¹ Awo Dawudi n'atumula nti eno niiye nyumba ya Mukama Katonda, era kino niikyo ekyoto e ky'e biweebwayo ebyokyebwa eri Isiraeri. ² Awo Dawudi n'alagira okukuŋaanya banaigwanga ababbaire mu nsi y'e Isiraeri; n'ateekawo ab'a mabbaale okutema amabbaale amabaize okuzimba enyumba ya Katonda. ³ Dawudi n'ategeka ebyoma bingi olw'e ninga n'e njigi egy'e mizigo n'o lw'e bigaita; n'ebikomo bingi ebitapimika; ⁴ n'emivule egitabalika: kubanga Abazidoni n'Abatuulo baaleetere emivule mingi eri Dawudi. ⁵ Dawudi n'atumula nti Sulemaani mutaane wange akaali mwana mutomuto, n’e nyumba eyaba okuzimbirwa Mukama egwana okubba ey'e kitiibwa ekinene einu, okwatiikirira n'o kutenderezebwa mu nsi gyonagyona: kyendiva ngitegekera. Awo Dawudi n'ategeka bingi inu nga akaali okufa. ⁶ Awo n'ayeta Sulemaani mutaane we n'a mukuutira okuzimbira enyumba Mukama Katonda wa Isiraeri. ⁷ Dawudi n'akoba Sulemaani mutaane we nti nze, kyabbaire mu mwoyo gwange okuzimbira eriina lya Mukama Katonda wange enyumba. ⁸ Naye ekigambo kya Mukama ne kingizira nti wayiwire omusaayi mungi, n'o lwana entalo enkulu: tozimbira liina lyange nyumba, kubanga wayiwire omusaayi mungi ku nsi mu maiso gange; ⁹ Bona, olizaalirwa omwana wa bwisuka, aliba musaiza w'e mirembe; era ndimuwa emirembe eri abalabe be bonabona enjuyi gyonagyona: kubanga eriina lye alibba Sulemaani, era ndiwa emirembe n'o kutereera eri Isiraeri ku mirembe gye: ¹⁰ oyo niiye alizimbira eriina lyange enyumba; era yabbanga mwana wange, nzena naabbanga itaaye; era ndinywezya entebe ey'o bwakabaka bwe ku Isiraeri emirembe gyonagyona. ¹¹ Kale, mwana wange, Mukama abe naiwe; obone omukisa, ozimbe enyumba ya Mukama Katonda wo, nga bwe yakutumwireku. ¹² Kyooka Mukama akuwe amagezi n'o kutegeera, akukuutire ebya Isiraeri; kaisi okwate amateeka ga Mukama Katonda wo. ¹³ Otyo bwewabonanga omukisa, bwe wekuumanga okukola amateeka n'e misango, Mukama bye yakuutiire Musa ebya Isiraeri: bba n'amaani ogume omwoyo; totya so totekemuka. ¹⁴ Bona, mu kubonyabonyezebwa kwange ntegekeire enyumba ya Mukama talanta egy'e zaabu kasiriivu n'e talanta egy'e feeza kakaire; n'e bikomo n'e byoma ebitapimika; kubanga bingi inu: era n'e misaale n'a mabbaale ntegekere; oyongereku iwe. ¹⁵ Era ate waliwo naiwe abakozi b'e mirimu bangi inu, abatema n'a bakola emirimu egy'a mabbaale n'e misaale, n'a bantu bonabona abalina amagezi ag'o mulimu gonagwona; ¹⁶ zaabu n'e feeza n'e bikomo n'e byoma tibibalika; golokoka okole, era Mukama abbe naiwe. ¹⁷ Era Dawudi n'ablagira n'abakulu bonabona aba Isiraeri okubbeera Sulemaani mutaane we, ng'a tumula nti ¹⁸ Mukama Katonda wanyu tali wamu n'a imwe? era tabawaire mirembe enjuyi gyonagyona? kubanga agabwire ababba mu nsi mu mukono gwange; era ensi ewangwirwe mu maiso ga Mukama, n'o mu maiso g'a bantu be. ¹⁹ Kale munywezye omwoyo gwanyu n'e meeme yanyu okusagira Mukama Katonda wanyu; kale mugolokoke muzimbe ekiigwa kya Mukama Katonda, okuleeta esanduuku ey'e ndagaanu ya Mukama, n'e bintu ebitukuvu ebya Katonda okubiyingirya mu nyumba eyaba okuzimbirwa eriina lya Mukama.