¹ Mu mwaka ogw’abiri n'e isatu ogwa Yowaasi mutaane wa Akaziya kabaka wa Yuda Yekoyakaazi mutaane wa Yeeku n'atandika okufuga Isiraeri mu Samaliya n'afugira emyaka ikumi na musanvu. ² N'akola ebyabbaire mu maiso ga Mukama ebibbiibi n'asengererya ebibbiibi bya Yerobowaamu mutaane wa Nebati bye yayonooneserye Isiraeri; teyabiviiremu. ³ Obusungu bwa Mukama ni bubuubuukira Isiraeri, n'abagabula mu mukono gwa Kazayeeri kabaka w'e Busuuli n'o mu mukono gwa Benikadadi mutaane wa Kazayeeri enaku gyonagyona. ⁴ Awo Yekoyakaazi n'a mwegayirira Mukama, Mukama n'amuwulira: kubanga yaboine okujoogebwa kwa Isiraeri kabaka w'e Busuuli bwe yabajoogere. ⁵ (Awo Mukama n'awa Isiraeri omulokozi n'o kuva ne bava wansi w'o mukono gw'Abasuuli: abaana ba Isiraeri ni babba mu weema gyabwe ng'o luberyeberye. ⁶ Naye ni batava mu bibbiibi by'e nyumba ya Yerobowaamu bye yayonooneserye Isiraeri, naye ni batambulira omwo: na Basyera ni basigala mu Samaliya.) ⁷ Kubanga tiyalekeire Yekoyakaazi ku bantu wabula abasaiza abeebagala embalaasi ataanu n'a magaali ikumi n'a batambula n'e bigere mutwalo; kubanga kabaka w'e Busuuli yabazikiriirye, n'abafuula ng'e nfuufu ey'o mu iguuliro. ⁸ Era ebikolwa ebindi byonabyona ebya Yekoyakaazi ne byonabyona bye yakolere n'a maani ge tebyawandiikiibwe mu kitabo eky'e by'omu mirembe gya bakabaka ba Isiraeri? ⁹ Yekoyakaazi ni yeekungira wamu na bazeizabe; ni bamuziika mu Samaliya: Yowaasi mutaane we n'afuga mu kifo kye. ¹⁰ Mu mwaka ogw'asatu mu musanvu ogwa Yowaasi kabaka we Yuda Yekoyaasi mutaane wa Yekoyakaazi n'atandika okufuga Isiraeri mu Samaliya, n'afugira emyaka ikumi na mukaaga. ¹¹ N'akola ebyabbaire mu maiso ga Mukama ebibbiibi; teyaviire mu bibbiibi byonabyona ebya Yerobowaamu mutaane wa Nebati bye yayonooneserye Isiraeri: naye n'atambulira omwo. ¹² Era ebikolwa ebindi byonabyona ebya Yowaasi ne byonabyona bye yakolere n'a maani ge ge yalwanisirye n'o Amaziya kabaka we Yuda tibyawandiikiibwe mu kitabo eky'e by'o mu mirembe gya basekabaka ba Isiraeri? ¹³ Yowaasi ni yeekungira wamu na bazeizabe; Yerobowaamu n'atyama ku ntebe ye: Yowaasi n'aziikirwa mu Samaliya wamu na bakabaka ba Isiraeri. ¹⁴ Awo Erisa yabbaire alwaire endwaire ye eyamwitire: Yowaasi kabaka wa Isiraeri n'aserengeta gy'ali n'amukungira amaliga n'atumula nti Itawange, itawange, amagaali ga Isiraeri n'abasaiza be abeebagala embalaasi! ¹⁵ Erisa n'amukoba nti irira omutego n'o busaale: n’airira omutego n'o busaale. ¹⁶ N'akoba kabaka wa Isiraeri nti teeka omukono gwo ku mutego: n'aguteekaku omukono. Erisa n'ateeka emikono gye ku mikono gya kabaka. ¹⁷ N'atumula nti igulawo edirisa ery'e buvaisana: n'aligulawo. Awo Erisa n'atumula nti lasa: n'alasa. N'atumula nti Akasaale ka Mukama ak'o bulokozi, niiko kasaale ak'o bulokozi eri Obusuuli: kubanga olikubba Abasuuli mu Afeki okutuusya lw'olibamalawo. ¹⁸ N'atumula nti irira obusaale: n'abwirira. N'akoba kabaka wa Isiraeri nti kubba ku itakali: n'akubba emirundi isatu n'alekera awo. ¹⁹ Omusaiza wa Katonda n'amusunguwalira n'atumula nti Wandikubire emirundi itaanu oba mukaaga; kale wandikubbire Obusuuli okutuusya lwe wandibuzikiriirye: naye atyanu olikubba Obusuuli emirundi isatu gyonka. ²⁰ Awo Erisa n'afa ne bamuziika. Era ebibiina by'Abamowaabu ni bazindanga ensi omwaka bwe gwayingiranga. ²¹ Awo olwatuukire bwe babbaire nga baziika omusaiza, kale, bona, nu babona ekibiina; ni basuula omusaiza mu magombe ya Erisa: awo omusaiza nga yakaiza akome ku magumba g'Erisa, n'alamuka n'ayemerera n'e bigere. ²² Kazayeeri kabaka w'e Busuuli n'ajoogera Isiraeri emirembe gyonagyona egya Yekoyakaazi. ²³ Naye Mukama n'abakwatirwa ekisa n'abasaasira n'ateekayo omwoyo eri ibo, olw'e ndagaanu ye gye yalagaine n'o Ibulayimu n'o Isaaka n'o Yakobo, n'atataka kubazikirirya, waire okubabbinga mu maiso ge mu biseera ebyo. ²⁴ Awo Kazayeeri kabaka w'e Busuuli n'afa; Benikadadi mutaane we n'afuga mu kifo kye. ²⁵ Awo Yekoyaasi mutaane wa Yekoyakaazi n'atoola ate mu mukono gwa Benikadadi mutaane wa Kazayeeri ebibuga bye yabbaire atoire mu mukono gwa Yekoyakaazi itaaye ng'a lwana. Yowaasi n'a mukubba emirundi isatu, n'airyawo ebibuga bya Isiraeri.