¹ Ni bayingirya esanduuku ya Katonda, ni bagisimba wakati mu weema Dawudi gye yagikubiire: ni baweerayo ebiweebwayo ebyokyebwa n'e biweebwayo olw'e mirembe mu maiso ga Katonda. ² Awo Dawudi bwe yamalire okuwaayo ekiweebwayo ekyokyebwa n'e biweebwayo olw'e mirembe, n'a sabira abantu omukisa mu liina lya Mukama. ³ N'agabira buli muntu mu Isiraeri, abasaiza era n'a bakali, buli muntu omugaati n'o mugabo ogw'e nyama n'e kitole eky'e izabbibu enkalu. ⁴ Era n'ateekawo abamu ku Baleevi okuweereryanga mu maiso g'e sanduuku ya Mukama, n'o kwijukiryanga n'o kwebalyanga Mukama, Katonda wa Isiraeri n'o kumutenderezanga: ⁵ Asafu omukulu, airirira Zekaliya, Yeyeeri, n'o Semiramosi, n'o Yekyeri, n'o Matisiya, n'o Eriyaabu, n'o Benaya, n'o Obededomu, n'o Yeyeeri, nga balina ekongo n'e nanga; n'o Asafu ng'alina ebitaasa nga bivuga inu; ⁶ n'o Benaya n'o Yakaziyeeri bakabona nga balina amakondeere enaku gyonagyona mu maiso g'e sanduuku ey'e ndagaanu ya Katonda. ⁷ Awo ku lunaku olwo Dawudi kwe yasookeire okulagira okwebalya Mukama n'o mukono gwa Asafu na bagande be. ⁸ Mwebalye Mukama, mukungirire eriina lye; Mumanyisye ebikolwa bye mu mawanga. ⁹ Mumwembere, mwembe okumutendereza; Mutumule ku by'a magero bye byonabona. ¹⁰ Mwenyumirirye olw'e rinnya lye eitukuvu; Omwoyo gw'abo abasagira Mukama gusanyuke. ¹¹ Musagire Mukama n'a maani ge; Musagire amaiso ge enaku gyonagyona. ¹² Mwijukire eby'a magero bye, bye yakolere; Eby'ekitalo bye, n'e misango egy'o munwa gwe; ¹³ Imwe ezaire lya Isiraeri omwidu we, Imwe abaana ba Yakobo, abalonde be. ¹⁴ Oyo niiye Mukama Katonda waisu: Emisango gye gibuna ensi gyonagyona. ¹⁵ Mwijukire endagaanu ye enaku gyonagyona. Ekigambo kye yalagiire emirembe olukumi: ¹⁶ (Endagaanu) gye yalagaine n'o Ibulayimu, N'ekirayiro kye yalayiriire Isaaka; ¹⁷ Kyoona n'akinywezya eri Yakobo okubba eiteeka. Eri Isiraeri okubba endagaanu eteriwaawo: ¹⁸ Ng'a tumula nti iwe ndiwa ensi y'e Kanani, Omugabo ogw'o busika bwanyu: ¹⁹ Bwe mwabbaire abantu abatono omuwendo gwanyu; Niiwo awo, abatono einu, era abo batambuli omwo; ²⁰ Ni batambulatambulanga mu mawanga agatali gamu: Nga bava mu bwakabaka ni baigukira mu bantu abandi. ²¹ Teyaganyire muntu kuboonoona; Niiwo awo, yanenyere bakabaka ku lwabwe; ²² Ng'atumula nti Timukomanga ku abo be nafukireku amafuta, So temukolanga kubbiibi banabbi bange. ²³ Mwembere Mukama, imwe ensi gyonagyona; Mwolesye obulokozi bwe buli lunaku buli lunaku. ²⁴ Mubuulire ekitiibwa kye mu mawanga, Eby'a magero bye mu bantu bonabona. ²⁵ Kubanga Mukama mukulu, era agwana okutenderezebwa einu: Era agwana okutiibwa okusinga bakatonda bonabona. ²⁶ Kubanga bakatonda bonabona ab'a mawanga niibyo ebifaananyi: Naye Mukama niiye yakolere eigulu. ²⁷ Ekitiibwa n'o bukulu biri mu maiso ge: Amaani n'e isanyu biri mu kifo kye. ²⁸ Muwe Mukama, imwe ebika eby'a mawanga, Muwe Mukama ekitiibwa n'a maani. ²⁹ Muwe Mukama ekitiibwa ekigwanira eriina lye: Muleete ekiweebwayo, mwize mu maiso ge: Musinze Mukama mu busa obw'o butukuvu: ³⁰ Mutengerere mu maiso ge, imwe ensi gyonagyona: Era n'e nsi enywera n'o kusobola n'etesobola kusagaasagana. ³¹ Eigulu lisanyuke, era n'e nsi ejaguzye; Batumule mu mawanga nti Mukama afuga. ³² Enyanza ewuume, n'o kwizula kwayo; Enimiro ejaguze, n'ebigirimu byonabona; ³³ Emisaale egy'o mu kibira kaisi ni gym a olw'e isanyu mu maiso ga Mukama, kubanga aiza okusalira ensi emisango. ³⁴ Kale mwebalye Mukama; kubanga musa: Kubanga okusaasira kwe kubbeerera emirembe gyonagyona. ³⁵ Mutumule nti Otulokole, Ai Katonda ow'o bulokozi bwaisu, otukuŋaanye otuwonye mu mawanga, okwebalya eriina lyo eitukuvu, n'okujaguzirya eitendo lyo. ³⁶ Yeebazibwe Mukama, Katonda wa Isiraeri, okuva mu mirembe gyonagyona okutuuka mu mirembe gyonagyona. Awo abantu bonabona ni batumula nti Amiina, ni batendereza Mukama. ³⁷ Awo n'aleka eyo mu maiso g'e sanduuku ey'e ndagaanu ya Mukama Asafu n"a bagande be, okuweerereryanga mu maiso g'e sanduuku obutayosyangawo, ng'o mulimu ogwa buli lunaku bwe gwatakanga: ³⁸ n'Obededomu na bagande baabwe, nkaaga mu munaana; era n'Obededomu mutaane wa Yedusuni n'o Kosa okubba abaigali; ³⁹ n'o Zadoki kabona, n'a bagande be bakabona, mu maiso g'e weema ya Mukama mu kifo ekigulumivu ekyabbaire e Gibyoni, ⁴⁰ okuweerangayo ebiweebwayo ebyokyebwa eri Mukama ku kyoto eky'e biweebwayo ebyokyebwa obutayosya amakeeri n'o lweigulo, nga byonabona bwe biri ebyawandiikiibwe mu mateeka ga Mukama, ge yalagiire Isiraeri; ⁴¹ era wamu nabo Kemani n'o Yedusuni, n'abandi abaalondeibwe, abaayatwirwe amaina gaabwe, okwebalya Mukama kubanga okusaasira kwe (kubbeerera) emirembe gyonagyona; ⁴² era wamu nabo Kemani n'o Yedusuni nga balina amakondeere n'e bitaasa olw'abo abaabire okubikubba, era (nga balina) ebireeta enyembo gya Katonda: na bataane ba Yedusuni okubba ku mulyango. ⁴³ Abantu bonabona ni baaba buli muntu ewuwe: Dawudi n'airayo okusabira enyumba ye omukisa.