¹ Lekobowaamu n'ayaba e Sekemu: kubanga Isiraeri yenayena babbaire baizire e Sekemu akumufuula kabaka. ² Awo olwatuukire Yerobowaamu mutaane wa Nebati bwe Yakiwuliire; (kubanga yabbaire akaali mu Misiri gye yabbaire airukiire okuva eri kabaka Sulemaani, era Yerobowaamu n'atyama mu Misiri), ³ ni batuma ni bamweta; awo Yerobowaamu n'e kibiina kyonakyona ekya Isiraeri ni baiza ni batumula n'o Lekobowaamu nti ⁴ itaawo yafiire ejooko kyaisu okubba enzito: kale wewaire iwe okuweererya okuzibu okwa itaawo n'ejooko ye enzito niiyo yatuteekereku, fena tulikuweererya. ⁵ N'abakoba nti Mwabe mumale enaku isatu ate, kaisi mwize gye ndi ate. Abantu ni baaba. ⁶ Kabaka Lekobowaamu n'ateesya ebigambo n'abakaire abayemereranga mu maiso ga Sulemaani itaaye bwe yabbaire ng'akaali mulamu ng'a tumula nti Magezi ki ge mumpa okubairamu abantu bano? ⁷ Ne bamukoba nti Bwewataka okubba omwidu eri abantu bano atyanu n'otaka okubaweererya n'o bairamu n'o bakoba ebigambo ebisa, kale ibo babbanga abaidu bo enaku gyonagyona. ⁸ Naye n'aleka amagezi g'a bakaire ge baamuwaire, n'ateesya n'abalenzi abaakulira awamu naye abayemereire mu maiso ge. ⁹ N'abakoba nti Magezi ki ge mumpa imwe tubairemu abantu bano abankobere nti Wewula ejooko itaawo gye yatuteekereku? ¹⁰ Awo abaisuka abakuliire awamu naye ne bamukoba nti otyo bw'obba okoba abantu bano abakukobere nti itaawo yafiire ejooko yaisu okubba enzito, naye iwe giwewule gye tuli; otyo bw'obba obakoba nti Naswi yange esinga obunene enkende ya itawange. ¹¹ Era kubanga itawange yababbinikire ejooko enzito, nze nditumula ku jooko yanyu: itawange yabakangaviire ni nkoba, naye nze ndibakangavula n'e njaba egy'o busagwa. ¹² Awo Yerobowaamu n'abantu bonabona ne baiza eri Lekobowaamu ku lunaku olw'okusatu, nga kabaka bwe yalagiire, ng'a tumula nti mwizanga gye ndi ate ku lunaku olw'okusatu. ¹³ Awo kabaka n'a iramu abantu n'e ibboogo, n'aleka Okuteesya kw'a bakaire kwe baamuwaire; ¹⁴ n'abakoba ng'o kuteesya kw'a baisuka bwe kwabbaire, ng'atumula nti itawange yafiire ejooko yanyu nzito, naye nze nditumula ku jooko yanyu: itawange yabakangaviire ni nkoba, naye nze ndibakangavula na njaba egy'o busagwa. ¹⁵ Awo kabaka n'atawulira bantu; kubanga kyabbaire kigambo Mukama kye yaleetere anyweezye ekigambo kye Mukama kye yakobere Yerobowaamu mutaane wa Nebati mu mukono gwa Akiya Omusiiro. ¹⁶ Awo Isiraeri yenayena bwe yaboine nga kabaka tabawulira, abantu ni bairamu kabaka nga batumula nti Mugabo ki gwe tulina mu Dawudi? so tubula busika mu mutaane wa Yese: mwire mu weema gyanyu, Ai Isiraeri: labirira enyumba yo iwe, Dawudi. Awo Isiraeri ni baaba mu weema gyabwe. ¹⁷ Naye abaana ba Isiraeri ababba mu bibuga bya Yuda, abo Lekobowaamu n'a bafuga. ¹⁸ Awo kabaka Lekobowaamu n'atuma Adolamu eyabbaire omukulu w'o musolo; Isiraeri yenayena ni bamukasuukirira Amabbaale n'o kufa n'afa. Kabaka n'a yanguwa okuniina mu lgaali lye okwirukira mu Yerusaalemi. ¹⁹ Batyo Isiraeri ni bajeemera enyumba ya Dawudi ne watyanu. ²⁰ Awo olwatuukire Isiraeri yenayena bwe baawuliire nga Yerobowaamu airirewo, ni batuma ne bamweta okwiza eri ekibiina, ni bamufuula kabaka wa Isiraeri yenayena: tewaali eyasengereirye enyumba ya Dawudi wabula ekika kya Yuda kyonka. ²¹ Awo Lekobowaamu bwe yatuukire e Yerusaalemi, n'akuŋaanya enyumba yonayona eya Yuda n'e kika kya Benyamini, abasaiza abalonde kasiriivu mu mitwalo munaana, abalwani, okulwana n'e nyumba ya Isiraeri, okumwirirya ate obwakabaka Lekobowaamu mutaane wa Sulemaani. ²² Naye ekigambo kya Katonda ne kiizira Semaaya omusaiza wa Katonda nga kitumula nti ²³ Yaba Lekobowaamu mutaane wa Sulemaani kabaka wa Yuda n'e nyumba yonayona eye Yuda n'e Benyamini n'a bantu bonabona abandi nti ²⁴ Atyo bw'atumula Mukama nti Timwambuka so temulwana na bagande banyu abaana ba Isiraeri: mwireyo buli muntu mu nyumba ye; kubanga ekigambo kino kyaviire gye ndi. Awo ni bawulira ekigambo kya Mukama ni bairayo ne baaba ng'e kigambo kya Mukama bwe kyabbaire. ²⁵ Awo Yerobowaamu n'a zimba Sekemu mu nsi ey'e nsozi eye Efulayimu, n'abba omwo; n'ava omwo n'azimba Penueri. ²⁶ Yerobowaamu n'atumula mu mwoyo gwe nti atyanu obwakabaka bwaira eri enyumba ya Dawudi: ²⁷ abantu bano bwe bayambukanga okuweerayo saadaaka mu nyumba ya Mukama mu Yerusaalemi, kale omwoyo gw'a bantu bano gulikyukira ate mukama waabwe, Lekobowaamu kabaka wa Yuda; kale balingita nze, ni bairayo eri Lekobowaamu kabaka we Yuda. ²⁸ Awo kabaka Kaisi ateesya ebigambo, n'akola enyana ibiri gye zaabu: n'abakoba nti kyabalemanga okwambukanga e Yerusaalemi; bona bakatonda bo, Ai Isiraeri, abakutoire mu nsi y'e Misiri. ²⁹ Naateeka eimu mu Beseri ne ginaye naagiteeka mu Daani. ³⁰ N'e kigambo ekyo ni kibba kibbiibi: kubanga abantu bayabanga okusinza mu maiso g'e imu nga baaba e Daani. ³¹ N'azimba enyumba egyebifo ebigulumivu, n'ateekawo bakabona ng'abatoola mu bantu bonabona abatali b'o ku baana ba Leevi. ³² Era Yerobowaamu n'ateekawo embaga mu mwezi ogw'o munaana ku lunaku olw'o mwezi olw'e ikumi n'eitaanu okufaanana embaga eri mu Yuda, n'a niina eri ekyoto; atyo bwe yakoleire mu Beseri ng'a waayo sadaaka eri enyana gye yakolere: n'ateeka mu Beseri bakabona b'e bifo ebigulumivu be yateekerewo. ³³ N'aniina eri ekyoto kye yabbaire azimbire mu Beseri ku lunaku olw'e ikumi n'eitaanu olw'o mwezi ogw'o munaana, niigwo mwezi gwe yagunjire mu mwoyo gwe iye; n'ateekawo embaga eri abaana ba Isiraeri, n'a niina eri ekyoto okwotererya obubaani.