¹ Awo kabaka Sulemaani n'abba kabaka wa Isiraeri yenayena. ² Era bano niibo bakulu be yabbaire nabo; Azaliya mutaane wa Zadooki, kabona; ³ Erikolefu no Akiya, bataane ba Sisa, abawandiiki; Yekosafaati mutaane wa Akirudi, omwijukirya; ⁴ n'o Benaya mutaane wa Yekoyaada niiye yabbaire omukulu w'e igye; n'o Zadooki n'o Abiyasaali niibo Babbaire bakabona; ⁵ n'o Azaliya mutaane wa Nasani niiye yabbaire omukulu w'abaami; n'o Zabudi mutaane wa Nasani niiye yabbaire abona, mukwanu gwa kabaka; ⁶ n'o Akisaali niiye yabbaire saabakaaki; n'o Adoniraamu mutaane wa Abuda niiye yabbaire omusolooza. ⁷ Era Sulenaani yabbaire n'a baami ikumi na babiri abaakulira Isiraeri yenayena, ababoneranga kabaka n'a b'o mu nyumba ye ebyokulya: buli muntu kyamugwaniire okusoloozerya omwezi gumu buli mwaka. ⁸ Na gano niigo maina gaabwe: Benikuli, mu nsi ey'e nsozi eya Efulayimu: ⁹ Benidekeri, mu Makazi, n'o mu Saalubinu n'o mu Besusemesi n'o mu Eronubesukanani: ¹⁰ Benikesedi, mu Alubbosi; Soko kyabbaire kikye, n'ensi yonayona ey'e Kefera: ¹¹ Beniyabiyadabu, mu kifo kyonakyona ekigulunivu eky'e Doli; niiye yafumbiirwe Tafasi muwala wa Sulemaani: ¹² Baana mutaane wa Akirudi, mu Taanaki n'o Megiddo, n'e Besuseyani ekiri ku mbali kw'e Zalesani, wansi w’e Yezuleeri, okuva ku Besuseyani okutuuka ku Aberumekola, okubita ku Yokumeyamu: ¹³ Benigeberi, mu Lamosugireyaadi; ebibuga bya Yayiri mutaane wa Manase ebiri mu Gireyaadi byabbaire bibye; eisaza Alugobu eriri mu Basani lyabbaire lirye, ebibuga ebinene nkaaga ebyabbaire bugwe n'ebisiba eby'e bikomo: ¹⁴ Akinadaabu mutaane wa Ido, mu Makanayimu: ¹⁵ Akimaazi, mu Nafutaali; yena yafumbiirwe Basemasi muwala wa Sulemaani: ¹⁶ Baana mutaane wa Kusaayi, mu Aseri n'o mu Beyaloosi: ¹⁷ Yekosafaati mutaane wa Paluwa, mu Isakaali: ¹⁸ Simeeyi mutaane wa Era, mu Benyamini: ¹⁹ Geberi mutaane wa Uli, mu nsi ye Gireyaadi, ensi ye Sikoni kabaka w'Abamoli n'o Ogi kabaka w'e Basani; yeena yabbaire omwami yenka ebbaire mu nsi. ²⁰ Yuda n'o Isiraeri Babbaire bangi, ng'omusenyu oguli ku itale ly'e nyanza obungi, nga balya era nga banywa era nga basanyuka. ²¹ Awo Sulemaani n'afuga obwakabaka bwonabwona okuva ku Mwiga okutuuka ku nsi ey'Abafirisuuti, n'okutuuka ku nsalo ey'e Misiri: baleetanga ebirabo, ni baweererya Sulemaani enaku gyonagona egy'o bulamu bwe. ²² Awo eby'o ku lunaku olumu bye baasolozeryanga Sulemaani byabbaire ebigero eby'o bwita obusa asatu, n'e bigero eby'o bwita nkaaga; ²³ ente egye isava ikumi, n'e nte egyaviire mu irisiryo abiri, n'e ntama kikumi, obutateekaku njaza ni mpuuli ne nangaazi ne nkoko gye baasavuwalyanga. ²⁴ Kubanga yafuganga ensi yonayona eri emitala w'eno w'Omwiga, okuva e Tifusa okutuuka e Gaaza, ng'afuga bakabaka bonabona Ababbaire emitala w'eno w'Omwiga: era yabbaire n'emirembe enjuyi gyonagona okumwetooloola. ²⁵ Yuda n'e Isiraeri yenayena ne batyama mirembe, buli muntu wansi w'o muzabbibu gwe n'o mutiini gwe, okuva e Daani okutuuka e Beeruseba, emirembe gyonagyona egya Sulemaani. ²⁶ Era Sulemaani yabbaire n'e bisibo by'e mbalaasi emitwalo ina olw'amagaali ge; n'a basaiza abeebagaire embalaasi omutwalo gumu mu nkumi ibiri. ²⁷ Abaami abo ni baboneranga kabaka Sulemaani n'abo bonabona abaizire ku meenza ya kabaka Sulemaani ebyokulya, buli muntu mu mwezi gwe: tibaaganyanga kintu kyonakyona kugotawo. ²⁸ Era baaleetanga ne sayiri n'e isubi olw'e mbalaasi n'e nsolo egy'e mbiro mu kifo abaami gye babbaire, buli muntu ng'o mulimu bwe gwabbaire gwe yalagiirwe. ²⁹ Katonda n'awa Sulemaani amagezi n'okutegeera kungi inu, n'o mwoyo omukulu, ng'o musenyu oguli ku itale ly'e nyanza. ³⁰ Amagezi ga Sulemaani ne gasinga amagezi gonagona ag'a baana b'e buvaisana, n'a magezi gonagona ag'e Misiri. ³¹ Kubanga yasingire abantu bonabona amagezi; yasingire Esani Omwezulaki n'o Kemani n'o Kalukoli n'o Daluda, bataane ba Makoli: eriina lye ne lyatiikirira mu mawanga gonagona ageetooloire. ³² N'atumula engero enkumi isatu: n'enyembo niigyo gyabbaire lukumi na itaanu. ³³ N'atumula ku musaale, okuva ku muvule oguli ku Lebanooni okutuuka ku ezobu amera ku bugwe: yatumwire n'o ku nsolo n'e nyonyi n'e byewalula n'e bye nyanza. ³⁴ Awo ni waiza ku mawanga gonagona okuwulira amagezi ga Sulemaani, nga bava eri bakabaka bonabona ab'e nsi, ababbaire bawuliire ku magezi ge.