¹ Dawudi n'akuŋaanya abakungu bonabona aba Isiraeri, abakungu b'e bika n'a baami b'e bitongole abaaweereryanga kabaka mu biwu, n'a baami b'e nkumi n'a baami b'e bikumi n'a bakulu b'e bintu byonabyona n'obugaiga ebya kabaka na bataane be, wamu n'a baami n'a basaiza ab'a maani, abasaiza bonabona ab'amaani abazira, e Yerusaalemi. ² Awo Dawudi kabaka n'ayemerera ku bigere bye n'atumula nti mumpulire, bagande bange era abantu bange: nze kyabbaire mu mwoyo gwange okuzimbira esanduuku ey'e ndagaanu ya Mukama n'e ntebe y'e bigere eya Katonda waisu enyumba ey'o kuwumuliramu; era nabbaire ntegekere okuzimba. ³ Naye Katonda n'a nkoba nti tozimbira liina lyange nyumba, kubanga iwe oli musaiza we ntalo, era wayiwire omusaayi. ⁴ Naye Mukama Katonda wa Isiraeri yanondere ng'antoola mu nyumba yonayona eya itawange okubba kabaka wa Isiraeri emirembe gyonagyona: kubanga yalondere Yuda okubba omulangira; n'o mu nyumba ya Yuda n'alondamu enyumba ya itawange; n'o mu baana ba itawange n'ansanyukira nze okunfuula kabaka wa Isiraeri yenayena: ⁵ n'o ku bataane bange bonabona (kubanga Mukama ampaire abaana bangi) n'alonderemu Sulemaani mutaane wange okutyama ku ntebe ey'o bwakabaka bwa Mukama okufuga Isiraeri. ⁶ N'ankoba nti Sulemaani mutaane wo niiye alizimba enyumba yange n'e mpya jange: kubanga namulondere okubba mutaane wange, Nzena nabbanga itaaye. ⁷ Era naanywezyanga obwakabaka bwe emirembe gyonagyona, bweyanyiikiranga okukola ebiragiro byange n'e misango gyange nga atyanu. ⁸ Kale mu maiso ga Isiraeri yenayena, eikuŋaaniro lya Mukama, n'o Katonda waisu ng'a wulira, mukwatenga musagirenga ebiragiro byonabyona ebya Mukama Katonda wanyu: mulye ensi eno ensa mugirekere abaana banyu okubala obusika emirembe gyonagyona ababbangawo oluvanyuma lwanyu. ⁹ Wena, Sulemaani, mutaane wange, tegeera Katonda wa itaawo, omuweereryenga n'o mwoyo ogutuukiriire n'e meeme esanyuka: kubanga Mukama akebera emyoyo gyonagyona, era ategeera okufumiintirirya kwonakwona okw'e birowoozo: bw'e wamusagiranga, yabonekanga gy'oli; naye bwewamuvangaku, yakubbinganga emirembe gyonagyona. ¹⁰ Weekuume inu; kubanga Mukama alondere niiwe okuzimba enyumba ey'e kiigwa: bba n'amaani, okikolanga. ¹¹ Awo Dawudi n'awa Sulemaani mutaane we ekyokuboneraku eky'e kisasi kye yeekaalu n'e nyumba gyaku n'a mawanika gaaku n'e nyumba gyaku egya waigulu n'e bisenge byaku eby'omunda n'e kifo eky'e ntebe ey'o kusaasira; ¹² n'ekyokuboneraku ekya byonabyona bye yabbaire nabyo olw'o mwoyo, eby'e mpya egy'e nyumba ya Mukama n'e bisenge byonabyona ebyetooloire n'a mawanika g'e nyumba ya Katonda n'a mawanika g'e bintu ebiwongebwa: ¹³ era eby'e buwu bya bakabona n'Abaleevi n'e by'o mulimu gwonagwona ogw'o kuweereryanga okw'o mu nyumba ya Mukama, n'e by'e bintu byonabyona ebiweererya mu nyumba ya Mukama: ¹⁴ zaabu epimibwa olw'e bintu ebye zaabu, olw'e bintu byonabyona ebiweererya okuweererya kwonakwona; feeza epimibwa olw'e bintu byonabyona eby'e feeza, olw'ebintu byonabyona ebiweererya okuweererya kwonakwona: ¹⁵ era eby'etabaaza egy'e zaabu ebipimibwa, n'e by'e tabaaza gyakyo, zaabu epimibwa yabbaire ku buli kikondo era y'e etabaaza gyakyo: era ye bikondo ebye feeza, feeza epimibwa ya buli kikondo era niiyo tabaaza gyakyo, ng'o kuweererya okwa buli kikondo: ¹⁶ n'e zaabu eyapimiibwe ey'e meenza egy'emigaati egy'okulaga, eya buli meenza; n'e feeza ey'e meenza egy'e feeza: ¹⁷ n'e by'o kukwatisya enyama n'ebibya n'ebikompe by'e zaabu ensa: era y'e bbakuli egy'e zaabu, zaabu eyapimiibwe eya buli bbakuli: era y'e bbakuli egye feeza, feeza eyapimiibwe eya buli bbakuli: ¹⁸ era ey'e kyoto eky'o bubaani, zaabu enongoofu eyapimiibwe; era zaabu ye kyokuboneraku eky'e gaali, niibo bakerubi abayanjala ebiwawa byabwe ni babiika ku sanduuku ey'e ndagaanu ya Mukama. ¹⁹ Ebyo byonabyona, bwe yatumwire Dawudi, nabitegeezebwa mu biwandiiko ebiva eri omukono gwa Mukama, niigyo emirimu gyonagyona egy'o mutindo guno. ²⁰ Dawudi n'akoba Sulemaatu mutaane we nti Ba n'a maani ogume omwoyo, okikolenga: totyanga so totekemukanga: kubanga Mukama Katonda, Katonda wange, ali naiwe: takwabulirenga so takulekenga okutuusya omulimu gwonagwona ogw'o kuweererya okw'o mu nyumba ya Mukama lwe gulituukirira. ²¹ Era, bona, waliwo empalo gya bakabona n'Abaleevi olw'okuweererya kwonakwona okw'o mu nyumba ya Katonda: era walibba naiwe mu mulimu ogw'e ngeri gyonagyona buli musaiza ataka ku bubwe alina amagezi ag'o kuweererya kwonakwona: era n'abaami n'a bantu bonabona bagondereranga dala okulagira kwo.