¹ Mu mwaka ogw'abiri mu musanvu ogwa Yerobowaamu kabaka wa Isiraeri Azaliya mutaane wa Amaziya kabaka w'e Yuda n’atandika okufuga. ² Yabbaire yaakamala emyaka ikumi na mukaaga bwe yatandikiire okufuga; n'afugira emyaka ataanu na ibiri mu Yerusaalemi: n'o maye eriina lye yabbaire Yekoliya ow'e Yerusaalemi. ³ N'akola ebyabbaire mu maiso ga Mukama ebisa nga byonabyona bwe biri itaaye Amaziya bye yakolanga. ⁴ Naye ebifo ebigulumivu tebyatekeibwewo: abantu nga bakaali baweerayo sadaaka era nga bootererya obubaani ku bifo ebigulumivu. ⁵ Awo Mukama n'alwalya kabaka n'okugengewala n'agengewala okutuusya ku lunaku kwe yafiirire, n'agonanga mu nyumba eyayawirwe. Era Yosamu mutaane wa kabaka niiye yabbaire sabakaaki ng'asalira abantu ab'omu nsi emisango. ⁶ Era ebikolwa ebindi byonabyona ebya Azaliya ne byonabyona bye yakolere tebyawandiikiibwe mu kitabo eky' eby'omu mirembe gya bakabaka ba Yuda? ⁷ Azaliya ni yegonera wamu n'a bazeizabe; ni bamuziikira wamu n'a bazeizabe mu kibuga kya Dawudi: Yosamu mutaane we n'afuga mu kifo kye. ⁸ Mu mwaka ogw'asatu mu munaana ogwa Azaliya kabaka we Yuda Zekaliya mutaane wa Yerobowaamu n'afugira Isiraeri mu Samaliya emyezi mukaaga. ⁹ N'akola ebyabbaire mu maiso ga Mukama ebibbiibi nga bazeizabe bwe baakolanga: teyaviire mu bibbiibi bya Yerobowaamu mutaane wa Nebati bye yayonooneserye Isiraeri. ¹⁰ Awo Salumu mutaane wa Yabesi n'amwekobaana n'amusumitira mu maiso g'a bantu n'amwita, n'afuga mu kifo kye. ¹¹ Era ebikolwa ebindi byonabyona ebya Zekaliya, bona, byawandiikiibwe mu kitabo eky'e by'omu mirembe gya bakabaka ba Isiraeri. ¹² Ekyo niikyo kyabbaire ekigambo kya Mukama kye yskobere Yeeku nti bataane bo balituukya emirembe egy'okuna okutyama ku ntebe ya Isiraeri. Era ni kituukirira kityo. ¹³ Awo Salumu mutaane wa Yabesi n'atyama okufuga mu mwaka ogw'asatu mu mwenda ogwa Uziya kabaka wa Yuda; n'afugira eibbanga ery'o mwezi mu Samaliya. ¹⁴ Awo Menakemu mutaane wa Gaadi n'ayambuka ng'ava e Tiruza n'aiza e Samaliya n'asumitira Salumu mutaane wa Yabesi mu Samaliya, n'amwita n'afuga mu kifo kye. ¹⁵ Era ebikolwa ebindi byonabyona ebya Salumu n'okwekobana kwe kwe yeekobaine, bona, byawandiikiibwe mu kitabo eky'e by'omu mirembe gya bakabaka ba Isiraeri. ¹⁶ Awo Menakemu n'akubba Tifusa ne bonabona abakibbairemu, n'e nsalo gyakyo okuva e Tiruza: kubanga tebaamwigulirewo, kyeyaviire akikubba; abakali bonabona abakibbairemu ababbaire ebida n'ababbaaga. ¹⁷ Mu mwaka ogw'asatu mu mwenda ogwa Azaliya kabaka wa Yuda Menakemu mutaane wa Gaadi n'atandika okufuga Isiraeri, n'afugira emyaka ikumi mu Samaliya. ¹⁸ N'akola ebyabbaire mu maiso ga Mukama ebibbiibi enaku gye gyonagyona nga tava mu bibbiibi bya Yerobowaamu mutaane wa Nebati bye yayonooneserye Isiraeri: ¹⁹ Puli kabaka w'e Bwasuli n'atandika ensi; Menakemu n'awa Puli talanta gy'e feeza lukumi, omukono gwe gubbenga naye okunywezya obwakabaka mu mukono gwe. ²⁰ Menakemu n'asoloozya efeeza ku Isiraeri ku basaiza bonabonna abagaiga, ku buli musaiza feeza sekeri ataanu, okuwa kabaka w'e Bwasuli. Awo kabaka w'e Bwasuli n'airayo n'atabba eyo mu nsi. ²¹ Era ebikolwa ebindi byonabyona ebya Menakemu ne byonabyona bye yakolere tebyawandiikiibwe mu kitabo eky'e by'o mu mirembe gya bakabaka ba Isiraeri? ²² Menakemu ni yeekungira wamu na bazeizabe; Pekakiya mutaane we n'afuga mu kifo kye. ²³ Mu mwaka ogw'ataanu ogwa Azaliya kabaka we Yuda Pekakiya mutaane wa Menakemu n'atandika okufuga Isiraeri mu Samaliya, n'afuga emyaka ibiri: ²⁴ N'akola ebyabbaire mu maiso ga Mukama ebibbiibi: teyaviire mu bibbiibi bya Yerobowaamu mutaane wa Nebati bye yayonooneserye Isiraeri. ²⁵ Awo Peka mutaane wa Lemaliya omwami we n'amwekobaana n'amusumitira mu Samaliya mu kigo eky'o mu nyumba ya kabaka wamu n'Alugobu n'o Aliye; era abasaiza ataanu ab'o ku Bagireyaadi ni babba wamu naye: n'amwita n'afuga mu kifo kye. ²⁶ Era ebikolwa ebindi byonabyona ebya Pekakiya ne byonabyona bye yakolere, bona, byawandiikiibwe mu kitabo eky'e by'omu mirembe gya bakabaka ba Isiraeri. ²⁷ Mu mwaka ogw'ataanu neibiri ogwa Azaliya kabaka wa Yuda Peka mutaane wa Lemaliya n'atandika okufuga Isiraeri mu Samaliya, n'afugira emyaka abiri. ²⁸ N'akola ebyabbaire mu maiso ga Mukama ebibbiibi: teyaviire mu bibbiibi bya Yerobowaamu mutaane wa Nebati bye yayonooneserye Isiraeri. ²⁹ Ku mirembe gya Peka kabaka wa Isiraeri Tigulasupireseri kabaka w’e Bwasuli n'aiza n'amenya Iyoni ne Aberubesumka ne Yanowa Kedesi ne Kazoli ne Gireyaadi Galiraaya, ensi yonayona eya Nafutali; n'abatwala nga basibe e Bwasuli ³⁰ Awo Koseya mutaane wa Era ni yeekobaana Peka mutaane wa Lamaliya, n'amusumita n'amwita n'afuga mu kifo kye mu mwaka ogw’abiri ogwa Yosamu mutaane wa Uziya. ³¹ Era ebikolwa ebindi byonabyona ebya Peka ne byonabyona bye yakolere, bona, byawandiikiibwe mu kitabo eky'e byomumirembe gya bakabaka ba Isiraeri. ³² Mu mwaka ogw'okubiri ogwa Peka mutaane wa Lemaliya kabaka wa Isiraeri Yosamu mutaane wa Uziya kabaka wa Yuda n'atandika okufuga. ³³ Yabbaire yaakamala emyaka abiri na itaanu bwe yatandikire okufuga; n'afugira emyaka ikumi na mukaaga mu Yerusaalemi n'o maye eriina lye yabbaire Yerusa muwala wa Zadooki. ³⁴ N'akola ebyabbaire mu maiso ga Mukama ebisa: yakolere nga byonabyona bwe biri itaaye Uziya bye yakolere, ³⁵ Naye ebifo ebigulumivu tebyatoleibwewo: abantu nga bakaali kuweerayo sadaaka era nga bootererya obubaani ku bifo ebigulumivu. N'azimba omulyango ogw'engulu ogw'o mu nyumba ya Mukama, ³⁶ Era ebikolwa ebindi byonabyona ebya Yosamu ne byonabyona bye yakolere tebyawandiikiibwe mu kitabo eky'ebyomumirembe gya bakabaka ba Yuda? ³⁷ Mu biseera ebyo Mukama mwe yatandikiire okusindika Lezini kabaka w'e Busuuli n'o Peka mutaane wa Lemaliya okulwana ne Yuda. ³⁸ Awo Yosamu ne Yekungira wamu na bazeizabe n'aziikirwa wamu na bazeizabe mu kibuga kya Dawudi itaaye: Akazi mutaane we n'afuga mu kifo kye.