¹ Awo Dawudi yabbaire ng'akairikire era ng'awangaire enaku nyingi; n'afuula Sulemaani mutaane we kabaka we Isiraeri. ² N'akuŋaanya abakulu bonabona aba Isiraeri n'a bakabona n'Abaleevi. ³ Abaleevi ni babalibwa okuva ku myaka asatu n'o kusingawo: n'o muwendo gwabwe ng'e mitwe bwe gyabbaire buli muntu mumu ku mumu gwabbaire emitwaalo isatu mu kanaana. ⁴ Ku abo emitwaalo ibiri mu nkumi ina bo kulabirira mulimu gw'o mu nyumba ya Mukama; n'a kakaaga baami n'a baasalanga emisango: ⁵ n'e nkumi ina baigali; era ate enkumi ina baatenderezanga Mukama n'e bintu bye nakolere, bwe yatumwire Dawudi, okutenderezanga nabyo. ⁶ Dawudi n'a basalamu ebiwu ng'a baana ba Leevi bwe babbaire; Gerusoni, Kokasi, n'o Merali. ⁷ Ku Bagerusoni; Ladani n'o Simeeyi. ⁸ Bataane ba Ladani; Yekyeri omukulu, n'o Zesamu, n'o Yoweeri, basatu. ⁹ Bataane ba Simeeyi; Seromosi, n'o Kaziyeri, n'o Kalani, basatu. Abo niibo babbaire emitwe gy'e nyumba gya baitawabwe egya Ladani. ¹⁰ Na bataane ba Simeeyi: Yakasi, Zina, n'o Yewusi, n'o Beriya. Abo abana babbaire bataane ba Simeeyi. ¹¹ Ne Yakasi niiye yabbaire omukulu, n'o Ziza niiye yabbaire ow'o kubiri: naye Yewusi n'o Beriya tebabbaire baana bangi; kyebaaviire babalirwa awamu okubba enyumba ya baitawabwe. ¹² Bataane ba Kokasi; Amulaamu, Izukali, Kebbulooni, n'o Wuziyeeri, bana. ¹³ Bataane ba Amulaamu; Alooni n'o Musa: Alooni n'a yawulibwa atukuryenga ebintu ebitukuvu einu, iye n'a bataane be emirembe gyonagyona, okwotereryanga obubaani mu maiso ga Mukama, okumuweereryanga, n'o kusabanga omukisa mu liina lye emirembe gyonagyona. ¹⁴ Naye Musa omusaiza wa Katonda; bataane be bayatwilwe mu kika kya Leevi. ¹⁵ Bataane ba Musa; Gerusomu n'Eryeza. ¹⁶ Bataane ba Gerusomu; Sebweri omukulu. ¹⁷ N'a bataane ba Eryeza niibo bano, Lekabiya omukulu. Eryeza n'atabba n'a baana bandi b'o bwisuka; naye bataane ba Lekabiya ni babba bangi inu. ¹⁸ Bataane ba Izukali; Seromisi omukulu ¹⁹ Bataane ba Kebbulooni; Yeriya omukulu, Amaliya ow'o kubiri, Yakaziyeri ow'o kusatu, n'o Yekameyamu ow'okuna. ²⁰ Bataane ba Wuziyeeri; Miika omukulu, n'o Isiya ow'o kubiri. ²¹ Bataane ba Merali; Makuli n'o Musi. Bataane ba Makuli; Eriyazaali n'o Kiisi. ²² Eriyazaali n'afa, nga abula baana b'o bwisuka, wabula ab'o buwala beereere: bagande baabwe bataane ba Kiisi ni babafumbirwa. ²³ Bataane ba Musi; Makuli n'Ederi, n'o Yeremosi, basatu. ²⁴ Abo niibo babbaire bataane ba Leevi ng'e nyumba gya baitawabwe bwe gyabbaire, niigyo mitwe gy'e nyumba gya baitawabwe egy'abo abaabaliibwe ku ibo mu muwendo gw'a maina ng'e mitwe gyabwe bwe gyabbaire, abaakola omulimu ogw'o kuweereryanga okw'o mu nyumba ya Mukama, abaakamala emyaka abiri n'o kusingawo. ²⁵ Kubanga Dawudi yatumwire nti Mukama Katonda wa Isiraeri awaire abantu be emirembe; era abba mu Yerusaalemi emirembe gyonagyona: ²⁶ era Abaleevi tikikaali kibagwaniranga kusitula eweema n'e bintu byonabona ebyaku olw'o kuweereryanga kwayo. ²⁷ Kubanga olw'e bigambo bya Dawudi eby'e nkomerero abaana ba Leevi kyebaaviire babalibwa, abaakamala emyaka abiri n'o kusingawo. ²⁸ Kubanga omulimu gwabwe kuweereryanga bataane ba Alooni olw'o kuweereryanga okw'o mu nyumba ya Mukama, mu mpya n'o mu bisenge, n'o mu kutukulyanga ebintu byonabona ebitukuvu, niigwo mulimu ogw'okuweereryanga okw'o mu nyumba ya Katonda; ²⁹ era n'o lw'e migaati egy'okulaga n'o lw'o bwita obusa obw'e kiweebwayo eky'o bwita, oba migaati gy'e mpewere egitazimbulukuswa oba ekyo ekisiikibwa ku kikalangu, oba ekyo ekiinikibwa, n'o lw'e ngeri gyonagyona ekigero bwe kyekankana n'o bunene bwe bwekankana; ³⁰ n'o kwemereranga buli makeeri okwebalyanga n'o kutenderezanga Mukama, era batyo olweigulo; ³¹ n'okuwangayo ebiweebwayo ebyokyebwa byonabona eri Mukama, ku sabbiiti, n'e myezi nga gyakaiza giboneke, n'o ku mbaga egyateekeibwewo, omuwendo gwabyo ng'e;kiragiro kyabyo bwe kiri, obutayokyanga mu maiso ga Mukama: ³² era bakuumenga eweema ey'o kusisinkanirangamu gye bagisisiibwe, n'e kifo ekitukuvu kye bgisisiibwe, n'ebyo bataane ba Alooni bagande baabwe bye bagisisiibwe, olw'o kuweereryanga okw'o mu nyumba ya Mukama.