¹ Awo olwatuukire mu mwaka ogw'okusatu ogwa Koseya mutaane wa Era kabaka wa Isiraeri Keezeekiya mutaane wa Akazi kabaka wa Yuda n'atandika okufuga. ² Yabbaire yaakamala emyaka abiri na itaanu bwe yatandikire okufuga; n'afugira emyaka abiri mu mwenda mu Yerusaalemi: n'o maye eriina lye yabbaire Abi muwala wa Zekaliya. ³ N'akola ebyabbaire mu maiso ga Mukama ebisa nga byonabona bwe byabbaire itaaye Dawudi bye yakolanga. ⁴ Yatoirewo ebifo ebigulumivu n'a menya empango n'atemera dala Baasera: n'a menyamenya omusota ogw'e kikomo Musa gwe yakolere; kubanga okutuusya mu biseera ebyo abaana ba Isiraeri nga bagwoterererya obubaani; n'agweta nti kikomo bukomo. ⁵ Yeesigire Mukama Katonda wa Isiraeri; awo oluvanyuma lwe ni watabba amufaanana mu bakabaka bonabona abe Yuda so ti mu abo abaamusookere. ⁶ Kubanga yeegaitire ne Mukama, tiyalekere kumusengererya naye n'akwata ebiragiro bya Mukama bye yalagiire Musa. ⁷ Awo Mukama n'abbanga naye; buli gye yafulumanga yonayona n'abonanga omukisa: n'ajeemera kabaka w'e Bwasuli n'atamuweererya. ⁸ N'akubba Abafirisuuti okubatuusya e Gaza n'e nsalo gyakyo, ekigo eky'omukuumi era n'ekibuga ekiriku enkomera. ⁹ Awo olwatuukire mu mwaka ogw'okuna ogwa kabaka Keezeekiya, niigwo mwaka ogw'o musanvu ogwa Koseya mutaane we Era kabaka we Isiraeri Salumaneseri kabaka w'e Bwasuli n'atabaala Samaliya n'akizingizya. ¹⁰ Awo emyaka isatu bwe gyabitirewo ni bakimenya: mu mwaka ogw'o mukaaga ogwa Keezekiya, niigwo mwaka ogw'o mwenda ogwa Koseya kabaka we Isiraeri, Samaliya ni kimenyebwa. ¹¹ Awo kabaka w'e Bwasuli n'atwalira dala Isiraeri e Bwasuli, n'abateeka mu Kala n'o mu Kaboli ku mwiga ogw'e Gozani, n'o mu bibuga eby'Abameedi: ¹² kubanga tibaagondeire idoboozi lya Mukama Katonda waabwe, naye ni basobya endagaanu ye, byonabyona Musa omwidu wa Mukama bye yalagiire, ne bataikirirya kubiwulira waire okubikola. ¹³ Awo mu mwaka ogw'e ikumi n'e ina ogwa kabaka Keezeekiya Senakeribu kabaka w'e Bwasuli n'atabaala ebibuga byonabyona ebiriku enkomera ebye Yuda, n'abimenya. ¹⁴ Awo Keezeekiya kabaka wa Yuda n'atumira kabaka w'e Bwasuli e Lakisi ng'atumula nti Nyonoonere; irayo onveeku: byewansalira nabikiriirya. Kabaka w'e Bwasuli n'asalira Keezeekiya kabaka we Yuda efeeza talanta bisatu n'e zaabu talanta asatu. ¹⁵ Era Keezeekiya n'a muwa efeeza yonayona eyabonekere mu nyumba ya Mukama n'o mu by'o bugaiga eby'o mu nyumba ya kabaka. ¹⁶ Mu biseera ebyo Keezeekiya n'a sala ezaabu ku njigi gye yeekaalu ya Mukama n'o kumpango Keezeekiya kabaka we Yuda gye yabbaire abikireku, n'agiwa kabaka w'e Bwasuli. ¹⁷ Awo kabaka w'e Bwasuli n'atuma Talutani n'o Labusalisi ne Labusake ng'a yema e Lakisi eri kabaka Keezeekiya, nga balina eigye lingi, e Yerusaalemi. Ni batabaala ni baiza e Yerusaalemi. Awo nga batabaire ni baiza ne bemerera awali olusalosalo olw'e kidiba ekyengulu ekiri mu luguudo olw'e nimiro y'o mwozi w'e ngoye. ¹⁸ Awo bwe babitire kabaka, ni wafuluma eri ibo Eriyakimu mutaane wa Kirukiya eyabbaire saabakaaki n'o Sebuna omuwandiiki n'o Yowa mutaane wa Asafu omwijukirya. ¹⁹ Awo Labusake n'akoba nti Mukobe Keezeekiya nti Atyo bw'atumula kabaka omukulu kabaka w'e Bwasuli nti Bwesige ki buno bwe weesiga? nti ²⁰ Otumula, naye bigambo by'o mu munwa bunwa, nti Waliwo amagezi N'a maani ag'o kulwana: Yani gwe weesiga n'o kujeema n'o njeemera? ²¹ bona weesiga omwigo ogw'o lugada luno olwatiki, niiyo Misiri; omuntu bw'e yesigika okwo, lwayingira mu mukono gwe ni lugusumita: atyo Falaawo kabaka w'e Misiri bw'ali eri abo bonabona abamwesiga. ²² Naye bwe mwankoba nti twesiga Mukama Katonda waisu: ti niiye oyo Keezeekiya gw'atoleirewo ebifo bye ebigulumivu n'ebyoto bye, n'akoba Yuda n'o Yerusaalemi nti mwasinziryanga mu maiso g'e kyoto kino mu Yerusaalemi? ²³ Kale, nkwegayiriire, muwe emisingo mukama wange kabaka w'e Bwasuli, nzena nakuwa embalaasi enkumi ibiri, iwe ku bubwo bwewasobola okugiteekaku abagyebagala. ²⁴ Kale wasobola otya okukyusya amaiso g'o mwami omumu ku abo abasinga obutobuto ku baidu ba mukama wange, ni weesiga Misiri olw'a magaali n'a beebagala embalaasi. ²⁵ Nze ntabaire ekifo kino atyanu awabula Mukama okukizikirirya? Mukama niiye yankobere nti tabaala ensi eno ogizikirirye. ²⁶ Awo Eriyakimu mutaane wa Kirukiya n'o Sebuna n'o Yowa ni bakoba Labusake nti nkwegayiriire, tumula n'a baidu b'o mu lulimi Olusuuli; kubanga tulutegeera: so totumula naife mu lulimi olw'Abayudaaya mu matu g'a bantu abali ku bugwe. ²⁷ Naye Labusake n'a bakoba nti Mukama wange yantumire mukama wo naiwe okutumula ebigambo bino? tantumiire basaiza abatyama ku bugwe, okulya amaizi gabwe ibo n'o kunywira amaanyi gabwe ibo wamu naimwe? ²⁸ Awo Labusake n'ayemerera n'atumulira waigulu n'e idoboozi inene mu lulimi olw'Abayudaaya n'atumula nti muwulire ekigambo kya kabaka omukulu kabaka w'e Bwasuli. ²⁹ Atyo bw'atumula kabaka nti Keezeekiya tababbeeyanga, kubanga tasobola kubalokola mu mukono gwe: ³⁰ so Keezeekiya tabeesizanga Mukama ng'atumula nti Mukama talireka kutulokola, n'e kibuga kino tekirigabulwa mu mukono gwa kabaka w'e Bwasuli. ³¹ Temuwulisisyanga Keezeekiya: kubanga atyo bw'atumula kabaka w'e Bwasuli nti mutabagane nanze mufulume gye ndi; ni mulya buli muntu ku muzabbibu gwe na buli muntu ku musaale gwe, ni munywa buli muntu amaizi ag'o mu kidiba kye iye; ³² okutuusya lwe ndiiza ni mbatwalira dala mu nsi efaanana ensi yanyu, ensi ey'e ŋaanu n'o mwenge, ensi ey'e migaati n'e nsuku egy'e mizabbibu, ensi ey'a mafuta aga zeyituuni n'o mubisi gw'e njoki, mubbe balamu muleke okufa: so timuwulisisyanga Keezeekiya bw'alibasendasenda ng'atumula nti Mukama alitulokola. ³³ Waliwo katonda yenayena ku bakatonda b'a mawanga eyabbaire alokoire ensi ye mu mukono gwa kabaka w’e Bwasuli? ³⁴ Bali waina bakatonda b’e Kamasi n'ab'e Alupadi? bali waina ba bakatonda b’e Sefavayimu, ab'e Kena, n'ab'e Yiva? Balokole Samaliya mu mukono gwange? ³⁵ Baani ku bakatonda bonabona ab'e nsi abalokola ensi yaabwe mu mukono gwange, Mukama alokole Yerusaalemi mu mukono gwange? ³⁶ Naye abantu ni basirika ni batamwiramu kigambo: kubanga ekiragiro kya kabaka kyabbaire kityo nti temumwiramu. ³⁷ Awo Eriyakimu mutaane wa Kirukiya eyabbaire saadaaka n'o Sebuna omuwandiiki n'o Yowa mutaane wa Asafu omwijukirya ni baiza eri Keezeekiya nga bakanwire ebivaalo byabwe, ni bamukobera ebigambo bya Labusake.