¹ Awo Eriya Omutisubi, eyabbaire ku abo abaatyama e Gireyaadi, n'akoba Akabu nti Mukama Katonda wa Isiraeri nga bw'ali omulamu gwe nyemerera mu maiso ge, tiwaabbenga musulo waire amaizi mu myaka gino, wabula ng'e kigambo kyange bwe kiri. ² Awo ekigambo kya Mukama ne kimwizira nga kitumula nti ³ Va wano okyuke oyabe ebuvaisana wegise awali akaiga Kerisi akoolekera Yoludaani. ⁴ Awo olulituuka onywiranga mu kaiga; era ndagiire bawaikoova okukuliisirya eyo. ⁵ Awo n'ayaba n'akola ng'e kigambo kya Mukama bwe kyabbaire: kubanga yayabire n'abba awali akaiga Kerisi akoolekera Yoludaani. ⁶ Awo bawaikoova ne bamuleeteranga emere n'e nyama amakeeri, n'e mere n'e nyama olweigulo; n'anywanga mu kaiga. ⁷ Awo olwatuukire iraaki akaiga ni kakala olw'o butabba maize mu nsi. ⁸ Awo ekigambo kya Mukama ne kimwiziira nga kitumula nti ⁹ Golokoka oyabe e Zalefaasi ekya Sidoni, obbe eyo: bona, ndagiire omukali na mwandu ali eyo okukuliisyanga. ¹⁰ Awo n'agolokoka n'ayaba e Zalefaasi: awo bwe yatuukire ku wankaaki w'e kibuga, bona, omukali namwandu ng'ali eyo ng'alonda enku: n'amweta n'atumula nti nkwegayiriire, nsyomera otwizi mu kibya, nywe. ¹¹ Awo ng'ayaba okugasyoma, n'amweta n'atumula nti nkwegayiriire, ndeetera akamere mu mukono gwo. ¹² N'atumula nti nga Mukama Katonda wo bw'ali omulamu, mbula mugaati, wabula olugalo lw'o bwita mu pipa n'o tufuta mu kacupa: era, bona, ntyaba enku ibiri nyingire neefumbire nze n'o mwana wange, tubulye tufe. ¹³ Awo Eriya n'amukoba nti Totya; yaba okole nga bw'otumwire: naye sooka obunfumbiremu akagaati, okaleete gye ndi, oluvanyuma weefumbire wenka n'o mwana wo. ¹⁴ Kubanga atyo bw'atumula Mukama Katonda wa Isiraeri nti epipa ey'o bwita terikendeera so n'akacupa k'a mafuta tekaliwaawo, okutuusya ku lunaku Mukama lw'alitonyeserya amaizi ku nsi. ¹⁵ Awo n'ayaba n'akola nga Eriya bw'atumwire: omukali yena n'e nyumba ye ni baliira enaku nyingi. ¹⁶ Epipa ey'obwita teyakendeire so n'akacupa k'amafuta tekaweirewo ng'ekigambo kya Mukama bwe kyabbaire kye yatumiliire mu Eriya. ¹⁷ Awo olwatuukire oluvanyuma lw'ebyo omwana w'o mukali oyo mwene we nyumba n'a lwala; n'e ndwaire ye n'e nyiikira eti n'atabbaamu ate na mwoka. ¹⁸ Awo n'akoba Eriya nti Nfaayo ki eri iwe, niiwe Omusaiza wa Katonda? waizire gye ndi okunjijukirya ekibbiibi kyange n'o kwita omwana wange! ¹⁹ N'amukoba nti mpa omwana wo. N'amutoola mu kifubba kye n'amusitula n'amuniinisya mu nyumba gye yabbangamu n'amuteeka ku kitanda kye iye. ²⁰ N'akungira Mukama, n'atumula nti Ai Mukama Katonda wange, oleetere ekibbiibi n'o ku namwandu angonia ng'oita omwana we? ²¹ Ne yeegolola ku mwana emirundi isatu, ng'akungira Mukama n'atumula nti Ai Mukama Katonda wange, nkwegayiriire, obulamu bw'omwana ono bumwiremu ate. ²² Mukama n'awulira eidoboozi lya Eriya; obulamu bw'o mwana ni bumwiramu ate, n'alama. ²³ Awo Eriya n'airira omwana n'a muserengetya ng'a mutoola mu kisenge n'a muleeta mu nyumba n'amuwa maye: Eriya n'atumula nti bona, omwana wo mulamu. ²⁴ Awo omukali n'akoba Eriya nti atyanu maite ng'oli musaiza wa Katonda, era ng'e kigambo kya Mukama mu munwa gwo niigo mazima.