¹ Manase yabbaire yaakamala emyaka ikumi n'aibiri bwe yatandikiire okufuga; n'afugira emyaka ataanu na itaanu mu Yerusaalemi: n'o maye eriina lye yabbaire Kefuziba. ² N'akola ebyabbaire mu maiso ga Mukama ebibbiibi ng'e by'e mizizo bwe biri eby'a b'a mawanga Mukama be yabbingire mu maiso g'a baana ba Isiraeri. ³ N'a zimba ate ebifo ebigulumivu Keezeekiya itaaye bye yazikiriirye; n'asimbira Baali ebyoto n'akola Asera nga Akabu kabaka wa Isiraeri bwe yakolere n'a sinza eigye lyonalyona ery'o mu igulu n'aliweererya. ⁴ N'azimba ebyoto mu nyumba ya Mukama, Mukama gye yakobereku nti Mu Yerusaalemi mwe nditeeka eriina lyange. ⁵ Era n'azimbira eigye lyonalyona ery'o mu igulu ebyoto mu mpya eibiri egy'e nyumba ya Mukama. ⁶ N'abitya mu musyo mutaane we, n'akola eby'obufumu n'abba n'e by'o bulogo, n'a yabanga eri abo abaliku emizimu n'a balogo: n'akola obubiibi bungi mu maiso ga Mukama okumusunguwalya. ⁷ N'asimba ekifaananyi ekyole ekya Asera kye yakoleire mu nyumba Mukama gye yakobereku Dawudi n'o Sulemaani mutaane we nti Mu nyumba eno no mu Yerusaalemi kye neerobozerye mu bika byonabyona ebya Isiraeri mwe nditeeka eriina lyange emirembe gyonagyona: ⁸ so tindiwabya ate bigere bya Isiraeri okuva mu nsi gye nawaire bazeiza banyu; kyooka bwe bwebekuumanga okukola nga byonabyona bwe biri bye mbalagiire era ng'a mateeka gonagona bwe gali omwidu wange Musa ge yabalagiire. ⁹ Naye ni batawulira: Manase n'abasendasenda okukola ebibbiibi okusinga amawanga bwe gaakolanga Mukama ge yazikiriirye mu maiso g'a baana ba Isiraeri. ¹⁰ Awo Mukama n'atumula mu baidu be banabbi nti ¹¹ Kubanga Manase kabaka wa Yuda okolere eby'e mizizo bino era akolere obubiibi okusinga byonabyona Abamoli bye baakolere abamusookere, era ayonooneserye ne Yuda n'e bifaananyi bye: ¹² Mukama Katonda wa Isiraeri kyava atumula nti bona, ndeeta ku Yerusaalemi n'e Yuda obubbiibi obwekankana awo, buli eyabuwuliranga n'o kwanamirira amatu ge gombiri ni gaanamirira. ¹³ Era ndireega ku Yerusaalemi omuguwa ogw'e Samaliya n'eibbaale erigera ery'e nyumba ya Akabu: era ndisangula Yerusaalemi ng'o muntu bw'a sangula esaani, ng'a gisangula era ng'a gifundika. ¹⁴ Era ndisuula ekitundu ekifiikirewo eky'o busika bwange ne mbagabula mu mukono gw'abalabe baabwe; kale balifuuka muyigo era munyago eri abalabe baabwe bonabona; ¹⁵ kubanga bakolere ebiri mu maiso gange ebibbiibi ni bansunguwalya okuva ku lunaku bazeiza babwe kwe baaviiriire mu Misiri ne watyanu. ¹⁶ Era ate Manase n'ayiwa omusaayi ogubulaku musango, mungi inu okutuusya lwe yaizwirye Yerusaalemi eruuyi n'e ruuyi; obutateekaku kwonoona kwe kwe yayonooneserye Yuda ng'a kola ebyabbaire mu maiso ga Mukama ebibbiibi. ¹⁷ Era ebikolwa ebindi byonabyona ebya Manase ne byonabyona bye yakolere n'o kwonoona kwe kwe yayonoonere tibyawandiikiibwe mu kitabo eky'e by'omumirembe gya bakabaka ba Yuda? ¹⁸ Manase ni yeekungira wamu na bazeizabe n'aziikibwa mu lusuku olw'o ku nyumba ye iye, mu lusuku lwa Uza: Amoni mutaane we n'afuga mu kifo kye. ¹⁹ Amoni yabbaire yaakamala emyaka abiri na ibiri bwe yatandikire okufuga; n'afugira emyaka ibiri mu Yerusaalemi: no maye eriina lye yabbaire Mesulemesi muwala wa Kaluzi ow'e Yotuba. ²⁰ N'akola ebyabbaire mu maiso ga Mukama ebibbiibi nga Manase itaawe bwe yakolere: ²¹ N'atambulira mu ngira yonayona itaaye gye yatambuliiremu n'aweererya ebifaananyi itaaye bye yaweereirye n'abisinza: ²² n'ava ku Mukama Katonda wa bazeizabe n'atatambulira mungira ya Mukama. ²³ Abaidu ba Amoni ne bamwekobaana ne baitira kabaka mu nyumba ye iye. ²⁴ Naye abantu ab'o mu nsi ni baita abo bonabona abeekobaine kabaka Amoni; abantu ab'o mu nsi ni bafuula Yosiya mutaane we kabaka mu kifo kye. ²⁵ Era ebikolwa ebindi byonabyona ebya Amoni bye yakolere tibyawandiikiibwe mu kitabo eky'e by'omumirembe gya bakabaka ba Yuda? ²⁶ N'aziikibwa mu magombe mu lusuku lwa Uza: Yosiya mutaane we n'afuga mu kifo kye.