¹ Era kabaka Sulemaani n'ataka abakali bangi banaigwanga wamu n'o muwala wa Falaawo, abakali ab'o ku Bamowaabu n'Abamoni n'Abaedomu n'Abasidoni n'Abakiiti; ² ku mawanga Mukama ge yakobereku abaana ba Isiraeri nti Timwabanga mu ibo so tebaizanga ibo mu imwe: kubanga tebalireka kukyusa myoyo gyanyu okusengererya bakatonda baabwe: Sulemaani ni yeegaita nabo ng'a bataka. ³ Era yabbaire n'a bakali lusanvu, abambeiza, n'a bazaana bisatu: bakali be ni bakyusya omwoyo gwe. ⁴ Kubanga olwatuukire Sulemaani ng'a kairikire bakali be ni bakyusya omwoyo gwe okusengererya bakatonda abandi: omwoyo gwe ni gutatuukirira eri Mukama Katonda we nga bwe gwabbaire omwoyo gwa Dawudi you have you itaaye. ⁵ Kubanga Sulemaani n'a sengererya Asutaloosi, katonda omukali ow'Abasidoni, n'o Mirukomu omuzizo gw'Abamoni. ⁶ Era Sulemaani n'akola ekyabbaire mu maiso g'a Mukama ekibbiibi, n'atasengererya dala Mukama, nga Dawudi you itaaye bwe yakolere. ⁷ Awo Sulemaani n'azimbira Kemosi ekifo ekigulumivu, niigwo muzizo gwa Mowaabu, ku lusozi olwolekera Yerusaalemi, ne Moleki omuzizo gw'a baana ba Amoni. ⁸ Era bwe yakoleire atyo bakali be bonabona banaigwanga abaayoteryanga obubaani ne bawaayo sadaaka eri bakatonda baabwe. ⁹ Mukama n'asunguwalira Sulemaani kubanga omwoyo gwe gwakyukire okuva ku Mukama Katonda wa Isiraeri eyabbaire yaakamubonekera emirundi eibiri, ¹⁰ era eyamulagiire olw'e kigambo ekyo aleke okusengererya bakatonda abandi, naye n'atakwata ekyo Mukama kye yalagiire. ¹¹ Mukama kyeyaviire akoba Sulemaani nti Kubanga okolere kino so tokwaite ndagaanu yange n'a mateeka gange bye nakulagiire, tindireka kukukanulaku obwakabaka ni mbuwa omwidu wo. ¹² Naye tindikola ntyo ku mirembe gyo ku lwa Dawudi itaawo: naye ndibukanula okubutoola mu mukono gw'o mwana wo. ¹³ Naye tindibukanulaku bwakabaka bwonabwona, naye ndimuwa omwana wo ekika kimu ku lwa Dawudi omwidu wange era ku lwa Yerusaalemi kye neerobozerye. ¹⁴ Awo Mukama n'ayimusirya Sulemaani omulabe, Kadadi Omwedomu: yabbaire w'o ku izaire lya kabaka mu Edomu. ¹⁵ Kubanga olwatuukire Dawudi bwe yabbaire mu Edomu n'o Yowaabu omukulu w'e igye ng'a yambukire okuziika abafu era ng'aitire buli musaiza mu Edomu; ¹⁶ (kubanga Yowaabu n'o Isiraeri Yenayana bamalireyo emyezi mukaaga okutuusya lwe yamalirewo buli musaiza mu Edomu;) ¹⁷ awo Kadadi n'airuka, iye n'Abaedomu abamu ab'oku baidu ba itaaye wamu naye okwaba mu Misiri: Kadadi ng'a kaali mwana mutomuto. ¹⁸ Ne bagolokoka okuva mu Midiyaani ni baiza e Palani: ne batwala wamu nabo abasaiza nga babatoola e Palani ni baiza e Misiri eri Falaawo kabaka w'e Misiri; oyo n'amuwa enyumba n'amulagira ebyokulya n'a muwa ensi. ¹⁹ Awo Kadadi n'a ganja inu mu maiso ga Falaawo n'o kumuwa n'amuwa okukwa mugande wa mukali we iye, mugande wa Tapenesi kadulubaale. ²⁰ Awo mugande wa Tapenesi n'amuzaalira Genubasi mutaane we Tapenesi gwe yatooleire ku mabeere mu nyumba ya Falaawo: Genubasi n'abba mu nyumba ya Falaawo mu bataane ba Falaawo. ²¹ Awo Kadadi bwe yawuliriire mu Misiri nga Dawudi agoneire wamu na bazeizabe, era nga Yowaabu omukulu w'e igye ng'afiire, Kadadi n'akoba Falaawo nti ke njabe ntuuke mu nsi y'e waisu. ²² Awo Falaawo n'a mukoba nti Naye kiki ekyakugotere ng'oli nanze n'okutaka n'otaka, bona, okwaba mu nsi y'e wanyu? N'airamu nti wabula kintu: naye leka male okwaba. ²³ Awo Katonda n'amuyimusiryaku omulabe ogondi, Lezoni Mutaane wa Eriyada eyabbaire airukire mukama we Kadadezeri kabaka w'e Zoba: ²⁴ n'akuŋaanya abantu gy'ali, n'afuuka omukulu w'ekibiina Dawudi bwe yaitire ab'e Zoba: ne baaba e Damasiko ni babba omwo, ni bafugira mu Damasiko. ²⁵ N'abba mulabe eri Isiraeri emirembe gyonagyona egya Sulemaani obutateekaku bubbiibi Kadadi bwe yakolere: n'akyawa Isiraeri n'afuga Obusuuli. ²⁶ Awo Yerobowaamu Mutaane wa Nebati, Omwefulayimu ow'e Zereda, omwidu wa Sulemaani, maye eriina lye Zeruwa namwandu, era yeena n'ayimusirya kabaka omukono. ²⁷ Era eno niiyo yabbaire ensonga kyeyaviire ayimusirya kabaka omukono; Sulemaani yazimba Miiro n'aziba ekituli eky'o mu kibuga kya Dawudi itaaye. ²⁸ Era omusaiza oyo Yerobowaamu yabbaire musaiza wa maani omuzira: Sulemaani n'abona omulenzi oyo nga munyiikivu, n'a mutiikira emirimu gyonagyona egy'e nyumba ya Yusufu. ²⁹ Awo olwatuukire mu biseera ebyo Yerobowaamu bwe yaviire mu Yerusaalemi, nabbi Akiya Omusiiro n'a musanga mu ngira; era Akiya yabbaire avaire ekivaalo ekiyaka; awo bombiri ni babba bonka ku itale. ³⁰ Akiya n'a kwata ku kivaalo ekiyaka kye yabbaire avaire n'akikanulamu ebitundu ikumi na bibiri. ³¹ N'akoba Yerobowaamu nti Weetwalire ebitundu ikumi: kubanga atyo bw'atumula Mukama Katonda wa Isiraeri nti bona, ndikanula mu bwakabaka ni mbutoola mu mukono gwa Sulemaani ni nkuwa iwe ebika ikumi: ³² (naye alibba n'e kika kimu ku lw'o mwidu wange Dawudi n'o ku lwa Yerusaalemi ekibuga kye neerobozerye mu bika byonabyona ebya Isiraeri:) ³³ kubanga bandekere ni basinza Asutaloosi katonda omukali ow'Abasidoni n'o Kemosi katonda wa Mowaabu ne Mirukomu katonda w'abaana ba Amoni; so tebatambuliire mu mangira gange okukola ebiri mu maiso gange ebisa n'o kukwata amateeka gange n'e misango gyange nga bwe yakolanga Dawudi itaaye. ³⁴ Naye tinditoola bwakabaka bwonabwona mu mukono gwe: naye ndimufuula omukulu enaku gyonagyona egy'o bulamu bwe ku lwa Dawudi omwidu wange gwe nalondere kubanga yakwaite ebiragiro byange n'a mateeka gange: ³⁵ naye nditoola obwakabaka mu mukono gwa mutaane we ni mbuwa iwe, ebika ikumi. ³⁶ No mutaane we ndimuwa ekika kimu, Dawudi omwidu wange abbenga n'e tabaaza enaku gyonagyona mu maiso gange mu Yerusaalemi ekibuga kye neerobozerye okuteeka omwo eriina lyange. ³⁷ Era ndikutwala, weena olifuga nga byonabyona bwe biribba emeeme yo by'eritaka, era olibba kabaka wa Isiraeri. ³⁸ Awo olulituuka bwewawuliranga byonabyona bye nkulagira n'otambuliranga mu mangira gange n'okolanga ebyo ebiri mu maiso gange ebisa, okukwatanga amateeka gange n'e biragiro byange nga Dawudi omwidu wange bwe yakolanga; kale nabbanga wamu naiwe, era ndikuzimbira enyumba ey'e nkalakalira nga bwe nazimbiire Dawudi, era ndikuwa Isiraeri. ³⁹ Era kyendiva mbonyabonya ezaire lya Dawudi naye tindibabonyabonyerya emirembe gyonagyona. ⁴⁰ Sulemaani kyeyaviire asala amagezi okwita Yerobowaamu; naye Yerobowaamu n'agolokoka n'airukira mu Misiri eri Sisaki kabaka w'e Misiri, n'abba mu Misiri okutuusya Sulemaani lwe yafiire. ⁴¹ Era ebikolwa byonabyona ebindi ebya Sulemaani ne byonabyona bye yakolere n'a magezi ge tibyawandiikiibwe mu kitabo ky'ebikolwa bya Sulemaani? ⁴² N'ebiseera Sulemaani bye yafugiire Isiraeri Yenayana mu Yerusaalemi byabbaire emyaka ana. ⁴³ Awo Sulemaani na nagonera wamu na bazeizabe n'aziikibwa mu kibuga kya Dawudi itaaye: awo Lekobowaamu mutaane we n'afuga mu kifo kye.