¹ Dawudi kabaka n'akoba ekibiina kyonakyona nti Sulemaani mutaane wange Katonda gw'alondere yenka akaali mwana mutomuto, n'o mulimu munene: kubanga eri nyumba ti ya bantu naye ya Mukama Katonda. ² Nze ntegekeire enyumba ya Katonda wange N'a maani gange gonagona zaabu (ey'e bintu) ebye zaabu, ne feeza ey'e bintu ey'e feeza, n'e bikomo eby'e bintu eby'e bikomo, ebyoma eby'e bintu eby'e byoma, n'e misaale egy'e bintu eby'e misaale; amabbaale aga onuku n'a mabbaale ag'okutona, amabbaale ag'o mulimu ogw'e njola n'agandi mangi, N'amabbaale ag'o muwendo omungi ag'e ngeri gyonagyona, N'a mabbaale amanyirivu mangi inu. ³ Era ate kubanga ntekere okutaka kwange ku nyumba ya Katonda wange, kubanga nina obugaiga bwange ku bwange obwe zaabu n'e feeza, mbuwa enyumba ya Katonda wange, okusukirirya byonabyona bye ntegekeire enyumba entukuvu; ⁴ talanta egye zaabu enkumi isatu, zaabu ya Ofiri, n'e talanta egye feeza eyalongooseibwe kasanvu, okugibikisya ku bisenge by'e nyumba yona: ⁵ zaabu y'e bintu eby'e zaabu, ne feeza ye bintu eby'e feeza, n'o lw'e mirimu egy'e ngeri gyonagyona egirikolebwa n'e mikono gy'a bafundi. Kale yani awaayo ku bubwe okwewonga watyanu eri Mukama? ⁶ Awo abakulu b'e nyumba gya baitawabwe n'a bakulu b'e bika bya Isiraeri n'a baami b'e nkumi n'a b'e bikumi wamu n'a balabiriri b'e mirimu gya kabaka, ni bawaayo ku bwabwe; ⁷ ne bawa olw'o kuweererya okw'o mu nyumba ya Katonda, zaabu talanta enkumi itaanu ne daliki mutwalo, n'e feeza talanta mutwalo, n'e bikomo talanta mutwalo gumu mu kanaana, n'ebyoma talanta kasiriivu. ⁸ Boona ababonekere nga balina amabbaale ag'o muwendo omungi ni bagawa eri obugaiga obw'o mu nyumba ya Mukama wansi w'o mukono gwa Yekyeri Omugerusoni. ⁹ Awo abantu ne basanyuka kubanga bawaireyo ku bwabwe, eri Mukama n'o mwoyo ogutuukiriire: era n'o Dawudi kabaka n'asanyuka eisanyu inene. ¹⁰ Dawudi kyeyaviire yeebalilya Mukama mu maiso g'e kibiina kyonakona: Dawudi n'atumula nti Weebazibwe, ai Mukama, Katonda wa Isiraeri zeiza waisu, emirembe n'e mirembe. ¹¹ Obukulu bubwo n'a maani n'e kitiibwa n'o kuwangula n'o kugulumizibwa: kubanga byonabyona ebiri mu igulu n'e biri mu nsi (bibyo); obwakabaka bubwo, ai Mukama, era ogulumizibwe okubba omutwe gwe byonabyona. ¹² Obugaiga era n'e kitiibwa biva gyoli, era niiwe ofuga bonabyona; era mu mukono gwo niimwo muli obuyinza n'a maani; era mu mukono gwo niimwo muli okukulya n'o kuwa bonabona amaani. ¹³ Kale, Katonda waisu, tukwebalya ni tutendereza eriina lyo ery'ekitiibwa. ¹⁴ Naye ninze ani n'a bantu bange niikyo ki, ife okusobola okuwaayo tutyo ku bwaisu dala? kubanga byonabyona biva gyoli, era tukuwaire ku bibyo. ¹⁵ Kubanga ife tuli bageni mu maiso go era batambuli nga bazeiza baisu bonabona bwe babbaire: enaku gyaisu egy'o ku nsi gidi ng'e kiwolyo, so wabula kubbeerera. ¹⁶ Ai Mukama Katonda waise, ebintu bino byonabyona bye tutegekere okukuzimbira enyumba olw'e riina lyo eitukuvu biva mu mukono gwo, era byonabyona bibyo. ¹⁷ Era maite, Katonda wange, nga niiwe okema omwoyo era osanyukira amazima. Nze, nga nina omwoyo ogw'a mazima, mpaireyo ku bwange bino byonabyona: era atyanu mboine abantu bo abali wano nga bawaayo ku bwabwe gyoli ni nsanyuka. ¹⁸ Ai Mukama, Katonda wa Ibulayimu, owa Isaaka, era owa Isiraeri, bazeiza baisu, onyweze kino mu kufumiintirirya kw'e birowoozo eby'o mu mwoyo gw'a bantu bo, oteeketeeke omwoyo gwabwe gyoli: ¹⁹ era owe Sulemaani mutaane wange omwoyo ogutuukiriire okukwata ebiragiro byo, n'ebyo bye wategeezerye, n'a mateeka go, n'o kukola ebyo byonabyona, n'o kuzimba enyumba gye ntegekeire ebintu. ²⁰ Dawudi n'akoba ekibiina kyonakona nti atyanu mwebalye Mukama Katonda wanyu. Ekibiina kyonakona ni beebalya Mukama Katonda wa bazeiza babwe, ni bakutama emitwe gyabwe ni basinza Mukama n'o kabaka. ²¹ Ni bawaayo sadaaka eri Mukama, ni bawaayo ebiweebwayo ebyokyebwa eri Mukama ku lw'o kubiri olunaku olwo nga luweire, ente lukumi n'e ntama enume lukumi, n'a baana b'e ntama lukumi n'e biweebwayo byaku ebyokunywa, n'e sadaaka nyingi inu olwa Isiraeri yenayena; ²² ni baliira ni banywira mu maiso ga Mukama ku lunaku olwo ne basanyuka inu. Ne bafuula Sulemaani mutaane wa Dawudi kabaka omulundi ogw'okubiri, ne bamufukaku amafuta eri Mukama okubba omulangira n'o Zadoki okubba kabona. ²³ Awo Sulemaani n'atyama ku ntebe ya Mukama nga niiye kabaka mu kifo kya Dawudi itaaye, n'abona omukisa; Isiraeri yenayena ni bamugondera. ²⁴ Abakulu bonabona n'abasaiza ab'a maani era na Bataane ba Dawudi kabaka bonabona ni bagondera Sulemaani kabaka. ²⁵ Mukama n'a gulumizya inu Sulemaani mu maiso ga Isiraeri yenayena n'a muwa ekitiibwa eky'o bwakabaka ekitabonebwanga ku kabaka yenayena eyamusookere mu Isiraeri. ²⁶ Era Dawudi mutaane wa Yese yafugire Isiraeri yenayena. ²⁷ N'ebiseera bye yafugiire Isiraeri byabbaire emyaka ana; yafugiire emyaka musanvu e Kebbulooni, era yafugiire emyaka asatu na isatu mu Yerusaalemi. ²⁸ N'afa ng'akairikire kusa, ng'aizwire enaku n'o bugaiga n'e kitiibwa. Sulemaani mutaane we n'afuga mu kifo kye. ²⁹ Era ebikolwa bya Dawudi kabaka, ebyasookere n'e byamaliirweku, bona, byawandiikiibwe mu bigambo bya Samwiri omuboni n'o mu bigambo bya Nasani nabbi n'o mu bigambo bya Gaadi omuboni; ³⁰ era n'o kufuga kwe kwonakwona n'a maani ge n'ebiseera ebyamubitireku iye ne Isiraeri n'a matwale gonagona ag'e nsi egyo.