¹ Awo ekigambo kya Mukama ne kimwizira Yeeku mutaane wa Kanani ku Baasa nga kitumula ² nti Kubanga nakugulumizirye nga nkutoola mu nfuufu ni nkufuula omukulu w'a bantu bange Isiraeri; wena otambuliire mu ngira ya Yerobowaamu n’oyonoonesya abantu bange Isiraeri okunsunguwalya n'e bibbiibi byabwe; ³ Bona, nditoolerawo dala Baasa n'e nyumba ye: era ndifuula enyumba yo okufaanana enyumba ya Yerobowaamu mutaane wa Nebati. ⁴ Owa Baasa yafiiranga mu kibuga embwa gyamulyanga; n'o w'oku babe yafiiranga ku itale enyonyi egy'o mu ibbanga gyamulyanga. ⁵ Era ebikolwa ebindi byonabyona ebya Baasa ne bye yakolere n'a maani ge tebyawandiikiibwe mu kitabo eky'e by'omu mirembe gya bakabaka ba Isiraeri? ⁶ Baasa ne yeekungira wamu na bazeiza be n'aziikibwa e Tiruza: Era mutaane we n'afuga mu kifo kye. ⁷ Era ate ekigambo kya Mukama ni kiiza ku Baasa mu mukono gwa nabbi Yeeku mutaane wa Kanani no ku nyumba ye olw'ebibbibi byonabyona bye yakolere mu maiso ga Mukama okumusunguwalya n'o mulimu gw'e mikono gye ng'afaanana enyumba ya Yerobowaamu era kubanga yamukubbbire. ⁸ Mu mwaka ogw'abiri mu mukaaga ogwa Asa kabaka wa Yuda Era mutaane wa Baasa n'atandika okufugira Isiraeri e Tiruza n'afugira emyaka ibiri. ⁹ Awo omwidu we Zimuli omukulu w'e kitundu ky'amagaali ge n'amwekobaana: era yabbaire ali e Tiruza ng'a nywa omwenge ng'a tamiirira mu nyumba ya Aluza eyabbaire saabakaaki mu Tiruza: ¹⁰ Zimuli n'ayingira n'amusumita n'a mwita mu mwaka ogw'abiri mu musanvu ogwa Asa kabaka wa Yuda, n'afuga mu kiseera kye. ¹¹ Awo olwatuukire bwe yatandikire okufuga, nga yakaiza atyame ku ntebe ye, awo n'aita enyumba yonnayona eya Baasa: teyamusigaliirye mwana w'o bwisuka, waire ku nda gye waire ku mikwanu gye. ¹² Atyo Zimuli bwe yazikiriziiye enyumba yonayona eya Baasa ng'e kigambo kya Mukama bwe kyabbaire kye yatumwire ku Baasa mu Yeeku nabbi, ¹³ olw'ebibbibi byonabyona ebya Baasa, n'e bibbiibi bye Era mutaane we bye bayonoonere era bye bayonooneserye Isiraeri, okusunguwalya Mukama Katonda wa Isiraeri n'ebirerya byabwe. ¹⁴ Era ebikolwa ebindi byonabyona ebya Era ne byonabyona bye yakolere tebyawandiikiibwe mu kitabo eky'e by'omu mirembe gya bakabaka ba Isiraeri? ¹⁵ Mu mwaka ogw'abiri mu musanvu ogwa Asa kabaka wa Yuda Zimuli n'afugira enaku musanvu e Tiruza. Era abantu babbaire basiisiire okulwana n'o Gibbesoni eky'Abafirisuuti. ¹⁶ Awo abantu ababbaire basiisiire ne bawulira nga batumula nti Zimula yeekobaanire era aitire kabaka: Isiraeri yenayena Kyebaviire bafuula Omuli omukulu w'eigye okubba kabaka wa Isiraeri ku lunaku olwo mu lusiisira. ¹⁷ Omuli n'ayambuka ng'ava e Gibbesoni n'e Isiraeri yenayena wamu naye, ne bazingizya Tiruza. ¹⁸ Awo olwatuukire Zimuli bwe yaboine ng'e kibuga kimenyeibwe, n'ayingira mu kifo eky'e nyumba ya kabaka, ne yeeyokyererya n'omusyo mu nyumba ya kabaka n'afa, ¹⁹ olw'ebibbibi bye bye yayonoonere ng'akola ebyabbaire mu maiso ga Mukama Ebibbiibi ng'atambulira mu ngirira ya Yerobowaamu n'o mu kibbiibi kye kye yakolere okwonoonesya Isiraeri. ²⁰ Era ebikolwa ebindi byonabyona ebya Zimuli n'obujeemu bwe bwe yajeemere tibyawandiikiibwe mu kitabo eky'eby'omu mirembe gya bakabaka ba Isiraeri? ²¹ Awo abantu ba Isiraeri ne baawulibwamu ebibiina bibiri: ekitundu ky'abantu nga basengereerya Tibuni mutaane wa Ginasi okumufuula kabaka; n'e kitundu nga basengererya Omuli. ²² Naye abantu abasengereirye Omuli ni basinga abantu abasengereirye Tibuni mutaane wa Ginasi: awo Tibuni n'afa, Omuli n'alya obwakabaka. ²³ Mu mwaka ogw'asatu n'o gumu ogwa Asa kabaka wa Yuda Omuli n'atandika okufuga Isiraeri n'afugira emyaka ikumi n'aibiri: yafugiire emyaka mukaaga e Tiruza. ²⁴ N'agula olusozi Samaliya eri Semeri ne talanta ibiri gye feeza; n'azimba ku lusozi n'atuuma ekibuga kye yazimbiire eriina ng'e riina bwe lyabbaire erya Semeri mwene w'o lusozi Samaliya. ²⁵ Omuli n'akola ebyabbaire mu maiso ga Mukama ebibbiibi n'akola ekyeju okusinga bonabona abaamusookere. ²⁶ Kubanga yatambuliire mu ngira yonayona eya Yerobowaamu mutaane wa Nebati n'o mu bibbiibi bye bye yayonooneserye Isiraeri okusunguwalya Mukama Katonda wa Isiraeri n’ebirerya byabwe. ²⁷ Era ebikolwa ebindi byonabyona ebya Omuli bye yakolere n'amaani ge ge yalagire tibyawandiikiibwe mu kitabo eky'e by'omu mirembe gya bakabaka ba Isiraeri? ²⁸ Awo Omuli ne yeekungira wamu na bazeiza be n'aziikibwa mu Samaliya: Akabu mutaane we n'afuga mu kifo kye. ²⁹ Awo mu mwaka ogw'asatu mu munaana ogwa Asa kabaka wa Yuda Akabu mutaane wa Omuli n'atandika okufuga Isiraeri: Akabu mutaane wa Omuli n'afugira Isiraeri mu Samaliya emyaka abiri na ibiri. ³⁰ Era Akabu mutaane wa Imuli n'akola ebyabbaire mu maiso ga Mukama Ebibbiibi okusinga bonabona abaamusookere. ³¹ Awo olwatuukire, ng'akyeta kigambo kitono okutambulira mu bibbiibi bya Yerobowaamu mutaane wa Nebati, n'akwa Yezeberi muwala wa Esubaali kabaka w'Abasidoni, n'ayaba n'aweererya Baali n'amusinza. ³² Era yasimbiire Baali ekyoto mu isabo lya Baali lye yazimbiire mu Samaliya. ³³ Akabu n'akola Baaseri; Akabu ne yeeyongera ate okukola eby'okusunguwalya Mukama Katonda wa Isiraeri okusinga bakabaka bonabona aba Isiraeri abaamusookere. ³⁴ Ku mirembe gya Kyeri Omubeseri n'azimba Yeriko: yateekerewo emisingi gyakyo n'o kufiirwa Abiraamu omuberyeberye we, n'asimba enjigi gyakyo n'okufiirwa mutaane we omutomuto Segubi, ng'e kigambo kya Mukama bwe kyabbaire kye yatumuliire n'o mukono gwa Yoswa mutaane wa Nuni.