¹ Era yakolere n'e kyoto eky'e kikomo, obuwanvu bwakyo emikono abiri, n'o bugazi bwakyo emikono abiri, n'o bugulumivu bwakyo emikono ikumi. ² Era n'akola n'e nyanza ensaanuukye ey'e mikono ikumi okuva ku mugo okutuuka ku mwigo, nekulungirivu n'o bugulumivu bwabbaire emikono itaanu; n'o muguwa ogw'e mikono asatu ni gugyetooloola. ³ Era wansi waayo wabbairewo ekifaananyi ky'e nte, ekigyetooloolera emikono ikumi, nga kigyetooloola enyanza enjuyi gyonagyona. Ente gyabbaire embu ibiri, egyasaanuusiibwe yo bwe yasaanuusiibwe. ⁴ Yatyaime ku nte ikumi na ibiri, isatu nga giringirira obukiika obugooda, n'e isatu nga giringirira ebugwaisana, n'e isatu nga giringirira obukiika obulyo, n'e isatu nga giringirira ebuvaisana: n'e nyanza ng'eteekeibwe ku igyo waigulu, amatako gaagyo gyonagyona nga gali munda. ⁵ N'o bugazi bwayo lugalo; n'o mwigo gwayo gwakoleibwe ng'o mwigo gw'e kibya, ng'e kimuli ky'amalanga: ensuwa enkumi isatu egyayingiiremu ni gitoolamu. ⁶ Era n'akola eby'o kwolezeryamu ikumi, n'ateeka ebitaanu ku mukono omulyo, n'a bitaanu ku mugooda, okubyozeryangamu; ebintu eby'ekiweebwayo ekyokyebwa babyozeryanga omwo, naye enyanza yabbaire ya bakabona okunaabirangamu. ⁷ N'akola ebikondo ikumi by'e zaabu ng'e kiragiro kyabyo bwe kyabbaire; n'a biteeka mu yeekaalu, ku mukono omulyo bitaanu, n'o ku mugooda bitaanu. ⁸ Era n'akola n'e meenza ikumi, n'a giteeka mu yeekaalu, ku luuyi olulyo itaanu, n'o ku lugooda itaanu. N'akola ebibya kikumi by'e zaabu. ⁹ Era ate n'akola oluya lwa bakabona, n'o luya olunene, n'e njigi gy'o luya, enjigi gyaagyo n'abibiikaku ebikomo. ¹⁰ N'ateeka enyanza ku luuyi lw'e nyumba olulyo ebuvaisana, okulingirira obukiika obulyo. ¹¹ Kulamu n'a kola entamu n'e bisena n'ebibya. Awo Kulamu n'amala okukola omulimu gwe yakoleire kabaka Sulemaani mu nyumba ya Katonda: ¹² empango gyombiri n'e bida, n'e mitwe gyombiri egyabbaire ku ntiiko gy'e mpango; n'e:bitimba byombiri eby'okubiika ku bikompe byombiri eby'e mitwe egyabbaire ku ntiiko gy'e mpango; ¹³ n'a makomamawanga bina ag'o ku bitimba byombiri; embu ibiri egy'a makomamawanga gy'o ku buli kitimba, okubiika ku bikompe byombiri eby'e mitwe egyabbaire ku mpango. ¹⁴ Era n'akola n'e ntebe, n'ebyozeryebwamu n'a bikola ku ntebe: ¹⁵ enyanza imu n'e nte ikumi na ibiri wansi waayo. ¹⁶ Era n'e ntamu n'evbisena n'a makato agakwatisya enyama n'evbintu byonabyona ebyaku Kulamu itaaye n'a bikolera kabaka Sulemaani olw'e nyumba ya Mukama, niibyo bikomo bizigule. ¹⁷ Mu lusenyu lwe Yoludaani kabaka gye yabisaanuukiirye, awali eitakali ery'e ibbumba wakati wa Sukosi ne Zereda. ¹⁸ Atyo Sulemaani bwe yakolere ebintu byonabyona bingi inu nyini: kubanga ebikomo obuzito bwabyo tebwategeerekekere. ¹⁹ Sulemaani n'akola ebintu byonabyona ebyabbaire mu nyumba ya Katonda, era n'e kyoto eky'e zaabu, n'e meenza okwabbanga emigaati egy'o kulaga; ²⁰ n'e bikondo n'e tabaaza gyabyo, gyakirenga mu maiso g'a wayemebwa okutumula ng'e kiragiro bwe kyabbaire, by'e zaabu nsa nongoofu; ²¹ n'e bimuli ne tabaaza ne makaansi, by'e zaabu, zaabu ntuukirivu; ²² n'e bisalaku ebisiriirya n'ebibya n'e bijiiko n'e mumbiro, bye zaabu nongoofu: n'o mulyango gw'e nyumba, enjigi gyayo egy'o munda egy'o mu kifo ekitukuvu einu n'e njigi gy'e nyumba, niiyo yeekaalu, gyabbaire gye zaabu.