¹ Awo olwatuukire mu mwaka ogw'o mwenda kasooka alya obwakabaka, mu mwezi ogw'e ikumi, ku lunaku olw'e ikumi olw'o mwezi, Nebukaduneeza kabaka w’e Babulooni N'aiza, iye n'e igye lye lyonalyona, okulwana n'e Yerusaalemi, n'a siisira okukyolekera; ni bakizimbaku ebigo enjuyi gyonagyona. ² Awo ekibuga ni kizingizibwa okutuusya ku mwaka ogwa kabaka Zedeekiya ogw'e ikumi n'o gumu. ³ Ku lunaku olw'o mwenda olw'o mwezi ogw'okuna enjala n'e nyiikira mu kibuga, emere n'o kugota n'e gota abantu ab'o mu nsi eyo. ⁴ Awo ne bawagula mu kibuga ekituli, abasaiza bonabona abalwani ni bairukira bwire mu ngira ey'o mulyango oguli wakati wa babugwe babiri ogwaliraine olusuku lwa kabaka: (era Abakaludaaya babbaire nga bazingizirye ekibuga enjuyi gyonagyona:) kabaka n'abita mu ngira eya Alaba. ⁵ Naye eigye ery'Abakaludaaya ni basengererya kabaka ni bamutuukaku mu nsenyu egy'e Yeriko: eigye lye lyonalyona ni lisaansaana okumwabuliira. ⁶ Awo ne bawamba kabaka, ni bamwambukya ne bamuleeta eri kabaka w'e Babulooni e Libula; ni bamusalira omusango. ⁷ Ne baitira bataane ba Zedekiya mu maiso ge, ni bamutoolamu amaiso Zedekiya, ni bamusiba mu masamba, ne bamutwala e Babulooni. ⁸ Awo mu mwezi ogw'okutaanu ku lunaku olw'o musanvu olw'o mwezi, niigwo mwaka ogw'e ikumi n'o mwenda ogwa kabaka Nebukaduneeza kabaka w’e Babulooni, Nebuzaladaani omukulu w'a bambowa omwidu wa kabaka w'e Babulooni n'aiza e Yerusaalemi: ⁹ n'a yokya enyumba ya Mukama n'e nyumba ya kabaka; n'e nyumba gyonagyona egy'o mu Yerusaalemi, buli nyumba enene, n'agyokya omusyo. ¹⁰ N'eigye lyonalyona ery'Abakaludaaya ababbaire n'o mukulu w'a bambowa ni bamenyamenya bugwe wa Yerusaalemi enjuyi gyonagyona. ¹¹ N'a bantu abafiikirewo abasigaire mu kibuga n'abo abaasengukire abasengere kabaka w'e Babulooni n'abafiikirewo ku kibiina, abo Nebuzaladaani omukulu w'a bambowa n'a batwalira dala nga basibe. ¹² Naye omukulu w'a bambowa n'aleka ku abo abasigaire obwavu ab'o mu nsi eyo okulongoosyanga emizabbibu n'o kulimanga. ¹³ N'empango egy'e bikomo egyabbaire mu nyumba ya Mukama n'e ntebe n'e nyanza ey'e kikomo ebyabbaire mu nyumba ya Mukama Abakaludaaya ni babimenyamenya, ni batwala ebikomo byamu e Babulooni. ¹⁴ N'e ntamu n'e bisena n'e bisalaku ebisiriirya n'ebijiiko n'e bintu byonabyona eby'e bikomo bye baaweereryanga nabyo, ni babitoolayo. ¹⁵ N'ebyotereryo n'e bibya; ebyabbaire eby'e zaabu, zaabu yaaku, n'e byabbaire eby'e feeza, feeza yaaku, omukulu w'a bambowa n'abitoolayo. ¹⁶ Empango gyombiri, enyanza eimu, n'e ntebe Sulemaani gye yakoleire enyumba ya Mukama; ebikomo eby'e bintu bino byonabyona tebyagerekere. ¹⁷ Empango eimu obugulumivu bwayo emikono ikumi na munaana, n'o mutwe ogw'e kikomo gwabbaire ku niiyo: n'o mutwe obugulumivu bwagwo emikono isatu; omulimu omuluke n'a makomamawanga nga biri ku mutwe okwetooloola, byonabyona eby'e bikomo: N'e mpango ey'o kubiri Yabbaire n'e bifaanana ebyo, n'o mulimu omuluke. ¹⁸ Omukulu w'a bambowa n'akwata Seraya kabona asinga obukulu no Zefaniya kabona ow'o kubiri n'abaigali abasatu: ¹⁹ n'o mu kibuga n'atoolamu omwami eyakuliire abasaiza abalwani; n'a basaiza bataano ku abo ababonanga amaiso ga kabaka ababonekere mu kibuga; n'o muwandiiki omukulu w'e igye eyayolesyanga abantu ab'o mu nsi; n'a basaiza nkaaga ku bantu ab'o mu nsi eyo ababonekere mu kibuga. ²⁰ Awo Nebuzaladaani omukulu w'a bambowa n'abakwata n'a baleeta eri kabaka w'e Babulooni e Libula. ²¹ Kabaka w'e Babulooni n'abasumita n'abaitira e Libula mu nsi y'e Kamasi. Atyo Yuda n'a twalibwa nga musibe ng'a tooleibwe mu nsi ye. ²² N'a bantu abaasigaire mu nsi ye Yuda Nebukaduneeza kabaka w'e Babulooni be yalekere, abo n'a bafuulira Gedaliya mutaane wa Akikamu mutaane wa Safani omukulu waabwe. ²³ Awo abaami bonabona ab'e igye, ibo n'a basaiza baabwe, bwe baawuliire nga kabaka w'e Babulooni afiire Gedaliya omukulu, ni baiza eri Gedaliya e Mizupa, Isimaeri mutaane wa Nesaniya n'o Yokanani mutaane wa Kaleya n'o Seraya mutaane wa Tanukumesi Omunetofa n'o Yaazaniya omwana w'Omumaakasi, ibo n'abasaiza baabwe. ²⁴ Awo Gedaliya n'abalayirira ibo n'a basaiza baabwe n'abakoba nti Temutya olw'a baidu b'Abakaludaaya: mubbe mu nsi muweererye kabaka w'e Babulooni, kale mulibba kusa. ²⁵ Naye olwatuukire mu mwezi ogw'o musanvu Isimaeri mutaane wa Nesaniya mutaane wa Erisaama ow'e izaire lya kabaka n'aiza n'a basaiza ikumi wamu naye ni basumita Gedaliya n'o kufa n'afa, n'Abayudaaya n'Abakaludaaya ababbaire awamu naye e Mizupa. ²⁶ Awo abantu bonabona abatobato n'a bakulu n'a baami b'e igye ni bagolokoka ni baiza e Misiri: kubanga batiire Abakaludaaya. ²⁷ Awo olwatuukire mu mwaka ogw'a satu mu musanvu ogw'o kusibibwa kwa Yekoyakini kabaka we Yuda mu mwezi ogw'e ikumi n'e ibiri ku lunaku olw'o mwezi olw'abiri mu musanvu Evirumerodaki kabaka w'e Babulooni N'ayimusya omutwe gwa Yekoyakini kabaka we Yuda okumutoola mu ikomera mu mwaka mwe yalingiriire okufuga; ²⁸ n'a mukoba eby'e kisa n'agulumizya entebe ye okusinga bakabaka ababbaire awamu naye mu Babulooni. ²⁹ N'awaanyisya ebivaalo bye eby'o mu ikomera n'aliiranga emere mu maiso ge enaku gyonagyona egy'o bulamu bwe. ³⁰ N'okumuliisyanga kabaka n'a muwa ebya buliijo eby'o kumuliisyanga, buli lunaku omugabo gwalwo, enaku gyonagyona egy'o bulamu bwe.