¹ Gutyo omulimu gwonagwona Sulemaani gwe yakolere olw'e nyumba ya Mukama ni guwaawo. Sulemaani n'a yingirya ebintu Dawudi itaaye bye yawongere; efeeza n'e zaabu n'e bintu byonabyona, n'a biteeka mu mawanika g'e nyumba ya Katonda. ² Awo Sulemaani kaisi akuŋaanya abakaire ba Isiraeri n'e mitwe gyonagyona egy'e bika, abakulu b'e nyumba gya baitawabwe egy'a baana ba Isiraeri, e Yerusaalemi, okuniinisya esanduuku ey'e ndagaanu ya Mukama okugitoola mu kibuga kya Dawudi, niiyo Sayuuni. ³ Abasaiza bonabona aba Isiraeri ni bakuŋaanira eri kabaka ku mbaga, eyabbairewo mu mwezi ogw'o musanvu. ⁴ Awo abakaire bonanona aba Isiraeri ni baiza, Abaleevi ni basitula esanduuku. ⁵ Ne baniinisya esanduuku n'e weema ey'okusisinkanirangamu, n'e bintu byonabyona ebitukuvu ebyabbaire mu Weema; ebyo bakabona Abaleevi ni babiniinisya. ⁶ Kabaka Sulemaani n'e kibiina kyonakyona ekya Isiraeri ababbaire bakuŋaaniire gy'ali ni babba mu maiso g'e sanduuku, nga bawaayo entama n'e nte, egitagaitika waire okubalika obungi. ⁷ Awo bakabona ne bayingirya esanduuku ey'e ndagaanu ya Mukama mu kifo kyayo, awayemebwa okutumula mu nyumba, mu kifo ekitukuvu einu, wansi w'e biwawa bya bakerubi. ⁸ Kubanga bakerubi bayanjaire ebiwawa byabwe ku kifo ky'e sanduuku, bakerubi ni babiika ku saaduuku n'e misituliro gyayo waigulu. ⁹ N'e misituliro gyabbaire miwanvu gityo emisa gy'e misituliro n'o kubona n'a gibona ayema awali esanduuku mu maiso g'a wayemebwa okutumula; naye n'atagibona ayema ewanza: era ekyabbaire eyo ne watyanu. ¹⁰ Temwabbaire kintu mu sanduuko wabula ebipande byombiri Musa bye yateekere omwo ku Kolebu, Mukama bwe yalagaine endagaanu n'a baana ba Isiraeri, we baaviire mu Misiri. ¹¹ Awo olwatuukiire bakabona bwe bamalire okuva mu kifo ekitukuvu, (kubanga bakabona bonabona ababbaire eyo babbaire beetukwiirye, so tebakwaite biwu byabwe; ¹² era n'Abaleevi abembi, bonabona, Asafu, Kemani, Yedusuni, na bataane baabwe ni baaba bwabi, nga bavaire bafuta ensa, nga balina ebitaasa n'e kongo n'e nanga, ni beemerera ku nkomerero y'e kyoto ey'e buvaisana, era wamu nabo bakabona kikumi mu abiri nga bafuuwa amakondeere: ¹³ awo olwatuukire abaafuuwire n'a bembi nga bafaanana omumu, okuwulirya eidoboozi erimu nga batendereza nga beebalya Mukama, era bwe bayimusirye eidoboozi lyabwe n'a makondeere n'ebitaasa n'e bintu ebivuga, ni batendereza Mukama, nga batimula nti Kubanga musa; kubanga okusaasira kwe kubbeerera emirembe gyonagyona: awo enyumba kaisi ne izula ekireri, enyumba ya Mukama, ¹⁴ bakabona n'o kusobola ni batasobola kwemerera okuweererya olw'e kireri: kubanga ekitiibwa kya Mukama kyaizwire enyumba ya Katonda.