¹ Awo mu birseera ebyo Abiya mutaane wa Yerobowaamu n'alwala. ² Yerobowaamu n'akoba mukali we nti Golokoka, nkwegayiriire weefuule oleke okumanyibwa nga niiwe mukali wa Yerobowaamu: oyabe e Siiro; bona, Akiya nabbi ali eyo eyantumwireku nga ndibba kabaka w'a bantu bano. ³ Era twala wamu naiwe emigaati ikumi n'e gy'e mpewere n'e nsumbi ey'o mubisi gw'e njoki, oyabe gy'ali: iye alikukobera omwana bw'alibba. ⁴ Awo muka Yerobowaamu n'akola atyo, n'a golokoka n'ayaba e Siiro n'aiza mu nyumba ya Akiya. Era Akiya teyasoboire kubona; kubanga amaiso ge gabbaire gayimbaire olw'obukaire bwe. ⁵ Awo Mukama n'akoba Akiya nti bona, muka Yerobowaamu aiza okukubuulya ebya mutaane we; kubanga alwaire: oti oti bwewamukoba: kubanga olwatuuka bweyayingira, yefuula okubba omukali ogondi. ⁶ Awo olwatuukire Akiya bwe yawuliire ebisinde by'e bigere bye ng'a yingira mu lwigi, n'atumula nti Yingira, iwe muka Yerobowaamu; lwaki okwefuula okubba ogondi? kubanga ntumiibwe gy'oli n'e bigambo ebizito. ⁷ Yaba obuulire Yerobowaamu nti Atyo bw'atumula Mukama Katonda wa Isiraeri nti Kubanga nakugulumizirye nga nkutoola mu bantu, ni nkufuula omukulu w'a bantu bange Isiraeri, ⁸ ni nkanula mu bwakabaka nga mbutoola ku nyumba ya Dawudi ni mbukuwa iwe: era naye tobbaire ng'o mwidu wange Dawudi eyakwatanga ebiragiro byange era eyasengereirye n'o mwoyo gwe gwonagwona okukola ekyo kyonka ekyabbaire mu maiso gange ekisa; ⁹ naye okolere ekibbiibi okusinga bonabona abakusookere n'oyaba ne weekolera bakatonda abandi n'e bifaananyi ebisaanuukye okunsunguwalya, n'o nsuula enyuma w'amabega go: ¹⁰ kale, bona, kyendiva ndeeta ekibbiibi ku nyumba ya Yerobowaamu era ndimalawo buli mwana ow'o bwisuka eri Yerobowaamu, asibiibwe era n'atasibiibwa mu Isiraeri, era ndyerera dala enyumba ya Yerobowaamu ng'o muntu bw'ayera obusa n'o kuwaawo ni buwaawo bwonabwona. ¹¹ Owa Yerobowaamu yafiiranga mu kibuga embwa gyamulyanga; n'oyo yafiiranga ku itale enyonyi egy'o mu ibbanga gyamulyanga: kubanga Mukama akitumwire. ¹² Kale golokoka oyabe mu nnyumba yo: ebigere byo bwe byayingira mu kibuga, omwana yafa. ¹³ Kale Isiraeri yenayena balimukungubagira ni bamuziika; kubanga ku ba Yerobowaamu oyo yenka niiye alituuka mu ntaana: kubanga mu iye mubonekere ekigambo ekisa eri Mukama Katonda wa Isiraeri mu nyumba ya Yerobowaamu. ¹⁴ Era ate Mukama alyeyimusirya kabaka wa Isiraeri alimalawo enyumba ya Yerobowaamu ku lunaku olwo: naye ntumwire ntya? Atyanu. ¹⁵ Kubanga Mukama alikubba Isiraeri ng'e kitoogo bwe kisiisikibwa mu maizi; era alisimbula Isiraeri okubatoola mu nsi eno enunsa gye yawaire bazeiza babwe, era alibasaansaanirya emitala w'o mwiga; kubanga bakolere Baaseri baabwe, nga basunguwalya Mukama. ¹⁶ Era aliwaayo Isiraeri olw'e bibbiibi bya Yerobowaamu bye yayonoonere era bye yayonooneserye Isiraeri. ¹⁷ Awo muka Yerobowaamu n'agolokoka n'ayaba n'aiza e Tiruza: awo bwe yabbaire ng'a iza ku mulyango gw'e nyumba, omwana n'afa. ¹⁸ Isiraeri yenayena ni bamuziika ne bamukungubagira; ng'e kigambo kya Mukama bwe kyabbaire kye yatumwire n'o mukono gw'o mwidu we Akiya nabbi. ¹⁹ N'ebikolwa ebindi byonabyona ebya Yerobowaamu bwe yalwaine era bwe yafugire, bona, byawandiikiibwe mu kitabo eky'e by'omu mirembe gya bakabaka ba Isiraeri. ²⁰ N'e naku Yerobowaamu gye yafugiire gyabbaire emyaka abiri na ibiri: na gonera wamu na bazeiza be, Nadabu mutaane we n'afuga mu kifo kye. ²¹ Awo Lekobowaamu mutaane wa Sulemaani n'afuga mu Yuda. Lekobowaamu yabbaire yakamala emyaka ana na gumu bwe yaliire obwakabaka, n'afugira emyaka ikumi na musanvu mu Yerusaalemi, ekibuga Mukama kye yeerobozerye mu bika byonabyona ebya Isiraeri okuteeka omwo eriina lye: n'e riina lya maye lyabbaire Naama Omwamoni. ²² Yuda n'akola ekyabbaire mu maiso ga Mukama ekibibiibi; ni bamukwatisya eiyali olw'e bibbiibi byabwe bye bakolere okusinga byonabyona bazeiza babwe bye bakolere. ²³ Kubanga beezimbiire boona ebifo ebigulumivu boona n'e mpango n'a Baaseri ku buli lusozi oluwanvu ne wansi wa buli musaale omubisi; ²⁴ era waaliwo n'abaalyanga ebisiyaga mu nsi: ni bakola ng'e by'e mizizyo byonabyona bwe byabbaire eby'a mawanga Mukama ge yabbingire mu maiso g'a baana ba Isiraeri. ²⁵ Awo olwatuukire mu mwaka ogw'o kutaanu ogwa kabaka Lekobowaamu Sisaki kabaka w'e Misiri n'a yambuka okulumba Yerusaalemi: ²⁶ n'atoolayo eby'o bugaiga eby'o mu nyumba ya Mukama n'e by'o bugaiga eby'omu nyumba ya kabaka; yatwaliire dala byonabyona: n'atoolayo engabo gyonagyona egy'e zaabu Sulemaani gye yabbaire akolere. ²⁷ Awo kabaka Lekobowaamu n'akola engabo gye bikomo okwira mu kifo kyagyo, n'agisisya mu mikono gy'a bakulu b'ambabowa abaakuumanga olwigi lw'e nyumba ya kabaka. ²⁸ Awo olwatuukire kabaka buli lwe yayingiranga mu nyumba ya Mukama, abambowa ne bagivalanga ne bagiirya mu nyumba ey'abambowa. ²⁹ Era ebikolwa ebindi byonabyona ebya Lekobowaamu ne byonabyona bye yakolere tebyawandiikiibwe mu kitabo eky'e by'omu mirembe gya bakabaka ba Yuda? ³⁰ Era waabbangawo entalo eri Lekobowaamu n'o Yerobowaamu enaku gyonagyona. ³¹ Lekobowaamu n'e yeekungira wamu na bazeiza be mu kibuga kya Dawudi: n'o maye eriina lye lyabbaire Naama Omwamoni. Abiyaamu mutaane we n'afuga mu kifo kye.