¹ Awo Sulemaani kaisi n'atumula nti Mukama atumwire ng'a yatyamanga mu ndikirirya ekwaite. ² Naye nze nkuzimbiire enyumba ey'o kubbamu, n'e kifo ky'e wabbangamu emirembe gyonagyona. ³ Awo kabaka n'a kyusya amaiso ge, n'asabira ekibiina kyonakyona ekya Isiraeri omukisa: ekibiina kyonakyona ekya Isiraeri ni beemerera. ⁴ N'a tumula nti Mukama Katonda wa Isiraeri yeebazibwe, etumula n'o munwa gwe n'o Dawudi itawange, era akituukiriirye n'e mikono gye, ng'a tumula nti ⁵ Okuva ku lunaku lwe natoire abantu bange mu nsi y'e Misiri, tinerobozyanga kibuga kyonakyona mu bika byonabyona ebya Isiraeri okuzimbira omwo enyumba, eriina lyange libbe omwo; so tinerobozyanga muntu yenayena okubba omukulu w'a bantu bange Isiraeri: ⁶ naye nerobozerye Yerusaalemi, eriina lyange libbe omwo; era neerobozerye Dawudi okufuga abantu bange Isiraeri. ⁷ Kale kyabbaire mu mwoyo gwa Dawudi itawange okuzimbira eriina lya Mukama Katonda wa Isiraeri enyumba. ⁸ Naye Mukama yakobere Dawudi itawange nti kubanga kyabbaire mu mwoyo gwo okuzimbira eriina lyange enyumba, wakolere kusa kubanga kyabbaire mu mwoyo gwo: ⁹ era naye iwe tozimbanga nyumba; naye mutaane wo aliva mu ntumbu gyo, oyo niiye alizimbira eriina lyange enyumba. ¹⁰ Era Mukama atuukiriirye ekigambo kye kye yatumwire; kubanga nze nyimukiire mu kifo kya Dawudi itawange, era ntyaime ku ntebe ya Isiraeri, nga Mukama bwe yasuubiizirye, era nzimbiire eriina lya Mukama Katonda wa Isiraeri enyumba. ¹¹ Era ntekere omwo esanduuku, omuli Endagaanu ya Mukama, gye yalagaine n'a baana ba Isiraeri. ¹² N'ayemerera mu maiso g'e kyoto kya Mukama, ekibiina kyonakyona ekya Isiraeri nga baliwo n'ayanjululya engalo gye: ¹³ (kubanga Sulemaani yabbaire akolere ekituuti eky'e bikomo, obuwanvu bwakyo emikono itaanu, n'o bugazi bwakyo emikono itaanu, n'o bugulumivu bwakyo emikono isatu, n'akiteeka wakati mu luya; n'ayemerera okwo, n'afukamira ku makumbo ge mu maiso g'e kibiina kyonakyona ekya Isiraeri, n'ayanjululya engalo gye eri eigulu:) ¹⁴ n'atumula nti Ai Mukama Katonda wa Isiraeri, wabula Katonda akufaanana, mu igulu waire mu nsi; akwata endagaanu n'o kusaasira eri abaidu bo abatambulira mu maiso go n'o mwoyo gwabwe gwonagwona: ¹⁵ eyanywezerye eri omwidu wo Dawudi itawange ekyo kye wamusuubizirye: Niiwo awo, watumwire n'o munwa gwo, era okituukirirya n'o mukono gwo, nga bwe luri watyanu. ¹⁶ Kale, ai Mukama Katonda wa Isiraeri, nywezya eri omwidu wo Dawudi itawange ekyo kye wamusuubizirye ng'otumula nti tiwaakugotenga musaiza mu maiso gange ow'o kutyama ku ntebe ya Isiraeri; kyooka abaana bo bwe bwebegenderezanga engira yabwe, okutambuliranga mu mateeka gange nga iwe bwe watambuliranga mu maiso gange. ¹⁷ Kale, ai Mukama Katonda wa Isiraeri, ekigambo kyo kituukirizibwe; kye wakobere omwidu wo Dawudi. ¹⁸ Naye Katonda alityama mazima dala n'a bantu ku itakali? Bona, eigulu n'e igulu erya waigulu tolituukamu; kale enyumba eno gye nzimbire esobola etya iwe okugituukamu? ¹⁹ Naye lowooza okusaba kw'o mwidu wo n'o kwegayirira kwe, ai Mukama Katonda wange, okuwulira okukuunga n'o kusaba omwidu wo kw'a sabire mu maiso go: ²⁰ amaiso go gazibukenga eri enyumba eno emisana n'o bwire, eri ekifo kye watumwireku ng'o liteeka omwo eriina lyo; okuwulira okusaba omwidu wo kwe yasabanga ng'alingirira ekifo kino. ²¹ Era owuliranga okwegayirira kw'o mwidu wo, n'a bantu bo Isiraeri, bwe basabanga nga balingirira ekifo kino: niiwo awo, wuliranga iwe ng'o yema mu kifo kyo ky'o bbamu, ng'o yema mu igulu; era bw'e wawuliranga, osonyiwanga. ²² Omuntu bweyayonoonanga mwinaye, ni bamulayirya ekirayiro ky'abba alayira, n'aiza n'alayira ng'a yema mu maiso g'e kyoto kyo mu nyumba eno: ²³ kale owuliranga iwe ng'o yema mu igulu, okolanga, osaliranga abaidu bo omusango, ng'o sasula ababbiibi, okumuleetaku engira ye; era ng'o weesya obutuukirivu omutuukirivu, okumuwa ng'o butuukirivu bwe bwe buli. ²⁴ Era abantu bo Isiraeri bwe bakubbibwanga wansi mu maiso g'a balabe, kubanga bakwonoonere; ne bakyuka ate ni baatula eriina lyo, ni basaba ni beegayiririra mu maiso go mu nyumba eno: ²⁵ kale owuliranga iwe ng'o yema mu igulu, osonyiwanga okwonoona kw'a bantu bo Isiraeri, obairyangawo ate mu nsi gye wawaire ibo n'a bazeiza baabwe. ²⁶ Eigulu bwe lyaigalwangawo, so nga wabula maizi, kubanga bakwonoonere; bwe basabanga nga balingirira ekifo kino ne baatulaa eriina lyo ni bakyuka okuleka ekibibiibi kyabwe, bw'o babonyaabonyanga: ²⁷ kale owuliranga iwe ng'o yema mu igulu, osonyiwanga ekibbiibi ky'a baidu bo n'a bantu bo Isiraeri, bwewabegeresyanga engira ensa gye babba batambuliramu; oweereryanga amaizi ku nsi yo gye wawaire abantu bo okubba obusika. ²⁸ Bwe wabbanga mu nsi enjala, bwe wabbanga kawumpuli, bwe wabbanga okugengewala oba bukuku, enzige oba kawuka; abalabe baabwe bwe babazingiriryanga mu nsi ey'e bibuga byabwe; kawumpuli bweyafaanananga atya, waire bweyefaanananga etya; ²⁹ kyonakyona omuntu yenayena kyeyasabanga era kyonakyona kyeyegayiriranga, oba abantu bo bonabona Isiraeri, abamanyanga buli muntu endwaire ye n'o buyinike bwe iye, n'ayanjululya engalo gye eri enyumba eno: ³⁰ kale owuliranga iwe ng'o yema mu igulu ekifo ky'obbaamu, osonyiwanga osasulanga buli muntu ng'a mangira ge gonagona bwe gali, gw'o maiteku omwoyo gwe; (kubanga iwe, niiwe wenka, iwe omaite emyoyo gy'abbaana b'abantu;) ³¹ Kaisi bakutye okutambuliranga mu mangira go enaku gyonagyona gye balimala mu nsi gye wawaire bazeiza baisu. ³² Era eby'o munaigwanga atali w'o mu bantu bo Isiraeri, bweyavanga mu nsi ey'ewala olw'e riina lyo eikulu n'e ngalo gyo egy'a maani n'o mukono gwo ogwagoloilwe; bwe baizanga ni basaba nga balingirira enyumba eno; ³³ owuliranga iwe ng'o yema mu igulu mu kifo ky'obbamu okole nga byonabyona bwe biri omunaigwanga by'akukungira; amawanga gonagona ag'o ku nsi kaisi bamanye eriina lyo, okukutya ng'a bantu bo Isiraeri bwe bakutya, era bamanye ng'e nyumba eno gye nzimbire etuumiibwe eriina lyo. ³⁴ Abantu bo bwe batabalanga abalabe baabwe mu ngira yonayona gyewabatumanga ne bakusabanga nga balingirira ekibuga kino kye weerobozerye n'e nyumba gye nzimbiire eriina lyo: ³⁵ kale owuliranga iwe ng'o yema mu igulu okusaba kwabwe n'o kwegayirira kwabwe owozyanga ensonga yaabwe. ³⁶ Bwe bakwonoonanga (kubanga wabula muntu atayonoonanga) n'o basunguwalira n'o bagabula eri abalabe n'o kutwala ne babatwala nga basibe mu nsi oba wala oba kumpi; ³⁷ naye bwe baijuukiriranga mu nsi gye baatwaliibwe nga basibe ni bakyuka ni bakwegayirira mu nsi ey'o kusibibwa kwabwe nga batumula nti twayonoonere ni tukola eby'o bubambaavu, twakolere ekyeju; ³⁸ bwe bairangawo gy'oli n'o mwoyo gwabwe gwonagwona n'e meeme yaabwe yonayona mu nsi ey'o kusibibwa kwabwe gye babatwaire nga basibe, ni bakusaba nga balingirira ensi yaabwe gye wawaire bazeiza baabwe, n'e kibuga kye weerobozerye n'e nyumba gye nzimbiire eriina lyo; ³⁹ kale owuliranga iwe okusaba kwabwe n'o kwegayirira kwabwe ng'o yema mu igulu ekifo ky'obbamu owozyanga ensonga yaabwe; osonyiwanga abantu bo abakwonoonere. ⁴⁰ Kale, Ai Katonda wange, nkwegayiriire amaiso go gazibukenga n'a matu go gawulirenga okusaba okwasabirwanga mu kifo kino. ⁴¹ Kale golokoka, ai Mukama Katonda, oyingire mu kifo kyo eky'o kuwumuliramu, iwe n'e sanduuku ey'a maani go: bakabona bo, ai Mukama Katonda, bavaale obulokozi, n'a batukuvu bo basanyukire obusa. ⁴² Ai Mukama Katonda, tokyusanga maiso g'oyo gwe wafukireku amafuta: ijukira okusaasirwa kwa Dawudi omwidu wo.