¹ Awo olwatuukire mu mwaka ogw'e bina mu kinaana abaana ba Isiraeri nga bamalire okuva mu nsi y'e Misiri, mu mwaka ogw'okuna Sulemaani kasookeire afuga Isiraeri, mu mwezi Zivu niigwo mwezi ogw'okubiri, n'atandiika okuzimba enyumba ya Mukama. ² N'e nyumba kabaka Sulemaani gye yazimbiire Mukama, obuwanvu bwayo bwabbaire emikono nkaaga, n'o bugazi bwayo emikono abiri, n'o bugulumivu bwayo emikono asatu. ³ N'e kisasi ekiri mu maiso ga yeekaalu y'e nyumba, obuwanvu bwakyo bwe emikono abiri, ng'o bugazi bw'e nyumba niibwo bwabbaire: obugazi bwakyo mu maiso g'e nyumba bwabbaire emikono ikumi. ⁴ N'akola mu nyumba amadirisa ag'o mulimu omuluke obutabikulwa. ⁵ N'o ku kisenge ky'e nyumba n'azimbaku enyumba okwetooloola, ku bisenge by'e nyumba okwetooloola, ebye yeekaalu era n'e by'a wayemebwa okutumula; n'akolawo ebisenge eby'o ku mbali okwetooloola: ⁶ enyumba eya wansi obugazi bwayo emikono itaanu, n'eya wakati obugazi bwayo emikono mukaaga, n'e y'o kusatu obugazi bwayo emikono musanvu: kubanga ku kisenge ky'e nyumba ewanza okwetooloola yasalireku emisaale gireke okukwata mu kisenge ky'e nyumba. ⁷ N'e nyumba bwe Babbaire bagizimba yazimbiibwe n'a mabbaale agalongooseibwe gye bagabaiziire: so tiwabbaire nyundo waire empasa waire ekintu kyonakyona eky'e kyoma ekyagoterwe mu nyumba bwe babbaire bagizimba. ⁸ Olwigi olw'e bisenge eby'o ku mbali ebya wakati lwabbaire ku luuyi olulyo olw'e nyumba: ni baniiniranga ku madaala ageenyoolanyoola okwaba mu bisenge ebya wakati, ni bava mu bya wakati ne baaba mu by'o kusatu. ⁹ Atyo bwe yazimbire enyumba, n'a gimala; enyumba n'a gibikaku emisaale n'e mbaawo egy'e mivule. ¹⁰ Enyumba yonayona n'a gizimbaku enyumba, buli nyumba obugulumivu bwayo emikono itaanu: ni gyesigama ku nyumba n'e misaale gy'e mivule. ¹¹ Ekigambo kya Mukama ni kizira Sulemaani nga kitumula nti ¹² Eby'e nyumba eno gy'o zimba, bwewatambuliranga mu mateeka gange n'o tuukirirya emisango gyange, n'o kwata ebiragiro byange byonabyona okubitambulirangamu: kale nanywezyanga ekigambo kyange naiwe, kye nakobere Dawudi itaawo ¹³ Era naabbanga mu baana ba Isiraeri, so tinalekenga bantu bange Isiraeri. ¹⁴ Awo Sulemaani n'azimba enyumba n'agimala. ¹⁵ N'azimba ebisenge by'e nyumba munda n'e misaale gy'e mivule; okuva wansi w'e nyumba okutuuka ku bisenge eby'o mu kasulya, n'a bibikaku munda emisaale: n'o wansi w'e nyumba n'ayaliirawo embaawo egy'e miberosi. ¹⁶ N'azimba emikono abiri mu njuyi egy'e nyumba egy'e nyuma n’e mbaawo egy'e mivule okuva wansi okutuuka ku bisenge: yazimbire mu iyo munda okubba awayemebwa okutuuka okubba awatukuvu einu. ¹⁷ N'e nyumba ye yeekaalu eri mu maiso g'a wayemebwa okutumula, obuwanvu bwayo bwabbaire mikono ana. ¹⁸ No ku nyumba munda kwabbaireku emivule egyayoleibweku entaabwa n'e bimuli ebyanjulukukire: byonabyona byabbaire bye mivule: wabula ibbaale eryabonekere. ¹⁹ N'ategeka awayemebwa okutumula wakati mu nyumba munda, okuteekamu esanduuku ey'e ndagaanu ya Mukama. ²⁰ N'o munda w'a wayemebwa okutumula mwabbairemu eibbanga ery'e mikono abiri obuwanvu, n'e mikono abiri obugazi, n'e mikono abiri obugulumivu bwalyo: n'abiikaku zaabu enongoofu: ekyoto n'akibiikaku emivule. ²¹ Awo Sulemaani n'abiika ku nyumba munda ezaabu enongoofu: n'atimba emiguufu egy'e zaabu mu maiso g'a wayemebwa okutumula: n'abiikaku zaabu. ²² Enyumba yonayona n'agibiikaku ezaabu, okutuusya enyumba yonayona lwe yaweire: era n'e kyoto kyonakyona eky'a wayemebwa okutumula n'akibiikaku ezaabu. ²³ Era awayemebwa okutumula n'akolawo bakerubi babiri ab'e misaale egy'e mizeyituuni, buli kerubi obuwanvu bwe emikono ikumi. ²⁴ N'ekiwawa ekimu ekya kerubi kyabbaire emikono itaanu, n'ekiwawa eky'o kubiri ekya kerubi emikono itaanu: ekiwawa ekimu we kikoma, ne kiinaakyo we kikoma, eibbanga lyabbaire emikono ikumi. ²⁵ N'o kerubi ow'okubiri yabbaire emikono ikumi: bakerubi bombiri ekigero kyabwe kimu n'e mbala yaabwe imu. ²⁶ Kerubi omumu obugulumivu bwe bwabbaire emikono ikumi, n'obwa kerubi ow'o kubiri butyo. ²⁷ N'ateeka bakerubi mu nyumba ey'omunda: n'ebiwawa bya bakerubi byabbaire bibambiibwe bityo ekiwawa ky'omumu n'okukwata ne kikwata ku kisenge eruuyi, n'ekiwawa kya kerubi ow'o kubiri ne kikwata ku kisenge eruuyi; n'e biwawa byabwe ne bikwataganira wakati w'e nyumba. ²⁸ Bakerubi n'ababikaku zaabu. ²⁹ N'ayola ku bisenge byonabyona eby'e nyumba okwetooloola enjola egya bakerubi n'e nkindu n'e bimuli ebyanjulukukire, munda n'e wanza. ³⁰ Ne wansi w'e nyumba n'abiikaku zaabu, munda n'e wanza. ³¹ N'awayingirirwa awayemebwa okutumula n'a kolawo engigi egy'e misaale egy'e mizeyituuni; akabuno n'e mifuubeeto kyabbaire kitundu kyo kutaanu kye kisenge. ³² Awo n'akola enjigi ibiri egy'emisaale egy'e mizeyituuni; n'agyoolaku enjola bakerubi n'e nkindu n'e bimuli ebyanjulukusye, n'agibikaku zaabu; n'ayaliira zaabu ku bakerubi n'o ku nkindu. ³³ Era atyo n'akolera omuzigo ogwa wankaaki wa yeekaalu emifuubeeto gye mizeyituuni, ku kitundu ky'e kisenge eky'okuna; ³⁴ n'e njigi ibiri gye miberosi; embaawo gyombiri egy'olwigi olumu nga gikyuka, n'e mbaawo gyombiri egy'o lwigi olw'o kubiri nga gikyuka. ³⁵ N'ayolaku bakerubi n'e nkindu n'e bimuli ebyanjulukusye: n'abibiikaku zaabu eyanyigiriziibwe ku mulimu ogw'e njola. ³⁶ N'azimba oluya olw'o munda n'e mbu isatu egy'amabbaale amabaize, n'o lubu olw'e misaale egy'e mivule. ³⁷ Ne bateekawo emisingi gy'e nyumba ya Mukama mu mwaka ogw'o kuna, mu mwezi Zivu. ³⁸ No mu mwaka ogw'e ikumi n'o gumu, mu mwezi buli, niigwo mwezi ogw'o munaana, ni bamala enyumba mu bitundu byayo byonabyona, era ng'e mbala yaayo yonayona bwe yabbaire. atyo yamalire emyaka musanvu okugizimba.