¹ Sulemaani n'amala emyaka ikumi n'a isatu ng'a zimba enyumba ye iye, n'amala enyumba ye yonayona. ² Kubanga yazimbiire enyumba ey'e kibira kya Lebanooni: obuwanvu bwayo bwabbaire emikono kikumi, n'o bugazi bwayo emikono ataanu, n'o bugulumivu bwayo emikono asatu, ku mbu ina egy'e mpango egy'e mivule, emisaale egy'e mivule nga giri ku mpango. ³ N'ebiikibwaku waigulu emivule ku mikiikiro ana na itaanu egyabbaire ku mpango; buli lubu ikumi na itaanu. ⁴ Era wabbairewo embu isatu egiringirirwamu, n'e dirisa nga lyolekera edirisa liinaye mu nyiriri isatu. ⁵ Era emizigo gyonagyona n'e mifuubeeto nga gyekankana okulingilirwamu: n'e dirisa lyayolekeire dirisa liinaye mu nyiriri isatu. ⁶ N'akola ekisasi n’e mpango: obuwanvu bwakyo bwabbaire emikono ataanu, n'o bugazi bwakyo emikono asatu; n'o mu maiso gagyo kisasi: n'o mu maiso gagyo mpango n'e misaale minene. ⁷ N'akola ekisasi ky'entebe w'abbanga ayema okusalanga emisango, niikyo kisasi eky'e misango: era kyabikiibweku emivule okuva wansi okutuuka ku buziizi. ⁸ N'e nyumba ye gye yabbangamu, oluya olundi munda w'e kisasi, yabbaire y'o mulimu gumu na gudi. Era n'akolera muwala wa Falaawo enyumba, (Sulemaani gwe yabbaire afumbiirwe,) okufaanana ng'e kisasi ekyo. ⁹ Egyo gyonagyona gyabbaire gya mabbaale g'o muwendo mungi, ga mabbaale mabaize, nga bwe gagerebwa agasalibwa n'e misumeeni, munda n'e wanza, okuva ku musingi okutuuka ku mabbaale aga waigulu, era gatyo n'e wanza okutuuka ku luya olukulu. ¹⁰ N'o musingi gwabbaire gwa mabbaale g'o muwendo mungi, amabbaale amanene, amabbaale ag'e mikono ikumi, n'a mabbaale ag'e mikono munaana. ¹¹ Ne waigulu wabbairewo amabbaale ag'o muwendo omungi, amabbaale amabaize, nga bwe gagereibwe, n'e misaale egy'e mivule. ¹² N'oluya olukulu olwetooloire lwabbaire embu isatu egy'a mabbaale amabaize, n'olubu lw'e misaale egy'e mivule; ng'o luya olw'o munda olw'e nyumba ya Mukama, n'ekisasi ky'e nyumba. ¹³ Awo kabaka Sulemaani n'atuma n'atoola Kiramu mu Tuulo. ¹⁴ Yabbaire mwana w'o mukali namwandu ow'o mu kika kya Nafutaali, n'o itaaye yabbaire musaiza ow'e Tuulo, omuweesi w'e bikomo; era yaizuliibwe amagezi n'o kutegeera n'o bukabakaba, okukola emirimu gyonagyona egy'e bikomo. N'aiza eri kabaka Sulemaani, n'akola omulimu gwe gwonagwona. ¹⁵ Kubanga yaweeserye empango gyombiri egy'e bikomo, buli mpango obugulumivu bwayo emikono ikumi na munaana: n'o muguwa ogw'e mikono ikumi n'aibiri gwetooloola gyombiri imu ku imu. ¹⁶ N'akola emitwe ibiri egy'e bikono ebisaanuukye, okugiteeka ku ntiiko gy'e mpango: omutwe ogumu obugulumivu bwagwo bwabbaire emikono itaanu, n'omutwe ogw'o kubiri obugulumivu bwagwo emikono itaanu. ¹⁷ Waaliwo ebitimba eby'o mulimu ogulukibwa, n'e miigo egy'o mulimu ogw'e miguufu, okubba ku mitwe egyabbaire ku ntiiko gy'e mpango; omusanvu byo ku mutwe gumu, n'o musanvu by'o ku mutwe ogw'o kubiri. ¹⁸ Atyo bwe yakolere empango: ni wabba embu ibiri egy'o kwetooloola ku kitimba ekimu, okubikka ku mitwe egyabbaire ku ntiiko gy'e mpango: era atyo bwe yakolere omutwe ogw'okubiri. ¹⁹ N'e mitwe egyabbaire ku ntiiko gy'e mpango mu kisasi gyabbaire gyo mulimu gwe bimuli bya malanga emikono ina. ²⁰ Era ne waigulu wabbairewo emitwe ku mpango gyombiri, kumpi n'e kida ekyaliraine ekitimba: n'a makomamawanga gabbaire bibiri, mu mbu okwetooloola ku mutwe ogw'o kubiri. ²¹ N'asimba empango ku kisasi kye yeekaalu: n'a simba empango ey'o mulyo, n'agituuma eriina lyayo Yakini: n'a simba empango engooda, n'a gituuma eriina lyayo Bowaazi. ²² N'o ku ntiiko niigyo empango kwabbaireku omulimu ogw'e bimuli eby'a malanga: gutyo omulimu gw'e mpango bwe gwamaliibwe. ²³ N'akola enyanza ensaanuukye y'e mikono ikumi okuva ku mwigo okutuuka ku mwigo, nkulungirivu, n'o bugulumivu bwayo bwabbaire emikono itaanu: era omuguwa ogw'e mikono asatu gwagyetooloire. ²⁴ Era wansi w'o mwigo gwayo okwetooloola wabbairewo entaabwa egyagyetooloile, emikono ikumi, nga gyetooloola enyanza enjuyi gyonagyona: entaabwa gyabbaire mbu ibiri, egyasaanuusiibwe yo bwe yasaanuusiibwe. ²⁵ Yatyaime ku nte ikumi na ibiri, isatu nga giringirira obukiika obugooda, n'e isatu nga giringiriire obugwaisana, n'e isatu nga goringirira obukiika obulyo, n'e isatu nga giringirira ebuvaisana: enyanza n'eteekebwa ku igyo waigulu, amatako gaagyo gonagona nga gali munda. ²⁶ N'o bugazi bwayo luta; n'o mwigo gwayo gwakoleibwe ng'o mwogo gw'e kibya, ng'e kimuli ky'a malanga: yatoiremu ensuwa enkumi ibiri. ²⁷ N'akola entebe ikumi gye bikomo; entebe imu obuwanvu bwayo emikono ina, n'o bugazi bwayo emikono ina, n'o bugulumivu bwayo emikono isatu. ²⁸ N'o mulimu gw'e ntebe gwabbaire guti: gyabbaire ku enkulukumbi; ne wabba enkulukumbi wakati w'amadaala: ²⁹ n'i ku nkulukumbi egyabbaire wakati w'a madaala ni kubbaako empologoma n'e nte n'a bakerubi; n'o ku madaala ne kubbaaku waigulu ekitereezebwaku: ne wansi w'e mpologoma n'e nte ni wabbaawo emiigo egy'o mulimu oguleebeeta. ³⁰ Na buli ntebe yaabbangaku empaanka ina eg'e bikomo n'e by'o mu nkata eby'e bikomo: n'e bigere byayo ebina byabbaireku emisituliro: wansi w'ekinaabirwamu wabbairewo emisituliro egyasaanuusiibwe, buli musituliro nga guliku emiigo ku mpete gyagwo. ³¹ N'o munwa gwayo munda w'o mutwe ne waigulu gwabbaire mukono gumu: n'o munwa gwayo gwabbaire gwekulungirivu ng'o mulimu ogw'e kitereezebwaku bwe guli, mukono n'e ekitundu: era ku munwa gwayo kwabbaireku enjola, n'e nkulukumbi gyayo nga gy'e songa obutabba n'e kulungirivu. ³² N'e mpanka eina gya babbaire wansi w'e nkulukumbi; n'emikiikiro gy'e mpaka gyabbaire mu ntebe: n'o bugulumivu bwe mpanka mukono ne ekitundu ky'o mukono. ³³ N'o mulimu gwe mpanka gwabbaire ng'o mulimu gwe mpaka wegyabbaire: emikiikiro gyaku ne mpanka gyaku n'a magulu gaaku n'e nkata gyaku byonabyona byabbaire bisaanuukye. ³⁴ Era wabbairewo emisituliro ina ku nsonda ina egya buli ntebe: emisituliro gyaku gyabbaire gy'e ntebe yeene. ³⁵ No ku ntiiko y'e ntebe kwabbaireku ekintu eky'e kulungirivu obugulumivu bwakyo kitundu ky'o mukono: n'o ku ntiiko niiyo entebe emikono gyaku n'e nkulukumbi gyaku byabbaire bityo. ³⁶ N'o ku bipande by'e mikono gyaku n'o ku nkulukumbi gyaku n'ayolaku bakerubi n'e mpologoma n'e nkindu, ng'e kigero bwe kyetengeire ekya buli kimu ku kimu, emiigo nga gyetooloola. ³⁷ Atyo bwe yakolere entebe ikumi: gyonagyona bagisaanuukirye bumu, n'ekigero kimu, n'e mbala imu. ³⁸ N'akola ebinaabirwamu ikumi by'e bikomo: ekinaabirwamu ekimu kyayabiremu ensuwa ana: na buli kinaabirwamu kyabbaire ky'e mikono ena: n'o ku ntebe eikumi imu ku imu ni kubbaaku ekinaabirwamu ekimu. ³⁹ N'ateeka entebe, eitaanu ku luuyi lw'e nyumba olulyo, n'e itaanu ku luuyi lw'e nyumba olugooda : n'ateeka enyanza ku luuyi lw'e nyumba olugooda ebuvaisana, okulingirira obukiika obulyo. ⁴⁰ Kiramu n'akola ebinaabirwamu n'e bijiiko n'e bibya. Awo Kiramu n'a malira dala omulimu gwonagwona gwe yakoleire kabaka Sulemaani mu nyumba ya Mukama: ⁴¹ empango gyombiri n'ebibya byombiri eby'e mitwe egyabbaire ku ntiiko gy'e mpango; n'ebitimba byombiri eby'o kubiika ku bibya byombiri eby'e mitwe egyabbaire ku ntiiko gy'e mpango; ⁴² n'a makomamawanga bina ag'o kubitimba byombiri; embu ibiri egy'a makomamawanga gyo ku buli kitimba, okubiika ku bibya byombiri eby'e mitwe egyabbaire ku mpango; ⁴³ n'e ntebe eikumi n'e binaabirwamu eikumi ebyabbaire ku ntebe; ⁴⁴ n'e nyanza eimu n'ente eikumi n'eibiri egyabbaire wansi w'e nyanja; ⁴⁵ n'e ntamu n'e bisena n'e bibya: ebintu ebyo byonabyona Kiramu bye yakoleire kabaka Sulemaani mu nyumba ya Mukama byabbaire bye bikomo bizigule. ⁴⁶ Mu lusenyu lwa Yoludaani kabaka gye yabisaanuukiirye, awali eitakali ery'e ibumba wakati w'e Sukosi ne Zalesani. ⁴⁷ Sulemaani n'aleka ebintu byonabyona nga tabigerere, kubanga byabbaire bingi inu dala: obuzito bw'e bikomo tebwategeerekekere. ⁴⁸ Sulemaani n'akola ebintu byonabyona ebyabbaire mu nyumba ya Mukama: ekyoto eky'e zaabu n'e meenza okwabbanga emigaati egy'o kulaga, niiyo zaabu; ⁴⁹ n'e bikondo, ku luuyi olulyo bitaano, n'o ku lugooda bitaanu, mu maiso g'a wayemebwa okutumula, by'e zaabu nongoofu; n'ebimuli n'e by'e tabaaza ne makaansi, by'e zaabu; ⁵⁰ n'e bikompe n'e bisalako ebisiriirya n'e bibya n'e bijiiko n'e mumbiro, bye zaabu nongoofu; n'e ŋangu egy'e njigi gy'e nyumba ey'o munda, kifo ekitukuvu einu, era n'e gy'e njigi gy'e nyumba, ye yeekaalu, gy'e zaabu. ⁵¹ Gutyo omulimu gwonagwona kabaka Sulemaani gwe yakolere mu nyumba ya Mukama ni guwaawo. Sulemaani n'ayingirya ebintu Dawudi itaaye bye yawongere, efeeza n'e zaabu n'e bintu, n'a biteeka mu mawanika g'e nyumba ya Mukama.