¹ Mu mwaka ogw'okubiri ogwa Yowaasi mutaane wa Yowakaazi kabaka we Isiraeri Amaziya mutaane wa Yowaasi kabaka wa Yuda n'atandika okufuga. ² Yabbaire yakamala emyaka abiri na itaanu bwe yatandikire okufuga; n'afugira emyaka abiri mu mwenda mu Yerusaalemi: n'o maye eriina lye yabbaire Yekoyadiini ow'e Yerusaalemi. ³ N'akola ebyabbaire mu maiso ga Mukama ebisa, naye nga tamwekankana Dawudi itaaye bye yakolere nga byonabyona bwe byabbaire Yowaasi itaaye bye yakolanga. ⁴ Naye ebifo ebigulumivu tebyatoleibwewo: abantu nga bakaali bawaayo sadaaka era nga bootererya obunaani ku bifo ebigulumivu. ⁵ Awo olwatuukiire obwakabaka nga bwakaiza bwize bunywezebwe mu mukono gwe Kaisi naita abaidu be abaitire kabaka itaaye: ⁶ naye abaana b'a baiti tiyabaitire: ng'ebyo bwe biri ebyawandiikiibwe mu kitabo eky'amateeka ga Musa, nga Mukama bwe yalagiire ng'atumula nti Baitawabwe tebaitibwanga ku lw'a baana, so n'a baana tebaitibwanga ku lwa baitawabwe; naye buli muntu ayafanga olw'o kwonoona kwe iye. ⁷ Ku Edomu n'aitiraku mutwalo mu Kiwonvu eky'o munyu, n'a menya Seera ng'alwana, n'akituuma eriina lyakyo Yokuseeri ne watynu. ⁸ Awo Amaziya n'atuma ababaka eri Yekoyaasi mutaane wa Yekoyakaazi mutaane wa Yeeku kabaka wa Isiraeri: ng'atumula nti iza tubonagane n'amaiso. ⁹ Awo Yekoyaasi kabaka wa Isiraeri n'atumira Amaziya kabaka w'e Yuda ng'a tumula nti Omwenyango ogwabbaire ku Lebanooni gwatumiire omuvule ogwabbaire ku Lebanooni nga gutumula nti muwe muwala wo mutaane wange amufumbirwe: awo ensolo ey'o mu nsiko eyabbaire ku Lebanooni n'e bitawo n'e niinirira omwenyango. ¹⁰ Mazima okubbire Edomu, n'o mwoyo gwo gukugulumizirye okyenyumiririryemu obbe eika; kubanga lwaki okweyingirya mu bitali bibyo n'o fiirwa, n'o gwa iwe n'o Yuda wamu naiwe? ¹¹ Naye Amaziya n'ataikirirya kuwulira. Awo Yekoyaasi kabaka wa Isiraeri n'atabaala; iye n'o Amaziya kabaka wa Yuda ni babonaganira n'a maiso e Besusemesi ekya Yuda. ¹² Yuda n'abbingibwa mu maiso ga Isiraeri; ne bairukira buli muntu mu weema ye. ¹³ Awo Yekoyaasi kabaka wa Isiraeri n'awambira Amaziya kabaka wa Yuda mutaane wa Yekoyaasi mutaane wa Akaziya e Besusemesi, n'aiza e Yerusaalemi n'amenyamenya bugwe wa Yerusaalemi, okuva ku mulyango gwa Efulayimu okutuuka ku mulyango ogw'o ku nsonda, emikono bina. ¹⁴ N'anyaga ezaabu n'e feeza yonayona n'e bintu byonabyona ebyabonekere mu nyumba ya Mukama n'o mu by'o bugaiga eby'o mu nyumba ya kabaka, era n'a b'e misango, n'airayo e Samaliya. ¹⁵ Era ebikolwa ebindi byonabyona ebya Yekoyaasi bye yakolere n'a maani ge era bwe yalwaine n'Amaziya kabaka wa Yuda tibyawandiikiibwe mu kitabo eky'e by'omu mirembe gya bakabaka ba Isiraeri? ¹⁶ Yekoyaasi ni yeekungira wamu na bazeizabe, n'aziikirwa mu Samaliya wamu na bakabaka ba Isiraeri; Yerobowaamu mutaane we n'afuga mu kifo kye. ¹⁷ Awo Amaziya mutaane wa Yowaasi kabaka wa Yuda n'a mala emyaka ikumi n'aitaanu Yekoyaasi mutaane wa Yekoyakaazi kabaka we Isiraeri ng'amalire okufa. ¹⁸ Era ebikolwa ebindi byonabyona ebya Amaziya tebyawandiikiibwe mu kitabo eky'e by'omu mirembe gya bakabaka ba Yuda? ¹⁹ Ne bamwekobaanira mu Yerusaalemi; n'airukira e Lakisi: naye ne batuma Erakisi okumusengererya ne bamwitira eyo. ²⁰ Ne bamuleetera ku mbalaasi: n'aziikibwa mu Yerusaalemi wamu na bazeizabe mu kibuga kya Dawudi. ²¹ Awo abantu bonabona aba Yuda ni batwala Azaliya eyabbaire yaakamala emyaka ikumi na mukaaga, ni bamufuula kabaka mu kifo kya itaaye Amaziya. ²² Niiye yazimbire Erasi n'akiirya eri Yuda, kabaka ng'a malire okugonera awamu na bazeizabe. ²³ Mu mwaka ogw'e ikumi n'eitaanu ogwa Amaziya mutaane wa Yowaasi kabaka we Yuda Yerobowaamu mutaane wa Yowaasi kabaka we Isiraeri n'atandika okufuga mu Samaliya, n'afugira emyaka ana na gumu. ²⁴ N'akola ebyabbaire mu maiso ga Mukama Ebibbiibi: teyaviire mu bibbiibi byonabyona ebya Yerobowaamu mutaane wa Nebati bye yayonooneserye Isiraeri. ²⁵ Yairiryeyo ensalo ya Isiraeri okuva awayingirirwa e Kamasi okutuuka ku nyanza eya bona, ng'e kigambo bwe kyabbaire ekya Mukama Katonda wa Isiraeri kye yantumuliire mu mukono gw'o mwidu we Yona mutaane wa Amitayi nabbi ow'e Gasukeferi. ²⁶ Kubanga Mukama n'abona okubonyabonyezebwa kwa Isiraeri, nga kuzibu inu: kubanga tewabbaire eyasibiibwe waire ataasibiibwe, waire omubbeeri eri Isiraeri. ²⁷ Mukama n'atatumula ng'alisangula eriina lya Isiraeri okuva wansi w'e igulu: naye n'abalokolera mu mukono gwa Yerobowaamu mutaane wa Yowaasi. ²⁸ Era ebikolwa ebindi byonabyona ebya Yerobowaamu ne byonabyona bye yakoire n'a maani ge bwe yalwaine ne bwe yairiryewo Isiraeri Damasiko ne Kamasi ebyabbanga ebya Yuda, tebyawandiikiibwe mu kitabo eky'e by'omu mirembe gya bakabaka ba Isiraeri? ²⁹ Yerobowaamu ni yeekungira wamu na bazeizabe, be bakabaka ba Isiraeri; Zekaliya mutaane we n'afuga mu kifo kye.