¹ Mu mwaka ogw'e ikumi n'e ibiri ogwa Akazi kabaka wa Yuda Koseya mutaane we Era n'atandika okufuga Isiraeri mu Samaliya, n'afugira emyaka mwenda. ² N'akola ebyabbaire mu maiso ga Mukama ebibbiibi, era yena nga tabekankana bakabaka ba Isiraeri abaamusookere. ³ Salumaneseri kabaka w’e Bwasuli n'amutabaala; Koseya n'afuuka mwidu we n'amuleeteranga ebirabo. ⁴ kabaka w'e Bwasuli n'abona olukwe mu Koseya; kubanga yabbaire atumiire So kabaka w'e Misiri ababaka, n'atawa kabaka w'e Bwasuli ekirabo nga bwe yakolanga buli mwaka: kabaka w'e Bwasuli kyeyaviire amuteeka mu ikomera n'amusiba. ⁵ Awo kabaka w'e Bwasuli n'atabaala ensi yonayona n'ayambuka e Samaliya n'akizingirizya emyaka isatu. ⁶ Mu mwaka ogw'omwenda ogwa Koseya kabaka w'e Bwasuli n'amenya Samaliya, n'atwalira dala Isiraeri e Bwasuli, n'abateeka mu Kala n'o mu Kaboli ku mwiga ogw'e Gozani n'o mu bibuga eby'Abameedi. ⁷ Awo ni kibba kityo kubanga abaana ba Isiraeri babbaire boonoonere Mukama Katonda waabwe eyabatoire mu nsi y'e Misiri okuva wansi w'o mukono gwa Falaawo kabaka w'e Misiri, ni batya bakatonda abandi, ⁸ ne batambulira mu mateeka g'a mawanga Mukama ge yabbingire mu maiso g'a baana ba Isiraeri n'o mu ga bakabaka ba Isiraeri, ge bateekere. ⁹ Era abaana ba Isiraeri ni bakolanga kyama ebigambo ebitali bisa eri Mukama Katonda waabwe, ne beezimbira ebifo ebigulumivu mu bibuga byabwe byonabyona, mu kigo eky'o mukuumi era n'o mu kibuga ekiriku enkomera. ¹⁰ Era ni beesimbira empango ni Baasyera ku buli lusozi oluwanvu ne wansi wa buli musaale omubisi: ¹¹ ni booterereryanga eyo obubaani ku bifo byonabyona ebigulumivu ng'a mawanga bwe gaakolanga Mukama ge yatoirewo okubasooka; ni bakolanga eby'ekyeju okusunguwalya Mukama: ¹² ni baweereryanga ebifaananyi Mukama bye yabakobereku nti Timukolanga kigambo kino. ¹³ Era yena Mukama n'ategezyanga Isiraeri ne Yuda mu mukono gwa buli nabbi n'ogwa buli muboni ng'atumula nti Mukyuke muve mu mangira ganyu amabbiibi mukwatenga ebiragiro byange n'amateeka gange ng'amateeka gonagona bwe gali ge nalagiire bazeiza banyu era ge nabaweereirye mu mukono gw'abaidu bange banabbi. ¹⁴ Era naye ne bataganya kuwulira naye ne bakakanyalyanga eikoti lyaabwe ng'eikoti lya bazeiza babwe abataikiriirye Mukama Katonda waabwe. ¹⁵ Ni bagaananga amateeka ge n'e ndagaanu ye gye yalagaine na bazeiza baabwe n'ebyo bye yategeezerye gye bali; ni basengeereryanga ebirerya ni bafuukanga be birerya, ne basengereryanga amawanga agabeetooloire, Mukama ge yabakuutiireku baleke okukola okubafaanananga. ¹⁶ Awo ni baleka ebiragiro byonabyona ebya Mukama Katonda waabwe, ne beekolera ebifaananyi ebisaanuukye, enyana ibiri, ne bakola Asera, ne basinzanga eigye lyonalyona ery'o mu igulu, ni baweereryanga Baali. ¹⁷ Ne babityanga abaana baabwe ab'o bwisuka n'ab'obuwala mu musyo, ne bakola eby'obufumu n'e by'obulogo, ni beetunda okukola ebyabbaire mu maiso ga Mukama ebibbiibi, okumusunguwalya. ¹⁸ Mukama kyeyaviire asunguwalira inu Isiraeri n'abatoola mu maiso ge: wabula eyasigairewo wabula ekika kya Yuda kyonka. ¹⁹ Era ne Yuda ni batakwatanga biragiro bya Mukama Katonda waabwe, naye ni batambuliranga mu mateeka ga Isiraeri ge baateekere. ²⁰ Mukama n'agaana eizaire lyonalyona erya Isiraeri n'ababoonyaboanyanga n'abagabula mu mukono gw'a banyagi okutuusya lwe yabbingire mu maiso ge. ²¹ Kubanga yakanwiremu Isiraeri okubatoola ku nyumba ya Dawudi; ni bafuula Yerobowaamu mutaane wa Nebati kabaka: Yerobowaamu n'abbinga Isiraeri obutasengererya Mukama, n'aboonoonesya okwonoona okunene. ²² Awo abaana ba Isiraeri ni batambuliranga mu bibbiibi byonabyona ebya Yerobowaamu bye yakolere; tebabivangamu; ²³ okutuusya Mukama lwe yatoire Isiraeri mu maiso ge nga bwe yatumwire n'o mukono gw'a baidu be bonabona banabbi. Awo Isiraeri na batwalirwa dala okuva mu nsi yaabwe mu Bwasuli ne watyanu. ²⁴ Awo kabaka w'e Bwasuli n'aleeta abantu ng'abatoola e Babulooni n'o Kusa n'o Ava n'o Kamasi n'o Sefavayimu, n'abateeka mu bibuga eby'e Samaliya mu kifo ky'a baana ba Isiraeri: ni balya Samaliya ni batyama mu bibuga byayo. ²⁵ Awo olwatuukire bwe baasookere okutyama omwo ni batatya Mukama: Mukama kyeyaviire asindika mu ibo empologoma ni gibaitaku abamu. ²⁶ Kyebaaviire bakoba kabaka w'e Bwasuli nga batumula nti Amawanga ge watwaliire dala n'obateeka mu bibuga eby'e Samaliya tibamaite mpisa ya Katonda ow'o mu nsi: kyeyaviire asindika mu ibo empologoma, era, bona, gibaita kubanga tibamanite mpisa ya Katonda ow'o mu nsi. ²⁷ Awo kabaka w'e Bwasuli n'alagira ng'a tumula nti mutwaleeyo omumu ku bakabona be mwatoireyo, baabe babbe eyo, abeegeresye empisa ya Katonda ow'o mu nsi. ²⁸ Awo omumu ku bakabona be batoire mu Samaliya n'aiza n'abba e Beseri n’abegeresya bwe kibagwanira okutyanga Mukama. ²⁹ Naye buli igwanga ni beekoleranga bakatonda baabwe ibo ni babateeka mu nyumba egy'e bifo ebigulumivu Abasamaliya bye babbaire bakolere, buli igwanga mu bibuga byabwe mwe babbaire. ³⁰ Abasaiza ab'e Babulooni ne bakola Sukosubenosi, abasaiza ab'e Kuusi ni bakola Nerugali, abasaiza ab'e Kamasi ni bakola Asima, ³¹ Abavi ni bakola Nibukazi n'o Talutaki, Abasefavayimu ni bookyeryanga abaana baabwe mu musyo eri Adulamereki n'o Anamereki, bakatonda ba Sefavayimu. ³² Awo ni batyanga Mukama ni beeyawulira bakabona b'ebifo ebigulumivu nga babatoola mu ibo beene, abaabaweerangayo saadaaka mu nyumba egy'e bifo ebigulumivu. ³³ Ne batyanga Mukama, ne baweereryanga bakatonda baabwe ibo ng'e ngeri bwe yabbaire ey'a mawanga ge batooleibwemu okutwalibwa. ³⁴ Baakola na buli atyanu ng'e mpisa egy'e ira bwe gyabbaire: tibaatyanga Mukama so tebaakolanga ng'a mateeka gaabwe bwe gabbaire waire nga bwe baalagiirwe waire ng'e iteeka n'e biragiro bwe biri Mukama bye yalagiire abaana ba Yakobo gwe yatuumire Isiraeri; ³⁵ Mukama gwe yabbaire alagaine naye endagaanu n'a bakuutira ng'a tumula nti temutyanga bakatonda abandi, so temubakutamiranga, so temubaweereryanga, so temuwangayo saadaaka eri ibo: ³⁶ naye Mukama eyabatoire mu nsi y'e Misiri n'a maani amangi n'o mukono ogwagoloilwe oyo gwe mubbanga mutya era oyo gwe mubbanga mukutamira, era eri oyo gwe mubbanga muwa saadaaka: ³⁷ n'a mateeka ne bye mwalagiirwe ne tawuleti n'e kiragiro kye yabawandiikire, mwabikwatanga okubikola enaku gyonagyona; so timutyanga bakatonda abandi: ³⁸ n'e ndagaanu gye ndagaine naimwe timugyerabiranga; so temutyanga bakatonda abandi: ³⁹ naye Mukama Katonda wanyu gwe mubbanga mutya; era iye yabalokolanga mu mukono gw'a balabe banyu bonabona. ⁴⁰ Era naye ni batawulira naye ni bakola ng'e mpisa yaabwe ey'e ira bwe yabbaire. ⁴¹ Awo amawanga gano ne gatya Mukama ne baweererya ebifaananyi byabwe ebyole; era n'a baana baabwe batyo n'a baana b'a baana baabwe, nga bazeiza babwe bwe baakolanga, batyo bwe baakolere na buli atyanu.