¹ Awo olwatuukire kabaka Keezeekiya bwe yakiwuliire n'a kanula ebivaalo bye ni yeesiiga eikoke n'a yingira mu nyumba ya Mukama. ² N'atuma Eriyakimu eyabbaire saabakaaki n'o Sebuna omuwandiiki n'a bakaire ab'o ku bakabona nga bavaire ebinyakinyaki eri Isaaya nabbi mutaane wa Amozi. ³ Ne bamukoba nti atyo bw'atumula Keezeekiya nti Olunaku luno lunaku lwo buyinike era lw'o kunenyezebwa era lwo kuvumibwa: kubanga abaana batuukire okuzaalibwa, so wabula maani g'o kuzaala. ⁴ Koizi Mukama Katonda wo yawulira ebigambo byonabona ebya Labusake kabaka w'e Bwasuli mukama we gwe yatumire okuvuma Katonda omulamu, era n'anenya ebigambo Mukama Katonda wo by'a wuliire: kale yimusya okusaba kwo ku lwabo abasigaire. ⁵ Awo abaidu ba kabaka Keezeekiya ne baiza eri Isaaya. ⁶ Awo Isaaya n'abakoba nti mutyo bwe mubba mukoba mukama wanyu nti atyo bw'atumula Mukama nti totya bigambo by'owuliire abaidu ba kabaka w'e Bwasuli kye banzivoire. ⁷ Bona, nateekere omwoyo mu iye, kale yawulira ekigambo n'airayo mu nsi ye; nzena ndimugwisya n'e kitala mu nsi ye iye. ⁸ Awo Labusake n'airayo n'asanga kabaka w'e Bwasuli ng'a lwana n'o Libuna: kubanga yabbaire awuliire ng'aviire ku Lakisi. ⁹ Awo bwe yawuliire nga batumula ku Tiraka kabaka w'e Esiyoopya nti bona, atabaire okulwana naiwe: n'atumira ate Keezeekiya ababaka ng'a tumula nti ¹⁰ Mutyo bwe mubba mukoba Keezeekiya kabaka we Yuda nti Katonda wo gwe weesiga takubbeyanga ng'atumula nti Yerusaalemi tekirigabulwa mu mukono gwa kabaka w'e Bwasuli. ¹¹ Bona, wawuliire bakabaka b'e Bwasuli bye baakolere ensi gyonagyona nga bagizikiririirye dala, wenw olirokoka? ¹² Bakatonda b'a mawanga babalokoire abo bazeiza bange be bazikiriirye, Gozani n'o Kalani n'o Lezefu n'a baana ba Edeni ababbaire mu Terasali? ¹³ Kabaka w'e Kamasi ali waina n'o kabaka w'e Alupadi n'o kabaka w'e kibuga Sefavayimu, ow'e Kena n'ow'e Yiva? ¹⁴ Awo Keezeekiya n'atoola ebbaluwa mu mukono gw'a babaka n'agisoma: awo Keezeekiya n'ayambuka mu nnyumba ya Mukama, n'agyanjululya mu maiso ga Mukama. ¹⁵ Awo Keezeekiya n'asaba mu maiso ga Mukama n'atumula nti Ai Mukama Katonda wa Isiraeri, atyama ku bakerubi, iwe Katonda, niiwe wenka, ow'o bwakabaka bwonabwona obw'e nsi; niiwe wakolere eigulu n'e nsi. ¹⁶ Tega ekitu kyo, ai Mukama, owulire; zibula amaiso go; ai Mukama, obone: owulire ebigambo bya Senakeribu by'a mutumire okuvuma Katonda ogomdi. ¹⁷ Mazima, Mukama, bakabaka b'e Bwasuli bazikiriirye amawanga n'e nsi gyabwe, ¹⁸ era baasuula bakatonda baabwe mu musyo: kubanga tebabaire bakatonda naye mulimu gwe mikono gya bantu, emisaale n'a mabbaale; kyebaaviire babazikirirya. ¹⁹ Kale, ai Mukama Katonda waisu, tulokole, nkwegayiriire, mu mukono gwe obwakabaka bwonabwona obw'e nsi bamanye nga niiwe Mukama Katonda, niiwe wenka. ²⁰ Awo Isaaya mutaane wa Amozi n'atumira Keezeekiya ng'atumula nti Atyo bw'atumula Mukama Katonda wa Isiraeri nti Kubanga onsabire olwa Senakeribu kabaka w'e Bwasuli, nkuwuliire. ²¹ Kino niikyo ekigambo Mukama ky'atumwire ku iye: nti Omuwala wa Sayuuni atamanyanga musaiza akunyoomere, akusekereire; omuwala wa Yerusaalemi akusisiikiirye omutwe. ²² Yani gw'o vumire gw'o voire? Yani gw'o gulumiziiryeku eidoboozi lyo n'o yimusya waigulu amaiso go? ku Mutukuvu owa Isiraeri. ²³ Ovumiire Mukama mu babaka bo n'otumula nti Niinire ku ntiko y'ensozi n'olufulube lw'a magaali gange, ku njuyi egy'omunda egya Lebanooni; era nditema emivule gyaku emiwanvu n'emiberosi gyaku egisinga obusa: era ndiyingira mu kisulo kyaku ekikomereireyo, mu kibira eky'enimiro yaaku engimu. ²⁴ Nsimire, nywire amaizi ag'a banaigwanga, era ndikalya n'e bigere byange emiiga gyonagyona egy'e Misiri: ²⁵ Tewawuliire bwe nakikolere eira, ni nkibbumba okuva mu biseera eby'e ira? Atyanu nkituukiriirye obbe w'o kuzikirirya bibuga ebiriku enkomera n'obifuula ebitiinde eby'a matongo. ²⁶ Ababityamamu kyebaviire babba n'a maani amatono, ni batekemuka ni bakeŋentererwa; ne babba ng'e isubi ery'o mu itale era ng'o mwido omubisi, ng'e isubi eriri waigulu ku nyumba, era ng'e ŋaanu ekalire nga ekaali kukula. ²⁷ Naye maite okutyama kwo n'o kufuluma kwo n'o kuyingira kwo n'o bw'ondalukira. ²⁸ Kubanga ondalukira era kubanga eisukuti lyo liniinire mu matu gange, kyendiva nteeka eidobo lyange mu nyindo gyo n'olukoba lwange mu munwa gwo, ni nkwiriryayo mu ngira gye wafulumiremu. ²⁹ Era kano niiko akaabba akabonero gy'oli: mulirya mu mwaka guno ekyo ekimera kyonka, n'o mu mwaka ogw'okubiri ekyo ekikivaamu okuloka; n'o mu mwaka ogw'o kusatu musige mukungule musimbe ensuku egy'e mizabbibu mulye ku bibala byamu. ³⁰ Awo ekitundu ekifiikirewo ekiwonere ku nyumba ya Yuda balisimba emizi wansi ne babala ebibala waigulu. ³¹ Kubanga mu Yerusaalemi muliva ekitundu ekifikifiikirewo, n'o ku lusozi Sayuuni abo abaliwona: Eiyali bwa Mukama bulituukirirya ekyo. ³² Mukama kyava atumula ku kabaka w'e Bwasuli nti Talituuka ku kibuga kino, so talirasaayo kasaale, so talikyolekerya n'e ngabo, so talikituumaku kitiinde. ³³ Mu ngira mwe yaiziire omwo mw'aliirirayo, so talituuka ku kibuga kino, bw'atumula Mukama. ³⁴ Kubanga ndirwanirira ekibuga kino okukirokola ku bwange nze n'o ku bw'o mwidu wange Dawudi. ³⁵ Awo olwatuukire obwire obwo malayika wa Mukama n'afuluma n’aita mu lusiisira olw'Abasuuli kasiriivu mu emitwalo munaana mu nkumi itaanu: abantu bwe bagolokokere Amakeeri mu makeeri, bonabona, babbaire mirambo gya bafu. ³⁶ Awo Senakerebu kabaka w'e Bwasuli n'avaayo n'ayaba n'airayo, n'abba e Nineeve. ³⁷ Awo olwatuukire bwe yabbaire ng'a sinzirya mu isabo lya Nisuloki katonda we, Adulamereki n'o Salezeri ni bamwita n'e kitala: ni bairukira mu nsi y'e Alalati. Esaladoni mutaane we n'afuga mu kifo kye.