka w'e Babulooni n'a yambuka, Yekoyakimu n'a fuuka omwidu we emyaka isatu: awo kaisi n'akyuka n'amujeemera. ² Awo Mukama n'amusindikira ebibiina eby'Abakaludaaya n'e bibiina eby'Abasuuli n'e bibiina eby'Abamowaabu n'e bibiina eby'a baana ba Amoni, n'abasindika ku Yuda okugizikirirya ng'e kigambo kya Mukama kye yatumwire n'o mukono gw'a baidu be banabbi. ³ Mazima ekyo kyaizire Yuda lwe kiragiro kya Mukama, okubatoola mu maiso ge olw'o kwonoona kwa Manase nga byonabyona bwe byabbaire bye yakolere; ⁴ era n'olw'o musaayi ogubulaku musango gwe yayiwire; kubanga yaizwirye Yerusaalemi omusaayi ogubulaku musango: Mukama n'atataka kusonyiwa. ⁵ Era ebikolwa ebindi byonabyona ebya Yekoyakimu n'e byonabyona bye yakolere tibywandiikiibwe mu kitabo eky'e by'o mu mirembe gya bakabaka ba Yuda? ⁶ Awo Yekoyakimu n'agonera wamu na bazeizabe: Yekoyakini mutaane we n'afuga mu kifo kye. ⁷ Awo kabaka w'e Misiri tiyeeyongeire ate kwizanga okuva mu nsi ye: kubanga kabaka w'e Babulooni yabbaire aliire byonabyona ebyabbanga ebya kabaka w'e Misiri okuva ku kaiga ak'e Misiri okutuuka ku muiga Fulaati. ⁸ Yekoyakini yabbaire yaakamala emyaka ikumi na munaana bwe yatandikiire okufuga; n'afugira emyezi isatu mu Yerusaalemi: n'o Maye eriina lye yabbaire Nekusita muwala wa Erunasani ow'e Yerusaalemi. ⁹ N'akola ebyabbaire mu maiso ga Mukama ebibbiibi nga byonabyona bwe byabbaire bazeiza be bye bakolanga. ¹⁰ Mu biseera abaidu ba Nebukaduneeza kabaka w'e Babulooni ni bambuka e Yerusaalemi, ekibuga ni kizingizibwa. ¹¹ Nebukaduneeza kabaka w'e Babulooni n'a iza eri ekibuga, abaidu be nga bakaali bakizingizirye; ¹² Yekoyakini kabaka we Yuda n'a fuluma n'aiza eri kabaka w'e Babulooni, iye n'o maye n'a baidu be n'a bakungu be n'a baami be: kabaka w'e Babulooni n'amukwata mu mwaka ogw'o munaana kasooka alya bwakabaka. ¹³ N'atoolamu eby'o bugaiga byonabyona eby'o mu nyumba ya Mukama n'e by'o bugaiga eby'o mu nyumba ya kabaka, n'atematema ebintu byonabyona eby'e zaabu Sulemaani kabaka wa Isiraeri bye yakolere mu yeekaalu ya Mukama nga Mukama bwe yatumwire. ¹⁴ N'atwalira dala Yerusaalemi kyonakyona n'abakungu bonabona n'a basaiza bonabona Ab'a maani abazira, abasibe mutwalo, na bafundi bonabona n'abaweesi; wabula abaasigairewo wabula abo abasinga obwavu ku bantu ab'o mu nsi. ¹⁵ N'atwala Yekoyakini e Babulooni; n'o maye wa kabaka na bakabaka n'a baami be n'a bakulu ab'e nsi n'abatwala e Babulooni nga basibe ng'a batoola e Yerusaalemi. ¹⁶ Era abasaiza bonabona Ab'a maani, kasanvu, n'a bafundi n'a baweesi, lukumi, bonabona ba maani nga basaaniire okulwana, abo kabaka w'e Babulooni n'abatwala e Babulooni nga basibe. ¹⁷ Awo kabaka w'e Babulaoni n'afuula Mataniya mugande wa itaaye kabaka mu kifo kye, n'a waanyisya eriina lye n'a mutuuma Zedekiya. ¹⁸ Zedekiya yabbaire yaakamala emyaka abiri na gumu bwe yatandikire okufuga, n'afugira emyaka ikumi na gumu mu Yerusaalemi: n'o maye eriina lye yabbaire Kamutali muwala wa Yeremiya ow'e Libuna. ¹⁹ N'akola ebyabbaire mu maiso ga Mukama ebibbiibi nga byonabyona bwe byabbaire Yekoyakimu bye yakolere. ²⁰ Kubanga kyatuukiriire mu Yerusaalemi n'o mu Yuda lw'o busungu bwa Mukama okutuusya lwe yamalire okubabbinga mu maso ge: Zedekiya n'ajeemera kabaka w'e Babulooni.