¹ Awo kabaka omukali w’e Seeba bwe yawuliire eitutumu lya Sulemaani olw'e riina lya Mukama, n'aiza okumukema n'ebibuulibwa ebizibu. ² N'aiza e Yerusaalemi ng'alina abaidu bangi inu n'e ŋamira egyetiikire eby'akaloosa n'e zaabu nyingi inu n'a mabbaale ag'o muwendo omungi; awo bwe yaizire eri Sulemaani, n'ateesya naye ebyo byonabyona ebyabbaire mu mwoyo gwe. ³ Awo Sulemaani n'a mutegeezya byonabyona bye yamubwirye: wabula kintu ekyagisiibwe kabaka ky'ataamutegeezerye. ⁴ Awo kabaka omukali w'e Seeba bwe yamalire okubona amagezi gonagona aga Sulemaani n'e nyumba gye yazimbire, ⁵ n'e mere ey'o ku meenza ye n'o kutyama kw'a baidu be n'o kuweererya kw'a baweererya be n'e bivaalo byabwe n'a basenero be n'o lutindo lwe, lwe yaniinirangaku okwaba mu nyumba ya Mukama; kale nga timukaali musigaire mwoyo mu iye. ⁶ N'akiba kabaka nti ekigambo kye nawuliriire mu nsi yange ky'abbaire kya mazima eky'e bikolwa byo n'a magezi go. ⁷ Era naye tinaikiriirye bigambo ebyo okutuusya lwe natoire amaiso gange ni gakibona: era, bona, tinakobeirwe kitundu: amagezi go n'o mukisa gwo bisinga eitutumu lye nawuliire. ⁸ Abasaiza bo balina omukisa, abaidu bo bano balina omukisa, abemerera mu maiso go enaku gyonagyona ni bawulira amagezi go. ⁹ Mukama Katonda wo yebazibwe akusanyukira okukuteeka ku ntebe ya Isiraeri: kubanga Mukama yatakire Isiraeri emirembe gyonagyona, kyeyaviire akufuula kabaka okukola eby'e nsonga n'e by'o butuukirivu. ¹⁰ Awo n'awa kabaka zaabu talanta kikumi mu abiri, n'e by'a kaloosa bingi inu dala n'a mabbaale ag'o muwendo omungi: tewaizire lwo kubiri bya kaloosa bingi ebyenkaniire awo ng'ebyo kabaka omukali w'e Seeba bye yatwaliire kabaka Sulemaani. ¹¹ Era n'empingu ya Kiramu eyaleetere zaabu okuva e Ofiri, n'eiza e Ofiri emitoogo mingi inu n'a mabbaale ag'o muwendo omungi. ¹² Kabaka n'afuula emitoogo empango gy'e nyumba ya Mukama n'e nyumba ya kabaka, n'e nanga n'e kongo gy'a bembi: tewaizire mitoogo egifaanana gityo so tegyabonekere ne watyanu. ¹³ Awo kabaka Sulemaani n'awa kabaka omukali w'e Seeba byonabyona bye yatakire, buli kye yasabire kyonakyona, obutateekaku ebyo Sulemaani bye yamuwaire olw'e kisa kye ekya kabaka. Awo n'a kyuka n'airayo mu nsi ye iye, iye n'abaidu be. ¹⁴ Era ezaabu eyaizire eri Sulemaani mu mwaka ogumu obuzito bwayo bwabbaire talanta lukaaga mu nkaaga mu mukaaga, ¹⁵ obutateekaku eyo abasuubuli gye baaleetanga n'abatunli gye baatundanga na bakabaka bonabona ab'e igwanga etabule n'a bakulu b'e nsi. ¹⁶ Era kabaka Sulemaani n'a weesya obugabo bibiri bwe zaabu mpeese: buli kagabo n'a kawaaku sekeri gy'e zaabu lukaaga. ¹⁷ N'akola engabo bisatu bye zaabu mpeese; buli ngabo n'a giwaaku laateri isatu: kabaka n'agigisa mu nyumba ey'e kibira kya Lebanooni. ¹⁸ Era kabaka n'akola entebe ey'o bwakabaka enene ya masanga n'agibiikaku zaabu nsa inu dala. ¹⁹ Entebe yabbaireku amadaala mukaaga, era entebe waigulu waayo yabbaire nkulunguivu enyuma; era yabbaireku emikono eruuyi n'eruuyi awatyamibwa, n'empologoma ibiri nga gyemereire ku mbali kw'e mikono. ²⁰ N'e mpologoma ikumi na ibiri gyayemerere eruuyi n'e ruuyi ku madaala omukaaga tewabbaire eyakoleibwe mu bwakabaka bwonabwona okugifaanana. ²¹ Era ebintu byonabyona ebya kabaka Sulemaani eby'o kunywiramu byabbaire by'e zaabu, n'e bintu byonabyona eby'o mu nyumba ey'e kibira kye Lebanooni byabbaire by'e zaabu nongoofu: Wabula bye feeza; teyalowoozeibwe nge kintu ku mirembe gya Sulemaani; ²² Kubanga kabaka yabbaire ku Nyanza empingu eya malikebu ey'e Talusiisi wamu n'e mpingu ya Kiramu; empingu ey'e Talusiisi yaizanga mulundi gumu buli myaka eisatu ng'ereeta zaabu n'e feeza, amasanga n'e nkobe na bamuzinge. ²³ Awo kabaka Sulemaani n'a singa bakabaka bonabona ab'e nsi obugaiga n'a magezi. ²⁴ Ensi yonayona ni basagira amaiso ga Sulemaani okuwulira amagezi ge, Katonda ge yabbaire ataire mu mwoyo gwe. ²⁵ Ne baleeta buli muntu ekirabo kye, ebintu eby'e feeza n'e bintu eby'e zaabu n'e bivaalo N'ebyokulwanisya n'e by'a kaloosa, embalaasi n'e nyumbu, ebyasaliibwe ebya buli mwaka. ²⁶ Sulemaani n'a kuŋaanya amagaali n'a basaiza abeebagala embalaasi; era yabbaire n'a magaali lukumi mu bina n'a basaiza abeebagala embalaasi mutwaalo mu nkumi ibiri be yateekere mu bibuga eby'a magaali n'a waali kabaka e Yerusaalemi. ²⁷ Kabaka n'afuula feeza okubba ng'a mabbaale mu Yerusaalemi, n'e mivule n'a gifuula okuba ng'e misukomooli egiri mu biwonvu olw'o bungi. ²⁸ N'embalaasi Sulemaani gye yabbaire nagyo gyatoleibwe mu Misiri: n'a basuubuzi ba kabaka ni baweebwanga bisibo, buli kisibo n'o muwendo gwakyo. ²⁹ Era egaali lyaniinanga nga liva mu Misiri nga liizira sekeri lukaaga egy'e feeza, n'e mbalaasi ng'e izirira kikumi mu ataanu; era bakabaka bonabona ab'Abakiiti batyo na bakabaka ab'e Busuuli, bagiretangamu mu mukono gwabwe.