¹ Awo, bona, ni waiza omusaiza wa Katonda ng'ava mu Yuda olw'e kigambo kya Mukama n'aiza e Beseri: awo Yerobowaamu yabbaire ng'ayemereire awali ekyoto okwoterya obunaani. ² Awo n'atumulira waigulu ku kyoto olw'e kigambo kya Mukama n'atumula nti Ai ekyoto, ekyoto, atyo bw'atumula Mukama nti bona, omwana alizaalirwa enyumba ya Dawudi, eriina lye Yosiya; era ku iwe kw'aliweerayo bakabona b'e bifo ebigulumivu abootererya obubaani ku iwe, era baliweerayo ku iwe amagumba g'a bantu. ³ N'awa akabonero ku lunaku olwo ng'a tumula nti kano niiko akabonero Mukama k'atumwire: bona, ekyoto kiryatika n'e ikoke erikiriku liriyiika. ⁴ Awo olwatuukire kabaka bwe yawuliire ekigambo eky'o musaiza wa Katonda kye yatumuliire waigulu ku kyoto mu Beseri, awo Yerobowaamu n'a golola omukono gwe ng'a yema awali ekyoto ng'a tumula nti mumukwate: N'o mukono gwe gw'amugololeire ni gukala n'okusobola n'atasobola kugwiirya ate. ⁵ Ekyoto kyona ni kyatika n'e ikoke ni liyiika okuva ku kyoto ng'a kabonero bwe kabbaire omusaiza wa Katonda ke yawaire olw'e kigambo kya Mukama. ⁶ Awo kabaka n'airamu n'akoba omusaiza wa Katonda nti Weegayirire ekisa kya Mukama Katonda wo onsabire omukono gwange gumponyezebwe ate: Omusaiza wa Katonda ne yeegayirira Mukama, omukono gwa kabaka ne gumuwonyezebwa ate ne gufuuka nga bwe gwabbaire oluberyeberye. ⁷ Kabaka n'akoba omusaiza wa Katonda nti twireyo nanze eika oweereweere, nzena naakuwa empeera. ⁸ Omusaiza wa Katonda n'akoba kabaka nti waire nga wampa ekitundu ky'e nyumba yo, tinayingire wamu naiwe so tinaliire mere so tinanywire amaizi mu kifo kino: ⁹ kubanga bwe nkuutiirwe ntyo n'ekigambo kya Mukama nga kitumula nti Tolya mere so tonywa maizi so toirirayo mu ngira gy'ofulumiremu. ¹⁰ Awo n'airayo mu ngira egendi, n'atairayo mu ngira gyafulumiremu ng'aiza e Beseri. ¹¹ Awo wabbairewo nabbi omukaire eyabbanga mu Beseri; omumu ku bataane be n'aiza n'amukobera ebikolwa byonabyona omusaiza wa Katonda bye yabbaire akoleire mu Beseri ku lunaku olwo: ebigambo by'akobere kabaka byoona ne babikobera itawawabwe. ¹² itawabwe n'abakoba nti ngira ki mw'afulumiire? Awo bataane be nga baboine engira gy'afulumiiremu omusaiza wa Katonda eyaviire mu Yuda. ¹³ N'akoba bataane be nti Munteekere amatandiiko ku ndogoyi. Awo ne bamuteekera amatandiiko ku ndogoyi: n'agyebagala. ¹⁴ Nasengererya omusaiza wa Katonda n'amusanga ng'atyaime wansi w'omwera: n'amukoba nti niiwe musaiza wa Katonda eyaviire mu Yuda? N'atumula nti Ninze oyo. ¹⁵ Awo n'a mukoba nti twireyo nanze eika tulye ku mere. ¹⁶ N'atumula nti Tinsobola kwirayo naiwe waire okuyingira naiwe: so tinaliire mere so tinywire maizi wamu naiwe mu kifo kino: ¹⁷ kubanga nabuuliirwe n'e kigambo kya Mukama nti tolya ku mere so tonywirayo maizi so tokyuka ate okwira mu ngira mw'ofulumiire. ¹⁸ Awo n'amukoba nti nzena ndi nabbi nga iwe bw'oli; era malayika ankobere n'e kigambo kya Mukama nti Mwiryewo mu nyumba yo alye ku mere anywe amaizi. Naye ng'amubbeya. ¹⁹ Awo n'airayo naye n'aliira ku mere mu nyumba ye n'anywa amaizi. ²⁰ Awo olwatuukire nga batyaime ku meenza ekigambo kya Mukama ne kimwizira nabbi amwiriryewo: ²¹ n'atumulira waigulu eri omusaiza wa Katonda eyaviire mu Yuda ng'atumula nti Atyo bw'atumula Mukama nti Kubanga ogaine okuwulira omunwa gwa Mukama so tokwaite kiragiro Mukama Katonda wo ky'akulagiire, ²² naye n'oirawo, era oliiriire ku mere n'o nywira amaizi mu kifo ky'akukobereku nti toliirayo ku mere so tonywa maizi: omulambo gwo tigulituuka mu ntaana ya bazeizabo. ²³ Awo olwatuukire bwe yamalire okulya ku mere era ng'a nywire n'ateeka amatandiiko ku ndogoyi ng'a muteekera nabbi gw'airiryewo. ²⁴ Awo ng'ayabire empologoma n'e musanga mu ngira n'emwita: omulambo gwe ni gusuulibwa mu ngira, endogoyi n'eyemerera kumpi nagwo; era n'e mpologoma n'eyemerera kumpi n'o mulambo. ²⁵ Kale, bona, abantu ni babitawo ne babona omulambo nga gusuuliibwe mu ngira n'e mpologoma ng'e yemereire kumpi n'o mulambo: ni baiza ne bakikobera mu kibuga nabbi omukaire mwe yabbanga. ²⁶ Awo nabbi amwiriryewo mu ngira bwe yakiwuliire, n'atumula nti niiye musaiza wa Katonda ataagondeire munwa gwa Mukama: Mukama kyaviire amugabula eri empologoma emutaagwire n'e mwita ng'e kigambo kya Mukama bwe kyabbaire ky'amukobere. ²⁷ Awo n'akoba bataane be nti Munteekere amatandiiko ku ndogoyi. Ni bagiteekaku amatandiiko. ²⁸ N'ayaba n'asanga omulambo gwe nga gusuuliibwe mu ngira n'e ndogoyi n'e mpologoma nga gyemereire kumpi n'o mulambo: empologoma nga teriire mulambo so nga tetaagwire ndogoyi. ²⁹ Nabbi n'a situla omulambo gw'o musaiza wa Katonda n'a guteeka ku ndogoyi n'agwiryayo: nabbi omukaire n'airawo mu kibuga okukungubaga n'okumuziika. ³⁰ N'ateeka omulambo gwe mu ntaana ye iye; ne bamukungubagira nga batumula nti woowe, mugande wange! ³¹ Awo olwatuukire g'amalire okumuziika n'akoba bataane be nti Bwe ndimala okufa, munziikanga mu ntaana omusaiza wa Katonda mw'a ziikiibwe; muteekanga amagumba gange kumpi n'a magumba ge. ³² Kubanga ekigambo kye yatumuliire waigulu olw'e kigambo kya Mukama ku kyoto ekiri mu Beseri n'o ku nyumba gyonagyona egy'e bifo ebigulumivu ebiri mu bibuga eby'e Samaliya tikirireka kutuukirira. ³³ Oluvannyuma lw'e kigambo ekyo Yerobowaamu n'atakyuka okuleka engira y'e bibbiibi, naye ni yeeyongera ate okuteekawo bakabona ab'e bifo ebigulumivu ng'a batoola ku bantu bonabona: buli eyatakanga, n'a mwawulanga wabbewo bakabona b'e bifo ebigulumivu. ³⁴ N'ekigambo ekyo ni kifuuka ekibbiibi eri enyumba ya Yerobowaamu okugimalawo n'okugizikirirya okuva ku nsi yonayona.