¹ Awo Dawudi ni yeezimbira enyumba mu kibuga kya Dawudi: n'ategekera esanduuku ya Katonda ekifo, n'agikubbira eweema. ² Awo Dawudi n'atumula nti ti kisa omuntu yenayena okusitula esanduuku ya Katonda wabula Abaleevi: kubanga abo Mukama be yalondere okusitulanga esanduuku ya Katonda, n'o kumuweereryanga enaku gyonagyona. ³ Awo Dawudi n'akuŋaanya Isiraeri yenayena e Yerusaalemi, okuniniinisya esanduuku ya Mukama mu kifo kyayo kye yabbaire agitegekeire. ⁴ Dawudi n'akuŋaanya bataane ba Alooni n'Abaleevi: ⁵ ku bataane ba Kokasi; Uliyeri omukulu, na bagande be kikumi mu abiri: ⁶ ku bataane ba Merali; Asaya omukulu, na bagande be ebibiri mu abiri; ⁷ ku bataane ba Gerusomu: Yoweeri omukulu, ni baaba niibo kikumi mu asatu: ⁸ ku bataane ba Erizafani; Semaaya omukulu, ne baaba niibo ebibiri: ⁹ ku bataane ba Kebbulooni; Eryeri omukulu, na bagande be kinaana: ¹⁰ ku bataane ba Wuziyeeri; Aminadaabu omukulu, ni baaba niibo kikumi na ikumi na babiri. ¹¹ Dawudi n'ayeta Zadoki n'o Abiyasaali bakabona, n'Abaleevi, Uliyeri n'o Asaya n'o Yoweeri, Semaaya n'o Eryeri n'o Aminadaabu, ¹² n'abakoba nti imwe muli mitwe gy'e nyumba gya bazeiza babwe egy'Abaleevi: mwetukulye, imwe era n'a bagande banyu, kaisi muniinisye esanduuku ya Mukama Katonda wa Isiraeri mu kifo kye ngitegekeire. ¹³ Kubanga temwasookere kugisitula, Mukama Katonda waisu Kyeyaviire atuwamatukira, kubanga titwamusagiire nekiragiro bwe kyabbaire. ¹⁴ Awo bakabona n'Abaleevi ni beetukulya okuniinisya esanduuku ya Mukama Katonda wa Isiraeri. ¹⁵ Abaana b'Abaleevi ni basitulira esanduuku ya Katonda ku bibega byabwe n'e misituliro gyaku nga Musa bwe yalagiire ng'e kigambo kya Mukama bwe kyabbaire. ¹⁶ Dawudi n'akoba Abaleevi abakulu okulonda bagande baabwe abembi, nga balina ebivuga, ekongo n'e nanga n'e bitaasa, nga babikubba era nga bayimusya eidoboozi n'e isanyu, ¹⁷ Awo Abaleevi ni balonda Kemani mutaane wa Yoweeri; n'o ku bagande be, Asafu mutaane wa Berekiya; n'o ku bataane ba Merali bagande baabwe, Esani mutaane wa Kusaya; ¹⁸ era wamu nabo bagande baabwe ab'o mutindo ogw'o kubiri, Zekaliya, Beni, n'o Yaaziyeri, n'o Semiramosi, n'o Yekyeri, n'o Unni, Eriyaabu, n'o Benaya, n'o Maaseya, n'o Matisiya, n'o Erifereku, n'o Mikuneya, n'o Obededomu, n'o Yeyeeri, abaigali. ¹⁹ Awo abembi, Kemani, Asafu, n'o Esani, ni balondebwa, nga balina ebitaasa eby'e bikomo okuvuga; ²⁰ Zekaliya, n'o Aziyeri, n'o Semiramosi, n'o Yekyeri, n'o Unni, n'o Eriyaabu, n'o Maaseya, n'o Benaya, nga balina ekongo egy'e kyalamosi; ²¹ n'o Matisiya, n'o Erifereku, n'o Mikuneya, n'o Obededomu, n'o Yeyeeri, n'o Azaziya, nga balina enanga egy'e kiseminisi, egy'o kuleetereryanga. ²² N'o Kenaniya omukulu w'Abaleevi iye yalabiriranga okwemba: iye yayegeresyanga eby'o kwemba kubanga mutegeevu. ²³ N'o Berekiya n'o Erukaana niibo babbaire abaigali ab'oku sanduuku. ²⁴ N'o Sebaniya n'o Yosafaati n'o Nesaneri n'o Amasayi n'o Zekaliya n'o Benaya n'o Eryeza bakabona be baafuuwanga amakondeere mu maiso g'e sanduuku ya Katonda: n'o Obededomu n'o Yekiya niibo babbaire abaigali ab'o ku sanduuku. ²⁵ Awo Dawudi n'abakaire ba Isiraeri n'abaami b'enkumi ni baaba okuginiinisya esanduuku ey'e ndagaanu ya Mukama okugitoola mu nyumba ya Obededomu n'e isanyu: ²⁶ awo olwatuukire Katonda bwe yayambire Abaleevi abaasitwire esanduuku ey'e ndagaanu ya Mukama, ni bawaayo ente musanvu n'e mbuli enume musanvu. ²⁷ Dawudi n'avaala omunagiro ogw'e bafuta ensa, n'Abaleevi bonabona abaasitwire esanduuku n'abembi n'o Kenaniya omukulu w'o kwemba wamu n'abembi: era Dawudi yabbaire avaire ekanzo eye bafuta, ²⁸ Batyo Isiraeri yenayena ne baniinisya esanduuku ey'e ndagaanu ya Mukama n'o kutumulira waigulu n'e idoboozi ery'e ŋombe n'a makondeere n'e bisaala nga bakubba inu ekongo n'e nanga. ²⁹ Awo olwatuukire esanduuku ey'e ndagaanu ya Mukama bwe yabbaire ng'eiza mu kibuga kya Dawudi, Mikali muwala wa Sawulo n'alengezya mu dirisa, n'a bona kabaka Dawudi ng'a kina era ng'a zanya; n'amunyooma mu mwoyo gwe.