¹ Mu biseera ebyo Keezeekiya n'alwala kumpi n'o kufa. Isaaya nabbi mutaane wa Amozi n'aiza gy'ali n'amukoba nti Teekateeka enyumba yo; kubanga oyaba kufa so toyaba okulama. ² Awo n'akyukirya amaiso ge ku kisenge n'amwegayirira Mukama ng'atumula nti ³ ijukira atyanu, ai Mukama, nkwegayiriire, bwe natambuliranga mu maiso go n'a mazima n'o mwoyo ogwatuukiriire, ni nkola ebiri mu maiso go ebisa. Keezeekiya n'a kunga inu amaliga. ⁴ Awo olwatuukukire Isaaya ng'akaali kufuluma okwaba mu luuyi lw'e kibuga olwa wakati, ekigambo kya Mukama ni kimwizira nti ⁵ Irayo okobe Keezeekiya omulangira w'a bantu bange nti Atyo bw'atumula Mukama Katonda wa Dawudi Zeizawo nti mpuliire okusaba kwo, mboine amaliga go: bona, ndikuwonya : ku lunaku olw'o kusatu kw'oliniinira mu nyumba ya Mukama. ⁶ Era ndyongera ku naku gyo emyaka ikumi n'a itaanu; era ndirokola iwe n'e kibuga kino mu mukono gwa kabaka w'e Bwasuuli; era ndirwanirira ekibuga kino ku lwange nze n'o ku bw'o mwidu wange Dawudi. ⁷ Awo Isaaya n'atumula nti mwirire ekitole ky'e itiini. Ni bakiirira ni bakiteeka ku iyute, n'awona. ⁸ Awo Keezeekiya n'akoba Isaaya nti kaliwaina akabonero nga Mukama alimponya era nga ndiniina mu nyumba ya Mukama ku lunaku olw'o kusatu? ⁹ Isaaya n'atumula nti kano niiko akalibba akabonero gy'oli akava eri Mukama nga Mukama alikola ekyo ky'atumwire: ekiwolyo kyatambula mu maiso amadaala ikumi, oba kyairayo enyuma amadaala ikumi? ¹⁰ Awo Keezeekiya n'airamu nti ekiwolyo okwika amadaala ikumi kigambo kyangu: Bbe, naye ekiwolyo kiireyo enyuma amadaala ikumi, ¹¹ Isaaya nabbi n'akungirira Mukama: n'airyayo enyuma ekiwolyo eibbanga ery'a madaala eikumi, ge kyabbaire kiikireku ku madaala ga Akazi. ¹² Mu biseera ebyo Berodakubaladani mutaane wa Baladani kabaka w'e Babulooni n'aweererya Keezeekiya ebbaluwa n'e kirabo: kubanga yawuliire Keezeekiya bwe yabbaire alwaire. ¹³ Awo Keezeekiya n'abawulira n'abalaga enyumba yonayona ey'e bintu bye eby'o muwendo omungi, efeeza n'e zaabu n'e by'a kaloosa n’a mafuta ag'o muwendo omungi n'e nyumba ey'e byokulwanisya bye ne byonabona ebyabonekere mu by'o bugaiga bwe: Wabula kintu mu nyumba ye waire mu matwale ge gonagona Keezeekiya ky'ataabalaga. ¹⁴ Awo Isaaya nabbi n'aiza eri kabaka Keezeekiya n'a mukoba nti Abasaiza bano batumwire ki? era baviire waina okwiza gy'oli? Keezeekiya n'atumula nti Bava mu nsi ey'e wala mu Babulooni. ¹⁵ N'atumula nti baboine ki mu nyumba yo? Keezeekiya n'airamu nti byonabyona ebiri mu nyumba yange babiboine: wabula kintu mu by'o bugaiga bwange kye ntabalagire. ¹⁶ Isaaya n'akoba Keezeekiya nti wulira ekigambo kya Mukama. ¹⁷ Bona, enaku giiza byonabyona ebiri mu nyumba yo n'ebyo bazeizabo bye bagisire okutuusya watyanu lwe biritwaliibwa e Babulooni: wabula kintu ekirisigala, bw'atumula Mukama. ¹⁸ Era balitwala n'o ku bataane bo abalikuvaamu b'olizaala: kale balibba balaawe mu lubiri lwa kabaka w'e Babulooni. ¹⁹ Awo Keezeekiya n'akoba Isaaya nti Ekigambo kya Mukama ky'otumwire kisa. Era n'atumula nti ti niiwo awo, emirembe n'a mazima bwe byabbangawo ku mirenbe gyange? ²⁰ Era ebikolwa ebindi byonabyona ebya Keezeekiya n’a maani ge gonagona era bwe yasimire ekidiba n'olusalosalo n’aleeta amaizi mu kibuga tibyawandiikiibwe mu kitabo eky'e byomumirembe gya bakabaka ba Yuda? ²¹ Keezeekiya n'agonera wamu n'a bazeizabe: Manase mutaane we n'afuga mu kifo kye.