¹ Awo mu mwaka ogw'e ikumi n'o munaana ogwa Yerobowaamu kabaka mutaane wa Nebati, Abiyaamu n'atandika okufuga Yuda. ² Yafugiire emyaka isatu mu Yerusaalemi: n'o maye eriina lye lyabbaire Maaka muwala wa Abisalomu. ³ N'atambulira mu bibiibi byonabyona ebya itaaye bye yakolere okumusooka: n'omwoyo gwe tegwatuukiriire eri Mukama Katonda we ng'o mwoyo gwa Dawudi itaaye. ⁴ Era yena ku lwa Dawudi Mukama Katonda we n'amuwa etabaaza mu Yerusaalemi okuyimusya mutaane we oluvanyuma lwe n'o kunywezya Yerusaalemi: ⁵ kubanga Dawudi yakolanga ebyabbaire mu maiso ga Mukama ebisa, n'atakyuka okuva mu kintu kyonakyona kye yamulagiire enaku gyonagyona egy'o bulamu bwe wabula mu kigambo kya Uliya Omukiiti. ⁶ Awo wabbangawo entalo eri Lekobowaamu n'o Yerobowaamu enaku gyonagyona egy'o bulamu bwe. ⁷ N'ebikolwa ebindi byonabyona ebya Abiyaamu ne byonabyona bye yakolere tebyawandiikiibwe mu kitabo eky'e by'omu mirembe gya bakabaka ba Yuda? Ne wabbanga entalo eri Abiyaamu ne Yerobowaamu. ⁸ Abiyaamu n'agonera wamu na bazeiza be: ni bamuziika mu kibuga kya Dawudi: Asa mutaane we n'afuga mu kifo kye. ⁹ Awo mu mwaka ogw'abiri ogwa Yerobowaamu kabaka wa Isiraeri Asa n'atandika okufuga Yuda. ¹⁰ N'afugira emyaka ana na gumu mu Yerusaalemi: n'o maye eriina lye lyabbaire Maaka muwala wa Abisalomu. ¹¹ Asa n'akola ebyabbaire mu maiso ga Mukama ebisa nga Dawudi itaaye bwe yakolere. ¹² N'abbinga abaalyanga ebisiyaga mu nsi, n'atoolawo ebifaananyi byonabona bazeizabe bye bakolere. ¹³ Era n'o Maaka maye n'amubbinga mu bwa namasole kubanga yabbaire akolere ekifaananyi eky'o muzizyo okubba Asera; Asa n'atema ekifaananyi kye n'akyokyerya ku kaiga Kiduloni. ¹⁴ Naye ebifo ebigulumivu tebyatooleibwewo: naye omwoyo gwa Asa gwatuukiriire eri Mukama enaku gye gyonagyona. ¹⁵ N'ayingirya mu nyumba ya Mukama ebintu itaaye bye yawongere n'e bintu bye yawongere iye mwene, efeeza n'e zaabu n'e bintu. ¹⁶ Ne wabbanga entalo eri Asa ne Baasa kabaka wa Isiraeri enaku gyabwe gyonagyona. ¹⁷ Awo Baasa kabaka wa Isiraeri n'atabaala Yuda, n'a zimba Laama, obutaganya muntu kufuluma waire okuyingira eri Asa kabaka w'e Yuda. ¹⁸ Awo Asa n'airira efeeza yonayona n'ezaabu eyabbaire esigaire mu by'obugaiga eby'o mu nyumba ya Mukama n'eby'obugaiga eby'omu nyumba ya kabaka n'abikwatisya mu mikono gy'a baidu be: kabaka Asa n'a biweererya Benikadadi mutaane wa Tabulimmoni mutaane wa Keziyoni kabaka w'e Busuuli eyabbanga e Damasiko, ng'atumula nti ¹⁹ Waliwo endagaanu eri nze naiwe, eri itawange n'o itaawo: bona, nkuweereirye ekirabo kye feeza n'e zaabu; yaba omenye endagaanu yo eri Baasa kabaka wa Isiraeri anveeku. ²⁰ Awo Benikadadi n'a wulira kabaka Asa, n'atuma abakulu b'e igye lye okulumba ebibuga bya Isiraeri, n'akubba Iyoni n'o Daani n'o Aberubesumaaka n'o Kinerosi yonayona n'e nsi yonayona eya Nafutaali. ²¹ Awo olwatuukire Baasa bwe yakiwuliire n'aleka okuzimba Laama n'abbanga e Tiruza. ²² Awo kabaka Asa n'alangira Yuda yenayena; wabula eyatoleibweku; ne batoolawo Amabbaale ag'e Laama, n'e misaale gyakyo, Baasa bye yazimbisirye; kabaka Asa n'a bizimbisya Geba ekya Benyamini ne Mizupa. ²³ Era ebikolwa ebindi byonabona ebya Asa n'amaani ge gonagona ne byonabona bye yakolere n'ebibuga bye yazimbire tebyawandiikiibwe mu kitabo eky'e by'omu mirembe gya bakabaka ba Yuda? Naye mu kiseera eky'o bukaire bwe n’alwala ebigere. ²⁴ Asa n'a gonera wamu ne bazeiza be n'a ziikibwa wamu na bazeiza be mu kibuga kya Dawudi itaaye: Yekosafaati mutaane we n'afuga mu kifo kye. ²⁵ Awo Nadabu mutaane wa Yerobowaamu n'atandika okufuga Isiraeri mu mwaka ogw'okubiri ogwa Asa kabaka we Yuda, n'a fugira Isiraeri emyaka ibiri. ²⁶ N'akola ebyabbaire mu maiso ga Mukama Ebibbiibi, n'atambulira mu ngira ya itaaye n'o mu kyonoono kye kye yayonooneserye Isiraeri. ²⁷ Awo Baasa mutaane wa Akiya ow'o mu nyumba ya Isakaali n'a mwekobaana; Baasa n'a mukubbira e Gibbesoni eky'Abafirisuuti; kubanga Nadabu n'o Isiraeri yenayana babbaire bazingizirye Gibbesoni. ²⁸ Mu mwaka ogw'o kusatu ogwa Asa kabaka wa Yuda Baasa mwe yamwitiire, n'afuga mu kifo kye. ²⁹ Awo olwatuukire amangu ago bwe yaliire obwakabaka, n'aita enyumba yonayona eya Yerobowaamu; teyamulekeire Yerobowaamu n'o mumu eyaweire omwoka okutuusya lwe yamuzikiriirye; ng'e kigambo bwe kyabbaire ekya Mukama kye yatumwire n'o mukono gw'o mwidu we Akiya Omusiiro: ³⁰ olw'e bibbiibi bya Yerobowaamu bye yayonoonere era bye yayonooneserye Isiraeri; olw'o kusunguwalya kwe kwe yasunguwairye Mukama Katonda wa Isiraeri. ³¹ Era ebikolwa ebindi byonabyona ebya Nadabu ne byonabyona bye yakolere tibyawandiikiibwe mu kitabo eky'e by'omu mirembe gya bakabaka ba Isiraeri? ³² Ne wabanga entalo eri Asa ni Baitisya kabaka wa Isiraeri enaku gyabwe gyonagyona. ³³ Mu mwaka ogw'o kusatu ogwa Asa kabaka wa Yuda Baitisirye mutaane wa Akiya n'atanula okufuga Isiraeri yenayena e Tiruza, n'afugira emyaka abiri na ina. ³⁴ N'akola ebyabbaire mu maiso ga Mukama ebibbiibi n'atambulira mu ngira ya Yerobowaamu n'o mu kwonoona kwe kwe yayonooneserye Isiraeri.