¹ Yosiya yabbaire yaakamala emyaka munaana bwe yatandikiire okufuga; n'afugira emyaka asatu na gumu mu Yerusaalemi: n'o maye eriina lye yabbaire Yedida muwala wa Adaya ow'e Bozukasi. ² N'akola ebyabbaire mu maiso ga Mukama ebisa n'atambulira mu ngira yonayona eya Dawudi zeizawe n'atakyamira ku mukono omulyo waire omugooda. ³ Awo olwatuukire mu mwaka ogw'e ikumi n'o munaana ogwa kabaka Yosiya kabaka n'atuma Safani mutaane wa Azaliya mutaane wa Mesulamu omuwandiiki eri enyumba ya Mukama ng'atumula nti ⁴ Mwambuke eri Kirukiya kabona asinga obukulu, abale efeeza egireetebwa mu nyumba ya Mukama, abaigali gye baakasoloozerye ku bantu: ⁵ bagiweeyo mu mukono gw'a bakozi b'e mirimu abalabirira enyumba ya Mukama: bagiwe abakozi b'e mirimu abali mu nyumba ya Mukama okudaabirirya ebituli by'e nyumba; ⁶ ababaizi n'a bazimbi b'amabbaale; era olw'o kugula emisaale n'a mabbaale amabaize okudaabirirya enyumba. ⁷ Naye tibaabaliriire muwendo eri abo ogw'e feeza egyaweweibwe mu mukono gwabwe; kubanga bakolanga n'o bwesigwa. ⁸ Awo Kirukiya kabona asinga obukulu n’akoba Safani omuwandiiki nti nzwire ekitabo eky'a mateeka mu nyumba ya Mukama. Awo Kirukiya n'awa Safani ekitabo n'a kisoma. ⁹ Awo Safani omuwandiiki n'aiza eri kabaka n'a irirya kabaka ebigambo n'a tumula nti Abaidu bo batoiremu efeeza egibonekere mu nyumba, ni bagiwa mu mukono gw'a bakozi b'e mirimu abalabirira enyumba ya Mukama. ¹⁰ Awo Safani omuwandiiki n'akoba kabaka nti kirukiya kabona ampaire ekitabo. Safani n'a kisoma mu maiso ga kabaka. ¹¹ Awo olwatuukire kabaka bwe yawuliire ebigambo eby'e kitabo eky'a mateeka, n'akanula ebivaalo bye. ¹² Awo kabaka n'alagira Kirukiya kabona n'o Akikamu mutaane wa Safani n'o Akuboli mutaane wa Mikaaya n'o Safani omuwandiisi n'o Asaya omwidu wa kabaka ng'atumula nti ¹³ Mwabe mumbuulirirye Mukama nze n'a bantu ne Yuda yenayena eby'e bigambo eby'e kitabo kino ekizuulibwe: kubanga obusungu bwa Mukama obubuubuukire eri ife bungi kubanga bazeiza baisu tebawuliire bigambo bye kitabo kino okukola nga byonabyona bwe biri ebyatuwandiikiirwe. ¹⁴ Awo Kirukiya kabona n'o Akikamu n'o Akuboli n'o Safani n'o Asaya ni baaba eri Kuluda nabbi omukali muka Salumu mutaane wa Tikuva mutaane wa Kalukasi omuwanika w'e bivaalo; (oyo yabbanga mu Yerusaalemi ku luuyi olw'o kubiri;) ni bateesya naye. ¹⁵ Awo n'a bakoba nti Atyo bw'atumula Mukama Katonda wa Isiraeri nti Mukobe omusaiza abatumire gye ndi nti ¹⁶ Atyo bw'atumula Mukama nti bona, ndireeta obubbiibi ku kifo kino n'o ku abo abakibbamu, ebigambo byonabyona eby'e kitabo kabaka wa Yuda ky'a somere: ¹⁷ kubanga banviireku ni bookyerya obubaani eri bakatonda abandi bansunguwalye n'o mulimu gwonagwona ogw'e ngalo gyabwe; obusungu bwange kyebuliva bubuubuukira ku kifo kino so tibulizikira. ¹⁸ Naye kabaka we Yuda abatumire okubuulya Mukama mutyo bwe mubba mumukoba nti atyo bw'atumula Mukama Katonda wa Isiraeri nti Olw'e bigambo by'owuliire, ¹⁹ kubanga Omwoyo gwo gubbaire mugondi weetoowaziirye mu maiso ga Mukama bw'owuliire bye natumwire ku kifo kino n'o ku abo abakibbamu, nga balifuuka amatongo n'ekiramo, n'okanula ebivaalo byo n'o kunga amaliga mu maiso gange; nzena nkuwuliire, bw'atumula Mukama. ²⁰ Bona, kyendiva nkukuŋaanya eri bazeizabo n'okuŋaanyizibwa mu magombe go mirembe, so n'a maiso go tegalibona bubbiibi bwonabwona bwe ndireeta ku kifo kino. Ni bairirya kabaka ebigambo.