¹ Awo Benikadadi kabaka w’e Busuuli n'akuŋaanya eigye lye lyonalyona: ni wabba wamu naye bakabaka asatu mu babiri n'e. mbalasi n'amagaali: n'ayambuka n'azingizya Samaliya n'alwana nakyo. ² N'atumira Akabu kabaka wa Isiraeri ababaka mu kibuga, n'a mukoba nti atyo bw'atumula Benikadadi nti ³ Efeeza yo n'ezaabu yo yange; n'a bakali bo boona n'abaana bo, abasinga obusa, bange. ⁴ Awo kabaka wa Isiraeri n'airamu n'atumula nti kiri ng'e kigambo kyo, mukama wange, ai kabaka; ninze wuwo ne byonabyona bye nina. ⁵ Awo ababaka ni bairawo ni batumula nti atyo bw'atumula Benikadadi nti Okutuma nakutumira nga ntumula nti oliwaayo gye ndi efeeza y'o n'ezaabu yo na bakali bo n'a baana bo; ⁶ naye ndikutumira abaidu bange amakeeri bwe bulibba nga kampegaanu, kale balikebera enyumba yo n'e nyumba gy'a baidu bo; awo olulituuka kyonakyona ekisanyusa amaiso go balikiteeka mu mukono gwabwe ni bakitwala. ⁷ Awo kabaka wa Isiraeri n'ayeta abakaire bonanona ab'e nsi, n'atumula nti Mutegeere, mbeegayiriire, mubone omusaiza ono bw'alina ky'atutakirya: kubanga yantumiire olw'abakali bange n'abaana bange n'e feeza yange n'e zaabu yange; ni ntamwima. ⁸ Awo abakaire bonabona n'abantu bonabona ne bamukoba nti Towulira so toikirirya. ⁹ Kyeyaviire akoba ababaka ba Benikadadi nti koba mukama wange kabaka nti Byonabyona bye wasookeireku okutumira omwidu wo ndibikola: naye kino tinsobola kukikola. Ababaka ne baaba ni bamwiriirya ebigambo. ¹⁰ Awo Benikadadi n'a mutumira n'atumula nti Bakatonda bankole batyo n'okusingawo, enfuufu ey'e Samaliya bw'eribuna abantu bonabona abasengererya okubba embatu. ¹¹ Awo kabaka wa Isiraeri n'a iramu n'atumula nti mumukobe nti Eyeesiba ebyokulwanisya bye aleke okwenyumirirya ng'oyo abyesumulula. ¹² Awo olwatuukire Benikadadi bwe yawuliire ekigambo ekyo, bwe yabbaire ng'anywira, iye na bakabaka abo, mu weema, n'akoba abaidu be nti Musimbe enyiriri. Ni basimba enyiriri okulwana n’ekibuga. ¹³ Kale, bona, nabbi n'asemberera Akabu kabaka wa Isiraeri, n'atumula nti Atyo bw'atumula Mukama nti oboine ekibiina kino kyonakyona ekinene? Bona, nakigabula mu mukono gwo watyanu; wena wamanya nga ninze Mukama. ¹⁴ Akabu n'atumula nti Eri ani? N'atumula nti Atyo bw'atumula Mukama nti eri abaisuka ab'abakulu b'amasaza. Awo n'atumula nti yani eyasooka okulwana? N'airamu nti niiwe. ¹⁵ Awo n'ayolesya abaisuka ab'abakulu b'amasaza, ne babba bibiri mu asatu na babiri: awo oluvannyuma lwabwe n'ayolesya abantu bonabona, abaana ba Isiraeri bonabona, niiko kasanvu. ¹⁶ Awo ni batabaala mu iyangwe. Naye Benikadadi yabbaire ng'ali mu weema ng'anywa omwenge ng'atamiira, iye n'o bakabaka, bakabaka asatu na babiri beyabbaire alagaine nabo balimukutamira. ¹⁷ Awo abaisuka ab'abakulu b'amasaza niibo baasookere okutabaala; Benikadadi n'atuma, ni bamukobera nti Waliwo abasaiza abafulumire mu Samaliya. ¹⁸ N'atumula nti ne bwe babba bafulumire mirembe, mubawambe; ne bwe babba bafulumire bulwa, mubawambe. ¹⁹ Awo abo ni bafuluma mu kibuga, abaisuka ab'abakulu b'a masaza, n'eigye eryabasengereirye. ²⁰ Ni baita buli muntu musaiza we; Abasuuli ni bairuka, Isiraeri ni babasengererya: Benikadadi kabaka w'e Busuuli n'awonera ku mbalaasi wamu n'abeebagala embalaasi. ²¹ Awo kabaka wa Isiraeri n'afuluma n'akubba embalaasi n'amagaali, n'aita Abasuuli olwita lunene. ²² Awo nabbi n'asemberera kabaka wa Isiraeri n'amukoba nti wenywezye oiremu amaani weetegereze obone byewakola: kubanga omwaka bwe guliira kabaka w'e Busuuli alikutabaala. ²³ Awo abaidu ba kabaka w'e Busuuli ne bamukoba nti Katonda waabwe katonda w'o ku nsozi; kyebaaviire batusinga amaani: naye tulwanire nabo mu lusenyu, kale titulireka kubasinga ibo amaani. ²⁴ Era kola kino; toolawo bakabaka buli muntu mu kifo kye, oteekewo mu kifo kyabwe abaami: ²⁵ era weebalire eigye erifaanana eigye lye wafiiriirwe, embalaasi okwira mu kifo ky'embalaasi, n'eigaali okwiira mu kifo ky'eigaali: kale tulirwanira nabo mu lusenyu, era tetulireka kubasinga amaani. Awo n'awulira eidoboozi lyabwe n'akola atyo. ²⁶ Awo olwatuukiire omwaka bwe gwairire Benikadadi n’ayolesya Abasuuli n'ayambuka n'ayaba e Afeki okulwana n'e Isiraeri. ²⁷ Awo abaana ba Isiraeri ni bayolesebwa ni baweebwa entanda yaabwe, ne babatabaala: awo abaana ba Isiraeri ni basiisira okuboolekera nga bafaanana ebisibo bibiri ebitono eby'a baana b'e mbuli: naye Abasuuli ni babuna ensi. ²⁸ Awo omusaiza wa Katonda n'a sembera n'akoba kabaka wa Isiraeri n'atumula nti Atyo bw'atumula Mukama nti Kubanga Abasuuli batumwire nti Mukama katonda wo ku nsozi, naye ti katonda w' mu biwonvu; kyendiva ngabula mu mukono gwo ekibiina kino kyonakyona ekinene, mwena mulimanya nga ninze Mukama. ²⁹ Awo ne basiisira nga babonagana ne bamala enaku musanvu. Awo olwatuukire ku lunaku olw'omusanvu ne balumbagana; abaana ba Isiraeri ne baita ku Basuuli Abasaiza abatambula n'ebigere kasiriivu ku lunaku lumu. ³⁰ Naye abandi ne bairukira e Afeki mu kibuga; awo bugwe n'agwa ku basaiza emitwaalo ibiri mu kasanvu abasigairewo. N'o Benikadadi n'airuka n'atuuka mu kibuga mu kisenge eky'omunda. ³¹ Abaidu be ni bamukoba nti bona, tuwuliire nga bakabaka b'e nyumba ya Isiraeri bakabaka be kisa: tukwegayiriire, twambale ebinyakinyaki mu nkende n'emiguwa ku mitwe gyaisu, tufulume eri kabaka we Isiraeri: koizi yawonya obulamu bwo. ³² Awo ni beesiba ebinyakinyaki mu nkende ni batiikira emigwa ku mitwe, ni baiza eri kabaka w'e Isiraeri, ne batumula nti Omwidu wo Benikadadi atumula nti Nkwegayiriire, mbe omulamu. N'atumula nti akaali mulamu? Niiye mugande wange. ³³ Awo Abasaiza ne balabirira inu ne banguwa okwetegereza oba nga bw'ataka atyo; ne batumula nti Mugande wo Benikadadi. Awo n'atumula nti Mwabe mumuleete. Awo Benikadadi n'afuluma n'aiza gy'ali; n'amuniinisya mu igaali. ³⁴ Awo Benikadadi n'amukoba nti ebibuga itawange bye yatoire ku itaawo nze ndibiiryayo; era olyerimira enguudo mu Damasiko, nga itawange bwe yeerimiire mu Samaliya. Nzena, bwe yatumwire Akabu, nakuta ne ndagaanu eno. Awo n'alagaana naye endagaanu n'amwita. ³⁵ Awo omusaiza omumu ow'o ku baana ba banabbi n'akoba mwinaye olw'e kigambo kya Mukama nti nsumita, nkwegayiriire. Omusaiza n'agaana okumusumita. ³⁶ Awo n'a mukoba nti Kubanga towuliire idoboozi lya Mukama, bona, bwewabba nga wakaiza onveeku, empologoma yakwita. Awo bwe yabbaire nga yakaiza amuveeku, empologoma n'emusanga n'emwita. ³⁷ Awo n'asanga omusaiza ogondi, n'atumula nti nsumita, nkwegayiriire. Omusaiza n'amusumita ng'amusumita ekiwundu. ³⁸ Awo nabbi n'ayaba n'alindirira kabaka mu ngira, ni yeefuula ng'abiikire ekiremba kye ku maiso ge. ³⁹ Awo kabaka bwe yabbaire abitawo, n'akungirira kabaka: n'atumula nti Omwidu wo yafulumire wakati mu lutalo; kale, bona, omusaiza n'akyama n'andeetera omusaiza n'atumula nti Kuuma omusaiza ono: okubona bw'alibba ng'agotere, kale obulamu bwo bulibba mu kifo ky'obulamu bwe, oba oliriwa talanta ey'efeeza. ⁴⁰ Awo omwidu wo bwe yabbaire ng'atawaana eruuyi n'eruuyi, ng'ayabire. Awo kabaka wa Isiraeri n'amukoba nti era gutyo bwe gwabba omusango gwo; iwe ogusalire iwe mwene. ⁴¹ Awo n'ayanguwa n'atoola ekiremba ku maiso ge; kabaka wa Isiraeri n'amutegeera nga wo ku banabbi. ⁴² N'amukoba nti Atyo bw'atumula Mukama nti Kubanga waitire omusaiza ow'e nkwe gye ndi okuva mu mukono gwo, obulamu bwo kyebuliva bubba mu kifo ky'o bulamu bwe, n'abantu bo balibba mu kifo ky'a bantu be. ⁴³ Awo kabaka wa Isiraeri n'ayaba mu nyumba ye, ng'anyiikaire era ng'anyiigire, n'aiza e Samaliya.