¹ Awo olwatuukire enaku nyingi bwe gyabitirewo, ekigambo kya Mukama ni kimwizira Eriya mu mwaka ogw'okusatu nga kitumula nti yaba weerage eri Akabu; nzena nditonyesya amaizi ku nsi. ² Awo Eriya n'ayaba okweraga eri Akabu. Era enjala ng'enyiikiire inu mu Samaliya. ³ Awo Akabu n'ayeta Obadiya eyabbaire saabakaaki. (Era Obadiya yatiire inu Mukama: ⁴ kubanga olwatuukire Yezeberi bwe yamalirewo banabbi ba Mukama, Obadiya n'airira banabbi kikumi n'abagisa mu mpuku ataanu ataanu, n'abaliisyanga n'e migaati n'amaizi.) ⁵ Awo Akabu n'akoba Obadiya nti yaba obune ensi eri ensulo gyonagyona egy'a maizi n'eri obwiga bwonabona: koizi tulibona omwido nituwonya embalaasi n'e nyumbu okufa tuleke okufiirwa ensolo gyonagyona. ⁶ Awo ni bagabana ensi bombiri okugibuna: Akabu ng'akwata engira ye iye, n'o Obadiya ng'a kwata engira ye iye. ⁷ Awo Obadiya ng'ali mu ngira, bona, Eriya n'amusanga: n'a mumanya n'a vuunama amaiso ge n'atumula nti niiwe ono, mukama wange Eriya? ⁸ N'amwiramu nti ninze ono: yaba okobere mukama wo nti Bona, Eriya ali wano. ⁹ N'atumula nti nyonoonere mu ki, n'otaka okuwaayo omwidu wo mu mukono gwa Akabu okungita? ¹⁰ Nga Mukama Katonda wo bw'ali omulamu, wabula igwanga waire obwakabaka mukama wange gy'ataatuma okunsagira: awo bwe batumulanga nti Tali wano, n'alayirya obwakabaka obwo n'eigwanga nga tebamuboine. ¹¹ Kale atyanu otumwire nti Yaba okobere mukama wo nti bona, Eriya ali wano. ¹² Kale olulituuka nga nakaiza nkuveeku kale omwoyo gwa Mukama gwakutwala gye ntamaite; kale bwe ndituuka ne nkobera Akabu n'atasobola kukubona, alingita: naye ninze omwidu wo ntya Mukama okuva mu butobuto bwange. ¹³ Tikikoberwanga mukama wange kye nakolere, Yezeberi bwe yaitire banaabbi ba Mukama, bwe nagisire abasaiza kikumi ku banabbi ba Mukama mu mpuku ataanu ataanu, ni mbaliisya emigaati n’a maizi? ¹⁴ Kale atyanu otumwire nti Yaba okobere mukama wo nti bona, Eriya aliwanu: kale anangita. ¹⁵ Awo Eriya n'atumula nti nga Mukama ow'e igye bw'ali omulamu, gwe nyemerera mu maiso ge, tinaleke kweraga eri iye atyanu. ¹⁶ Awo Obadiya n'ayaba okusisinkana Akabu n'amukobera: Akabu n'ayaba okusisinkana Eriya. ¹⁷ Awo olwatuukire Akabu bwe yaboine Eriya Akabu n'amukoba nti niiwe ono, wena ateganya Isiraeri? ¹⁸ N'airamu nti nze nkaali kuteganya Isiraeri; naye iwe n'e nyumba ya itaawo, kubanga mwalekere ebiragiro bya Mukama, n'o sengererya Babaali. ¹⁹ Kale tuma okuŋaanyirye gye ndi Isiraeri yenayena ku lusozi Kalumeeri n'a banabbi ba Baali ebina mu ataanu n's banabbi ba Baaseri ebina abalya ku meenza ya Yezeberi. ²⁰ Awo Akabu n'atumira abaana ba Isiraeri bonabona n'akuŋaanyirya banabbi ku lusozi Kalumeeri. ²¹ Awo Eriya n'asemberera abantu bonabona, n’atumula nti Mulituukya waina okwita aga n'aga nga mulowooza wabiri? Mukama oba niiye Katonda, mumusengererye: naye oba Baali, kale mumusengererye iye. Abantu ni batamwiramu kigambo. ²² Awo Eriya n'akoba abantu nti ninze nzenka ninze nsigairewo nabbi wa Mukama; naye banabbi ba Baali Abasaiza ebina mu ataanu. ²³ Kale batuwe ente ibbiri; beerobozye ente imu okubba eyaabwe, bagitemeeteme, bagiteeke ku nku, so tibateeka musyo wansi: nange nalongoosya ente ey'okubiri, ne ngiteeka ku nku, ni ntateeka musyo wansi. ²⁴ Kale imwe mukungirire eriina lya katonda wanyu, nzena nakungirira eriina lya Mukama: kale Katonda eyairamu n'o musyo oyo abbe Katonda. Awo abantu ni bairamu ni batumula nti Otumwire kusa. ²⁵ Awo Eriya n'akoba banabbi ba Baali nti Mwerobozye ente imu okubba eyanyu, musooke okugirongoosya; kubanga muli bangi; mukungirire eriina lya katonda wanyu, naye timuteeka musyo wansi. ²⁶ Ne bairira ente gye baweweibwe, ne bagirongoosya, ne bakungirira eriina lya Baali okuva Amakeeri okutuusya mu iyangwe, nga batumula nti Ai Baali, tuwulire. Naye ne watabba idoboozi waire airamu n'o mumu. Ne babuuka awali ekyoto ekyakoleibwe. ²⁷ Awo olwatuukire mu iyangwe Eriya n'abaduulira n'atumula nti Mutumulire waigulu: kubanga katonda; oba afumiintirirya oba akyamire oba ali mu lugendo oba koizi agonere, kigwaniire okumuzuukukya. ²⁸ Ni batumulira waigulu ni beesala n'o bwambe n'a masimu ng'e ngeri yaabwe bwe yabbaire okutuusya omusaayi lwe gwakulukutiire ku ibo. ²⁹ Awo olwatuukire eiyangwe bwe lyabbaire limenyekere, ni balagula okutuusya ekiseera eky'okuwaayo ekitone eky'o lweigulo; naye ni watabba idoboozi waire airamu n'o mumu waire ateekayo omwoyo. ³⁰ Awo Eriya n'akoba abantu bonabona nti munsemberere; abantu bonabona ne bamusemberera. N'adaabirirya ekyoto kya Mukama ekyabbaire kisuuliibwe. ³¹ Awo Eriya n'airira amabbaale ikumi n'amabiri ng'o muwendo bwe guli ogw'e bika by'a baana ba Yakobo eyaiziirwe ekigambo kya Mukama nga kitumula nti Isiraeri niilyo eryabanga eriina lyo. ³² N'azimba amabbaale okubba ekyoto mu liina lya Mukama, n'asima olusalosalo okwetooloola ekyoto, obunene bwa lwo olutuukamu ebigero bibiri eby'e nsigo. ³³ N'atindikira enku, n'atemaatema ente, n'agiteeka ku nku. N'atumula nti mwizulye amapipa ana amaizi, mugafuke ku kiweebwayo ekyokyebwa n'o ku nku. ³⁴ Awo n'atumula nti mukole mutyo omulundi ogw'o kubiri; ni bakola batyo omulundi ogw'okubiri. N'atumula nti Mukole mutyo omulundi ogw'o kusatu; ni bakola batyo omulundi ogw'okusatu. ³⁵ Amaizi ne gakulukuta okwetooloola ekyoto; n'aizulya n'olusalosalo amaizi. ³⁶ Awo olwatuukire mu kiseera eky'okuwaayo ekitone eky'olweigulo Eriya nabbi n'asembera n'atumula nti Ai Mukama Katonda wa Ibulayimu, owa Isaaka n'o Isiraeri, kitegeerebwe watyanu nga niiwe Katonda mu Isiraeri, era nga nze ndi mwidu wo, era nga nkolere bino byonabyona lwe kigambo kyo. ³⁷ Mpulira, ai Mukama, mpulira, abantu bano bamanye nga niiwe, Mukama, niiwe Katonda, era ng'okyusirye emyoyo gyabwe okwirayo. ³⁸ Awo omusyo gwa Mukama ni gugwa ni gwokya ekiweebwayo ekyokyebwa n'enku N'amabbaale n'e nfuufu, ni gukombera dala amaizi agaali mu lusalosalo. ³⁹ Awo abantu bonabona bwe bakiboine ne bavuunama amaiso gaabwe: ne batumula nti Mukama niiye Katonda; Mukama niiye Katonda. ⁴⁰ Awo Eriya n'abakoba nti Mukwate banabbi ba Baali: waleke okuwona n'o mumu. Ni babakwata: Eriya n'abaserengetya eri akaiga Kisoni n'abaitira eyo. ⁴¹ Awo Eriya n'akoba Akabu nti golokoka olye onywe; kubanga waliwo okuwuuma kw'amaizi kungi. ⁴² Awo Akabu n’agolokoka okulya n'okunywa. Eriya n'aniina ku ntiiko ya Kalumeeri; n'avuunama ku itakali, n'ateeka amaiso ge wakati w'a makumbo ge. ⁴³ N'akoba omwidu we nti Yambuka olengere awali enyanza. N'a niina n'alengera n'atumula nti Wabula kintu. N'atumula nti Yaba ate emirundi musanvu. ⁴⁴ Awo olwatuukire omulundi ogw'omusanvu, n'atumula nti bona, ekireri kiniina nga kiva mu nyanza ekiri ng'omukono gw'o muntu obutono. N'atumula nti Yambuka okobe Akabu nti teekateeka eigaali lyo, oserengete, amaizi galeke okukuziyizya. ⁴⁵ Awo olwatuukire ekiseera kitono bwe kyabitirewo, eigulu ne rigega ebireri n'e mpunga, ni wabba amaizi mangi. Akabu n'a niina mu igaali n'ayaba e Yezuleeri. ⁴⁶ Omukono gwa Mukama ni gubba ku Eriya; ni yeesiba ekimyu n'airukira mu maiso ga Akabu okutuusya awayingirirwa e Yezuleeri.