¹ Awo Akabu n'akobera Yezeberi byonabyona Eriya bye yakolere era bwe yaitire banabbi bonabona n'ekitala. ² Awo Yezeberi n'atumira Eriya omubaka ng'atumula nti bakatonda bankole batyo n'okusingawo, bwe ntalifuula obulamu bwo okubba ng'obulamu bw'o mumu ku ibo amakeeri bwe bulibba nga kampegaanu. ³ Awo bwe yaboine ekyo n'agolokoka n'ayaba olw'obulamu bwe, n'aiza e Beeruseba ekye Yuda, n'alekayo omwidu we. ⁴ Naye iye mwene n'atambula olugendo olw'olunaku lumu mu idungu, n'aiza n'atyama wansi w'o mwoloola: ni yeesabira okufa; n'atumula nti kyamala; atyanu, ai Mukama, ntoolaku obulamu bwange; kubanga tindinga bazeiza bange obusa. ⁵ N'agalamira na gona wansi w'omwoloola; kale, bona malayika n'amukomaku, n'amukoba nti Golokoka olye. ⁶ N'amoga, kale, bona, omugaati nga guli awali omutwe gwe ogwokyeibwe ku manda n'akacupa ak'amaizi. N'alya n'anywa n'agalamira ate. ⁷ Malayika wa Mukama n'aiza ate omulundi ogw'okubiri n'amukomaku n'atumula nti golokoka olye; kubanga olugendo lukuyingire obunene. ⁸ N'agolokoka n'alya n'anywa, n'atambula mu maani ag'e mere eyo enaku ana emisana n'obwire n'atuuka e Kolebu olusozi lwa Katonda. ⁹ N'atuukayo n'ayingira mu mpuku, n'agona omwo; kale, bona, ekigambo kya Mukama ne kimwizira, n'amukoba nti okola ki wano, Eriya? ¹⁰ N'atumula nti Nkwatiibwe eiyali lingi ku lwa Mukama Katonda ow'eigye; kubanga abaana ba Isiraeri balekere endagaanu yo, baswire ebyoto byo, era balekere banabbi bo n'ekitala: nzena, ninze nzenka, ninze nsigairewo; n'obulamu bwange babusagira okubutoolawo. ¹¹ N'atumula nti Fuluma oyemerere ku lusozi mu maiso ga Mukama. Kale, bona, Mukama n'abitawo, empunga nyingi egy'a maani ni gimenya ensozi ne gyasa enjazi mu maiso ga Mukama; naye Mukama nga abula mu mpunga: awo oluvanyuma lw'e mpunga kikankano ky'e nsi; naye Mukama nga abula mu kikankano ky'e nsi: ¹² awo oluvanyuma lw'ekikankano musyo; naye Mukama ng'abula mu musyo: awo oluvanyuma lw'o musyo idoboozi itono lye igonjebwa. ¹³ Awo olwatuukire Eriya bwe yaliwuliire, ne yeebiika amaiso ge mu munagiro, n'afuluma n'ayemerera mu mulyango gw'empuku. Kale, bona, ne wamwizira eidoboozi, ne ritumula nti Okola ki wano, Eriya? ¹⁴ N'atumula nti Nkwatiibwe eiyali lingi ku lwa Mukama Katonda ow'eigye; kubanga abaana ba Isiraeri balekere endagaanu yo; baswire ebyoto byo, era baitire banabbi bo n'ekitala; nzena, ninze nzenka, ninze nsigairewo; n'o bulamu bwange babusagira okubutoolawo. ¹⁵ Awo Mukama n'amukoba nti yaba oireyo mu ngira yo eri eidungu ery'e Damasiko: kale bw'olituuka ofukanga amafuta ku Kazayeeri okubba kabaka w'e Busuuli: ¹⁶ n'o Yeeku mutaane wa Nimusi omufukangaku amafuta okubba kabaka wa Isiraeri: n'e Erisa mutaane wa Safati ow'e Aberumekola omufukangaku amafuta okubba nabbi mu kifo kyo. ¹⁷ Awo olulituuka oyo yawonanga ekitala kya Kazayeeri Yeeku yamwitanga: n'oyo yawonanga ekitala kya Yeeku Erisa yamwitanga. ¹⁸ Era yeena ndyesigalilya akasanvu mu Isiraeri amakumbo gonagona agatafukaamiriranga Baali na buli mumwa ogutamunywegeranga. ¹⁹ Awo n'avaayo n'asanga Erisa mutaane wa Safati eyabbaire ng'alima ng'alina mu maiso ge emigogo gy'e nte ikumi na ibiri, iye ng'alina ogw'eikumi n'eibiri: awo Eriya n'asomoka okwaba gy'ali n'amusuulaku omunagiro gwe. ²⁰ Awo n'aleka ente, n'airuka mbiro okusengererya Eriya, n'atumula nti nkwegayiriire, ka male okunywegera itawange n'o mawange, kaisi nkusengererye. N'amukoba nti Irayo; kubanga nkukolere ki? ²¹ N'airayo n'atamusengererya n'airira omugogo gw'ente n'agiita, n'afumba enyama yaagyo n'e bintu eby'e nte, n'agabira abantu ni balya. Awo n'agolokoka n'asengererya Eriya n'amuweererya.