¹ Awo Sulemaani n'akuŋaanya Abakaire ba Isiraeri n'e mitwe gyonagyona egy'e bika, abakulu b'e nyumba gya baitawabwe egy'a baana ba Isiraeri, eri kabaka Sulemaani e Yerusaalemi, okuniniisya esanduuku ey'e ndagaanu ya Mukama nga bagitoola mu kibuga kya Dawudi, Sayuuni. ² Abasaiza bonabona aba Isiraeri nj bakuŋaanira eri kabaka Sulemaani ku mbaga, mu mwezi Esanimu, niigwo mwezi ogw'o musanvu. ³ Abakaire bonabona aba Isiraeri ni baiza, bakabona ni basitula esanduuku. ⁴ Ne baniinisya esanduuku ya Mukama, n'e weema ey'o kusisinkanirangamu, n'e bintu byonabyona ebitukuvu ebyabbaire mu Weema; ebyo bakabona n'Abaleevi bye baniiniisirye. ⁵ Kabaka Sulemaani n'e kibiina kyonakyona ekya Isiraeri ababbaire bakuŋaaniire gy'ali babbaire wamu naye mu maiso g'e sanduuku, nga bawaayo entama n'e nte egitaboneka waire okugaitika olw'o bungi. ⁶ Bakabona ni bayingirya esanduuku ey'e ndagaanu ya Mukama mu kifo kyayo, awayemebwa mu nyumba okutumula, mu kifo ekitukuvu einu, wansi w'e biwawa bya bakerubi. ⁷ Kubanga bakerubi babbambire ebiwawa byabwe ku kifo ky'e sanduuku, bakerubi ni babiika ku sanduuku n'e misituliro gyayo waigulu. ⁸ Era emisituliro gyabbaire miwanvu gityo emisa gy'e misituliro n'o kubona n'a gibona ayema mu kifo ekitukuvu mu maiso g'a wayemebwa okutumula; naye ayema ewanza nga tagibona: era giri eyo ne watyanu. ⁹ Wabula kintu mu sanduuku wabula ebipande byo mbiri eby'a mabbaale Musa bye yateekeremu ku Kolebu, Mukama bwe yalagaine endagaanu n'a baana ba Isiraeri, bwe baaviire mu nsi y'e Misiri. ¹⁰ Awo olwatuukire bakabona bwe bamalire okuva mu kifo ekitukuvu, ekireri ni kiizulya enyumba ya Mukama, ¹¹ bakabona n'o kusobola ni batasobola kwemerera okuweererya olw'e kireri: kubanga ekitiibwa kya Mukama nga kiizwirye enyumba ya Mukama. ¹² Awo Sulemaani n'a koba nti Mukama yatumwire ng'a yabbanga mu ndikirirya ekwaite. ¹³ Mazima nkuzimbiire enyumba ey'o kubbangamu, ekifo ky'e watyamangamu emirembe gyonagyona. ¹⁴ Awo kabaka n'akyusya amaiso ge, n'a sabira ekibiina kyonakyona ekya Isiraeri omukisa; ekibiina kyonakyona ekya Isiraeri ni kyemerera. ¹⁵ N'atumula nti Mukama yeebazibwe, Katonda wa Isiraeri, eyatumwire n'o munwa gwe n'o Dawudi itawange, n'o kutuukirirya akituukiriirye n'o mukono gwe, ng'a tumula nti ¹⁶ Okuva ku lunaku lwe natoleireku abantu bange Isiraeri mu Misiri, tinerobozyanga kibuga kyonakyona mu bika byonabyona ebya Isiraeri okuzimba enyumba, eriina lyange libbenga omwo; naye neerobozerye Dawudi okubba omukulu w'a bantu bange Isiraeri. ¹⁷ Era kyabbaire mu mwoyo gwa Dawudi itawange okuzimba enyumba olw'e riina lya Mukama, Katonda wa Isiraeri. ¹⁸ Naye Mukama n'akoba Dawudi kitawange nti Kubanga kyabbaire mu mwoyo gwo okuzimba enyumba olw'e riina lyange, wakolere kusa kubanga kyabbaire mu mwoyo gwo: ¹⁹ era naye tolizimba nyumba; naye mutaane wo aliva mu ntumbu gyo, oyo niiye alizimba enyumba olw'e riina lyange. ²⁰ Era Mukama anywezerye ekigambo kye kye yatumwire; kubanga nze nyimukiire mu kifo kya Dawudi itawange, nga ntyaime ku ntebe ya Isiraeri, nga Mukama bwe yasuubizirye, era nzimbire enyumba olw'e riina lya Mukama, Katonda wa Isiraeri. ²¹ Era ngerere omwo ekifo eky'e sanduuku; omuli endagaanu ya Mukama, gye yalagaine na bazeiza, bwe yabatoire mu nsi y'e Misiri. ²² Sulemaani n'a yemerera mu maiso g'e kyoto kya Mukama ekibiina kyonakyona ekya Isiraeri nga baliwo, n'ayanjululya emikono gye edi eigulu: ²³ N'atumula nti Ai Mukama, Katonda wa Isiraeri, wabula katonda akufaanana iwe, mu igulu waigulu waire ku nsi wansi; akwata endagaanu n'o kusaasira eri abaidu bo, abatambulira mu maiso go n'o mwoyo gwabwe gwonagwona: ²⁴ eyakwaite ekyo kye wamusuubizirye eri omwidu wo Dawudi itawange: Niiwo awo, watumwire n'o munwa gwo, n'o kutuukirirya okituukiriirye n'o mukono gwo, nga bwe kiri atyanu. ²⁵ Kale, Ai Mukama, Katonda wa Isiraeri, kwata ekyo kye wasuubizirye eri omwidu wo Dawudi itawange ng'o tumula nti Tewakugotenga musaiza mu maiso gange ow'o kutyama ku ntebe ya Isiraeri; kyoka abaana bo bwe begendereryanga engira yabwe okutambuliranga mu maiso gange, nga iwe bwe watambuliranga mu maiso gange. ²⁶ Kale; ai Katonda wa Isiraeri, ekigambo kyo kituukirizibwe, nkwegayiriire, kye wakobere omwidu wo Dawudi itawange. ²⁷ Naye Katonda yabbanga ku nsi mazima dala? Bona, eigulu n'e igulu ly'e igulu tirisobola kukutoolamu: kale enyumba eno gye nzimbire nga terisobola n'a kadiidiiri! ²⁸ Naye teekayo omwoyo gwo eri okusaba kw'o mwidu wo, n'eri okwegayirira kwe, Ai Mukama Katonda wange, okuwulira okukunga n'o kusaba omwidu wo kw'a sabira mu maiso go atyanu; ²⁹ amaiso go gazibukenga eri enyumba eno emisana N'o bwire, eri ekifo kye watumwireku nti eriina lyange lyabbanga omwo: okuwulira okusaba omwidu wo kweyasabanga ng'o lingirira ekifo kino. ³⁰ Era wulira iwe okwegayirira kw'o mwidu wo, n'a bantu bo Isiraeri, bwe basabanga nga balingirira ekifo kino: Niiwo awo, wulira iwe ng'o yema mu igulu ekifo ky'o bbangamu; era bw'o wulira sonyiwa. ³¹ Omuntu bweyasagiranga mwinaye, ni bamuteekaku ekirayiro okumulayirya, n'aiza n'a layirira mu maiso g'e kyoto kyo mu nyumba eno; ³² kale owuliranga ng'o yema mu igulu, okole osalire abaidu bo omusango, okusinga ababbiibi okuleeta engira ye ku mutwe gwe iye; era ng'owa abatuukirivu obutuukirivu, okumuwa ng'o butuukirivu bwe bwe buli. ³³ Abantu bo Isiraeri bwe bakubbibwanga ni bagwa wansi mu maiso g'a balabe, kubanga bakwonoonere; bwe bakukyukiranga ate ni baatula eriina lyo ni basaba ni bakwegayirira mu alpha nyumba eno: ³⁴ kale owuliranga iwe ng'oyema mu igulu, osonyiwe ekibbiibi ky'a bantu bo Isiraeri, obairyewo mu nsi gye wawaire bazeiza babwe. ³⁵ Eigulu bwe lyaigalwangawo, so nga wabula maizi, kubanga bakwonoonere; bwe basabanga nga balingirira ekifo kino ni batyamisya eriina lyo ne bakyuka okuleka ekibbiibi kyabwe, bwewababonyaabonyanga; ³⁶ kale owuliranga iwe ng'oyema mu igulu osonyiwe ekibbiibi ky'a baidu bo n'a bantu bo Isiraeri, bwobegeresya engira ensa gye babba batambuliramu; oweererye amaizi ku nsi yo gye wawaire abantu bo okubba obusika. ³⁷ Bwe wabbanga mu nsi enjala, bwe wabbanga kawumpuli, bwe waabbanga okugengewala oba bukuku, enzige oba kawuka; abalabe baabwe bwe babazingizyanga mu nsi ey'e bibuga byabwe; kawumpuli ne bwe yafaanananga atya, n'e ndwaire ne bw'eyafaanananga etya; ³⁸ kyonakyona omuntu yenayena kyeyasabanga era kyonakyona kyeyegayiriranga, oba abantu bo bonabona Isiraeri, abalimanya buli muntu endwaire ey'o mu mwoyo gwe iye, n'ayanjululya emikono gye eri enyumba eno: ³⁹ kale owuliranga iwe ng'o yema mu igulu ekifo kyewabbangamu osonyiwe okole osasule buli muntu ng'a mangira ge gonagona bwe gali, gw'o maiteku omwoyo gwe; (kubanga iwe, niiwe wenka, niiwe omaite emyoyo gy'a baana b'a bantu bonabona:) ⁴⁰ Kaisi bakyuke enaku gyonagyona gye bamalanga mu nsi gye wawaire bazeiza baisu. ⁴¹ Era eby'omunaigwanga atali w'o mu bantu bo Isiraeri, bweyavanga mu nsi ey'e wala olw'e riina lyo; ⁴² (kubanga baliwulira eby'e riina lyo eikulu n'e ngalo gyo egy'a maani n'o mukono gwo ogwagoloilwe;) bweyaizanga n'a saba ng'a lingirira enyumba eno; ⁴³ owuliranga iwe ng'o yema mu igulu ekifo ky'obbangamu okole nga byonabyona bwe biri omunaigwanga by'a kukungira; amawanga gonagona ag'o ku nsi kaisi bamanye eriina lyo, okukutya ng'a bantu bo Isiraeri bwe bakutya, era bamanye ng'e nyumba eno gye nzimbire etuumiibwe eriina lyo. ⁴⁴ Abantu bo bwe batabaalanga abalabe baabwe mu ngira yonayona gyobatumanga ni basaba Mukama nga balingirira ekibuga kye weerobozerye n'e nyumba gye nzimbiire eriina lyo: ⁴⁵ kale owuliranga iwe ng'o yema mu igulu okusaba kwabwe n'okwegayirira kwabwe owozye ensonga yaabwe. ⁴⁶ Bwe bakwonoonanga (kubanga wabula muntu atayonoonanga) n'o basunguwalira n'o bagabula eri abalabe n'o kutwala ni babatwala nga basibe mu nsi ey'abalabe oba wala oba kumpi; ⁴⁷ naye bwe baijuukiriranga mu nsi gye baatwaliibwe nga basibe ni bakyuka ne bakwegayiririra mu nsi y'abo abaabatwaire nga basibe nga batumula nti Twayonoonere ni tukola eby'o bubambaavu, twagirire ekyeju; ⁴⁸ bwe bairangawo gy'oli n'o mwoyo gwabwe gwonagwona n'e meeme yaabwe yonayona mu nsi y'abalabe baabwe abaabatwaire nga basibe, ni bakusaba nga balingirira ensi yaabwe gye wawaire bazeiza babwe, ekibuga kye weerobozerye n'e nyumba gye nzimbiire eriina lyo; ⁴⁹ kale owuliranga iwe okusaba kwabwe n'o kwegayirira kwabwe ng'o yema mu igulu ekifo ky'o bbangamu owozye ensonga yaabwe; ⁵⁰ osonyiwe abantu bo abakwonoonere n'o kusobya kwabwe kwonakwona kwe bakusoberye; obawe okusaasirwa mu maiso g'abo abaabatwala nga basibe, babasaasire: ⁵¹ kubanga niibo bantu bo era niibwo busika bwo bwe watoire mu Misiri, wakati mu kikoomi eky'e kyoma; ⁵² amaiso go gazibukenga eri okwegayirira kw'o mwidu wo n'eri okwegayirira kw'a bantu bo Isiraeri okubawuliranga buli bwe bakungiranga. ⁵³ Kubanga wabaawuliire mu mawanga gonagona ag'o ku nsi okubba obusika bwo, nga bwe watumwire n'o mukono gwa Musa omwidu wo, bwe watoire bazeiza baisu mu Misiri, ai Mukama Katonda. ⁵⁴ Awo olwatuukire Sulemaani bwe yamalire okusaba ebyo byonabyona n'o kwegayirira eri Mukama, n'a golokoka n'ava mu maiso g'e kyoto kya Mukama n'ava ku makumbo ge, ge yabbaire afukamireku, ng'ayanjulwiirye engalo gye eri eigulu. ⁵⁵ N'ayemerera n'a sabira ekibiina kyonakyona ekya Isiraeri omukisa n'e idoboozi einene ng'atumula nti ⁵⁶ Mukama yeebazibwe awaire abantu be Isiraeri okuwumula, nga byonabyona bwe biri bye yasuubizirye; wabula kigambo n'e kimu kigotere ku bisa bye yasuubizirye n'o mukono gwa Musa omwidu we. ⁵⁷ Mukama Katonda waisu abbenga naife nga bwe yabbanga na bazeiza baisu; aleke okutuleka waire okutwabulira: ⁵⁸ Kaisi akyusye emyoyo gyaisu gy'ali okutambuliranga mu mangira ge gonagona n'o kukwatanga ebiragiro bye n'a mateeka ge n'e misango gye bye yalagiire bazeiza baisu. ⁵⁹ N'e bigambo byange bino bye negayiriire mu maiso ga Mukama bibbenga kumpi Mukama Katonda waisu emisana N'o bwire, awozye ensonga y'o mwidu we n'e nsonga y'a bantu be Isiraeri, nga buli lunaku bwe lwatakanga: ⁶⁰ amawanga gonagona ag'o ku nsi bamanye nga Mukama niiye Katonda; wabula gondi. ⁶¹ Kale omwoyo gwanyu gubbe mutuukirivu eri Mukama Katonda waisu okutambuliranga mu mateeka ge n'o kukwatanga ebiragiro bye nga watyanu. ⁶² Awo kabaka n'e Isiraeri yenayena wamu naye ni bawaayo saadaaka mu maiso ga Mukama. ⁶³ Sulemaani n'awaayo okubba saadaaka ey'e biweebwayo olw'e mirembe gye yawaireyo eri Mukama ente emitwalo ibiri mu nkumi ibiri n'e ntama kasiriivu mu emitwalo ibiri. Batyo kabaka n'a baana ba Isiraeri bonabona ni bawonga enyumba ya Mukama. ⁶⁴ Ku lunaku olwo kabaka kwe yatukuliirye wakati w'o luya olwabbaire mu maiso g'e nyumba ya Mukama; kubanga eyo gye yaweereireyo ekiweebwayo ekyokyebwa n'e kiweebwayo eky'o bwita n'a masavu g'ebyo ebiweebwayo olw'e mirembe; kubanga ekyoto eky'e kikomo ekyabbaire mu maiso ga Mukama kyabbaire kiyingire obutono ekiweebwayo ekyokyebwa n'e kiweebwayo eky'o bwita n'a masavu g'e biweebwayo olw'e mirembe ni bitatuukaku. ⁶⁵ Awo Sulemaani n'a fumba embaga eyo mu biseera ebyo ne Isiraeri yenayena wamu naye, ekibiina ekinene, okuva awayingirirwa e Kamasi okutuuka ku kaiga ak'e Misiri, mu maiso ga Mukama Katonda waisu, enaku omusanvu n'e naku omusanvu, niigyo enaku eikumi n'e ina. ⁶⁶ Ku lunaku olw'o munaana n'a sindika abantu, ni basabira kabaka omukisa, ni baaba mu weema gyabwe nga basanyuka era nga bajaguza mu mimyoyo gyabwe olw'o busa bwonabwona Mukama bwe yabbaire alagire Dawudi omwidu we ne Isiraeri abantu be.