¹ Awo kabaka n'atuma, ni bakuŋaanyirya gy'ali abakaire bonabona aba Yuda n'ab'e Yerusaalemi. ² Kabaka n'a yambuka mu nyumba ya Mukama, n'a basaiza bonabona abe Yuda ne bonabona abatyama mu Yerusaalemi wamu naye na bakabona na banabbi n'a bantu bonabona, abatobato n'a bakulu: n'a soma mu matu gaabwe ebigambo byonabyona eby'e kitabo eky'e ndagaanu ekizuuliibwe mu nyumba ya Mukama. ³ Kabaka n'a yemerera awali empango n'alagaanira endagaanu mu maiso ga Mukama okutambula okusengererya Mukama n'o kukwata amateeka ge n'ebyo bye yategeezerya n'e biragiro bye n'o mwoyo gwe gwonagwona n'e meeme ye yonayona okunyweza ebigambo by'e ndagaanu eno ebyawandiikiibwe mu kitabo kino: abantu bonabona ni bemerera okwesibira endagaanu. ⁴ Awo kabaka n'alagira Kirukiya kabona asinga obukulu na bakabona ab'o mutindo ogw'okubiri n'a baigali, okufulumya mu yeekaalu ya Mukama ebintu byonabyona ebyakoleirwe Baali n'o Asera n'e igye lyonalyona ery'o mu igulu: n'abyokyerya ewanza we Yerusaalemi mu itale eriri ku Kiduloni, n'e ikoke lyabyo n'alitwala e Beseri. ⁵ N'atoolawo bakabona abasinza ebifaananyi bakabaka ba Yuda be bayawire okwoterererya obubaani ku bifo ebigulumivu mu bibuga bye Yuda n'o mu bifo ebyetooloire Yerusaalemi; n'abo abaayoterereryanga obubaane Babbaire n'e isana n'o mwezi n'e munyenye n'e igye lyonalyona ery'o mu igulu. ⁶ N'atoola Asera mu nyumba ya Mukama ewanza w'e Yerusaatemi n'a kireeta ku kaiga Kiduloni n'a kyokyerya ku kaiga Kiduloni n'akiniinirira n'akifuula eifufuge n’asuula eifufuge lyakyo ku magombe g'a bakopi. ⁷ N'amenyamenya enyumba egy'a baalyanga ebisiyaga egyabbaire mu nyumba ya Mukama, Abakali gye balukiriranga Asera ebitimbibwa. ⁸ N'atoola bakabona bonabona mu bibuga bye Yuda, n'ayonoona ebifo ebigulumivu bakabona kwe baayotereryanga obubaani, okuva e Geba okutuuka e Beeruseba; n'amenyamenya ebifo ebigulumivu eby'oku njigi ebyabbaire awayingirirwa mu mulyango gwa Yoswa omukulu w'e kibuga, ebyabbaire ku mukono omugooda ogw'o muntu awali wankaaki w'e kibuga. ⁹ Era naye bakabona ab'e bifo ebigulumivu ni batayambuka eri ekyoto kya Mukama mu Yerusaalemi, naye ni baliiranga emigaati egitazimbulukuswa mu bagande baabwe. ¹⁰ Era n'ayonoona Tofesi ekiri mu kiwonvu eky'a baana ba Kinomu, omuntu yenayena aleke okubitya omwana we ow'o bwisuka waire ow'o buwala mu musyo eri Moleki. ¹¹ N'atoolawo embalaasi bakabaka ba Yuda gye babbingire bawaire eisana, awayingirirwa mu nyumba ya Mukama, awali enyumba ya Nasanumereki omulaawe, eyaliraine yeekaalu; Kaisi amagaali g'e isana omusyo. ¹² N'ebyoto ebyabbaire waigulu ku nyumba eya waigulu eya Akazi, bakabaka be Yuda bye babbaire bakolere, n'e byoto Manase bye yabbaire akolere, mu mpya gyombiri egy'e nyumba ya Mukama, kabaka n'a bimenyamenya n'a bisindika wansi okubitoolayo, n'a suula enfuufu yaabyo mu kaiga Kiduloni. ¹³ N'ebifo ebigulumivu ebyayolekeire Yerusaalemi ebyabbaire ku mukono omulyo ogw'o lusozi olw'o bwonoonefu, Sulemaani kabaka wa Isiraeri bye yazimbiire Asutaloosi omuzizyo gw'Abasidoni ne Kemosi omuzizyo gwa Mowaabu n'o Mirukomu omuzizyo gw'a baana ba Amoni, kabaka n'abyonoona. ¹⁴ N'amenyamenya empango n'atema Baasera n'a izulya ebifo byabwe amagumba g'a bantu. ¹⁵ Era n'e kyoto ekyabbaire e Beseri n'e kifo ekigulumivu n'a bimenya mutaane wa Nebati eyayonooneserye Isiraeri kye yakolere, ekyoto ekyo n'e kifo ekigulumivu n'abimenyamenya; n'ayokya ekifo ekigulumivu n'akiniinirira n'akifuula ekitinde n'ayokya Asera. ¹⁶ Awo Yosiya bwe yakebukire n'a bona amagombe agali eyo ku lusozi; n'atuma n'atoola amagumba mu magombe n'a gookyerya ku kyoto n'a kyonoona ng'e kigambo bwe ky'abbaire ekya Mukama omusaiza wa Katonda kye yalangiriire eyalangiriire ebigambo bino. ¹⁷ Awo n'atumula nti Kijukiryo ki ekyo kye mbona? Abasaiza ab'o mu kibuga ni bamukobera nti niigo magombe g'o musaiza wa Katonda eyaviire mu Yuda n'alangirira ebigambo ebyo by'okolere ku kyoto eky'o mu Beseri. ¹⁸ N'atumula nti Mumuleke; omuntu yenayena aleke okusimula amagumba ge. Awo ni baleka amagumba ge wamu n'a magumba ga nabbi eyaviire mu Samaliya. ¹⁹ Era n'a masabo gonagona ag'e bifo ebigulumivu agabbaire mu bibuga eby'e Samaliya, bakabaka ba Isiraeri ge bakolere, okusunguwalya Mukama, Yosiya n'agatoolawo nakola ag'e bikolwa byonabyona bwe byabbaire bye yakolere mu Beseri. ²⁰ N'aitira bakabona bonabona ab'e bifo ebigulumivu ababbaire eyo ku byoto, n'a byokyeryaku amagumba g'a bantu; n'airayo e Yerusaalemi. ²¹ Awo kabaka n'alagira abantu bonabona ng'atumula nti mukwate okubitaku eri Mukama Katonda wanyu nga bwe kyawandiikiibwe mu kitabo kino eky'e ndagaanu. ²² Mazima tebaakwatanga kubitaku okwekankana awo okuva ku mirembe gy'a balamuzi abalamwire Isiraeri waire mu mirembe gyonagyona egya bakabaka ba Isiraeri waire mu gya bakabaka ba Yuda; ²³ naye mu mwaka ogw'e ikumi n'o munaana ogwa kabaka Yosiya ni bakwata okubitaku okwo eri Mukama mu Yerusaalemi. ²⁴ Era ate abo ababbaireku emizimu n'abatekerewo na baterafi n'e bifaananyi n'e mizizyo gyonagyona egyabonekere mu nsi y'e Yuda n'o mu Yerusaalemi Yosiya n'a bitoolawo, kaisi anywezye ebigambo eby'a mateeka ebyawandikiibwe mu kitabo Kirukiya kabona kye yazwire mu nyumba ya Mukama. ²⁵ Era wabula kabaka eyamusookere eyamufaanaine eyakyukiire Mukama n'o mwoyo gwe gwonagwona n'e meeme ye yonayona n'amaani ge gonagona ng'a mateeka ga Musa gonagona bwe gabbaire; so n'o luvanyuma lwe tewaagolokokere n'o mumu eyamufaanaine. ²⁶ Era naye Mukama n'atakyuka kuleka ekiruyi kye ekingi ekyabuubuukirye obusungu bwe eri Yuda olw'o kusunguwalya kwonakwona Manase kwe yamusunguwairye. ²⁷ Mukama n'atumula nti nditoolawo n'e Yuda mu maiso gange nga bwe ntoirewo Isiraeri, era ndisuula ekibuga kino kye nerobozerye, Yerusaalemi, n'e nyumba gye natumwireku nti eriina lyange lyabbanga eyo. ²⁸ Era ebikolwa ebindi byonabona ebya Yosiya ne byonabona bye yakolere tibyateekeibwe mu kitabo eky'e byomumirembe gya bakabaka ba Yuda? ²⁹ Ku mirembe gye Falaawoneko kabaka w'e Misiri n'atabaala kabaka w'e Bwasuli ku mwiga Fulaati: Yosiya n'amutabaala: n'amumwitira e Megido bwe yamuboine. ³⁰ Abaidu be ni bamusitulira mu igaali ng'a fiire ni bamutoola e Megido, ni bamuleeta e Yerusaalemi ni bamuziika mu magombe iye. Abantu ab'o mu nsi ni batwala Yekoyakaazi mutaane wa Yosiya ni bamufukaku amafuta ni bamufuula kabaka mu kifo kya itaaye. ³¹ Yekoyakaazi, yabbaire yaakamala emyaka abiri na isatu bwe yatandikire okufuga; n'a fugira emyezi isatu mu Yerusaalemi: n'o maye eriina lye yabbaire Kamutali muwala wa Yeremiya ow'e Libuna. ³² N'akola ebyabbaire mu maiso ga Mukama ebibbiibi nga byonabona bwe byabbaire bazeiza be bye baakolere. ³³ Awo Falaawoneko n'a musibira mu masamba e Libula mu nsi y'e Kamasi aleke okufuga mu Yerusaalemi: n'asalira ensi omusolo ogw'e feeza talanta kikumi n'e zaabu talanta imu. ³⁴ Awo Falaawoneko n'a fuula Eriyakimu mutaane wa Yosiya kabaka mu kifo kya Yosiya itaaye, n'a waanyisya eriina lye, n'amutuuma Yekoyakimu: naye n'a toolayo Yekoyakaazi; n'aiza e Misiri n'afiira eyo. ³⁵ Awo Yekoyakimu n'awa Falaawo efeeza n'e zaabu; naye n'a salira ensi ebintu okuwaayo efeeza eyo nga Falaawo bwe yalagiire: yasoloozerye efeeza n'e zaabu ku bantu ab'o mu nsi, ku buli muntu nga bwe yasaliirwe ebintu, okubiwa Falaawoneko. ³⁶ Yekoyakimu yabbaire yaakamala emyaka abiri na itaanu, bwe yatandikire okufuga; n'a fugira emyaka ikumi na gumu mu Yerusaalemi: n'o maye eriina lye yabbaire Zebida muwala wa Pedaya ow'e Luuma. ³⁷ N'akola ebyabbaire mu maiso ga Mukama ebibbiibi nga byonabona bwe byabbaire itaaye bye yakolere.