¹ Awo Abaisiraeri bonabona ne bakuŋaanira eri Dawudi e Kebbulooni, nga batumula nti bona, tuli b'o ku magumba go n'o mubiri gwo. ² Mu biseera eby'eira Sawulo bwe yabbaire nga niiye kabaka, gwe wafulumyanga n'oyingirya Isiraeri: Mukama Katonda wo n'akukoba nti iwe oliriisya abantu bange Isiraeri, era niiwe olibba omulangira w'a bantu bange Isiraeri. ³ Awo abakaire bonabona aba Isiraeri ni baiza eri kabaka e Kebbulooni; Dawudi n'a lagaana nabo endagaanu e Kebbulooni mu maiso ga Mukama; ni bafuka ku Dawudi amafuta okubba kabaka wa Isiraeri, ng'ekigambo kya Mukama bwe kyabbaire mu mukono gwa Samwiri. ⁴ Awo Dawudi ne Isiraeri yenayena ne baaba e Yerusaalemi (niiyo Yebusi;) era Abayebusi, niibo b'omu nsi eyo, babbaire eyo. ⁵ Awo Abayebusi ni bakoba Dawudi nti Toiza kuyingira muno. Naye Dawudi n'amenya ekigo kye Sayuuni; ekyo niikyo kibuga kya Dawudi. ⁶ Dawudi n'atumula nti Buli eyasooka okubbinga Abayebusi niiye alibba omukulu era omwami. Awo Yowaabu mutaane wa Zeruyiya n'asooka okuniina, n'afuuka mukulu. ⁷ Dawudi n'abba mu kigo; kyebaaviire bakyeta ekibuga kya Dawudi. ⁸ N'a zimba ekibuga enjuyi gyonagyona, okuva e Miiro n'e njuyi gyonagyona: Yowaabu n'adaabirirya ebitundu by'e kibuga ebyasigairewo. ⁹ Dawudi ne yeeyongerayongeranga okubba omukulu; kubanga Mukama ow'e igye ng'ali naye. ¹⁰ Era bano niibo basingire obukulu mu bazira Dawudi be yabbaire nabo, abeeragire nga ba maani eri iye mu bwakabaka bwe wamu ne Isiraeri yenayena, okumufuula kabaka, ng'e kigambo kya Mukama bwe kyabbaire ekya Isiraeri. ¹¹ Era guno niigwo muwendo gw'a b'amaani Dawudi be yabbaire nabo: Yasobeyamu, omwana w'Omukakumoni, omukulu w'abo asatu: yayimusirye eisimu lye okulwana n'e bisatu n'abaita omulundi gumu. ¹² N'o luvanyuma lw'oyo Eriyazaali mutaane wa Dodo, Omwakowa, ow'o ku basaiza ab'a maani abasatu. ¹³ Oyo yabbaire wamu n'o Dawudi e Pasudamiimu, era Abafirisuuti ni bakuŋaanira eyo okulwana, awaali omusiri ogwa sayiri; abantu ni bairuka mu maiso g'Abafirisuuti. ¹⁴ Ni bemerera wakati mu nimiro ne bagulwanirira, ni baita Abafirisuuti; Mukama n'abalokola n'okuwangula okukulu. ¹⁵ Awo abasatu ku bakulu asatu ni baserengeta eri olwazi eri Dawudi, mu mpuku ya Adulamu; eigye ly'Abafirisuuti nga basiisiire mu kiwonvu Lefayimu. ¹⁶ Era Dawudi yabbaire ali ku kirukiro mu biseera ebyo, n'Abafirisuuti ab'omu kigo nga bali mu Besirekemu. ¹⁷ Dawudi ni yeegomba n'atumula nti Singa wabbairewo eyanywisya amaizi ag'omu nsulo ey'e Besirekemu, eriraine omulyango! ¹⁸ Awo abo abasatu ni bawagulya mu igye ly'Abafirisuuti, ni basena amaizi mu nsulo y'e Besirekemu eriraine omulyango, ni bagatwala ni bagaleetera Dawudi: naye Dawudi n'ataikirirya kunywaku, naye n'agafuka eri Mukama, n'atumula nti ¹⁹ Katonda wange akiirirye edi gye ndi nze okukola ntyo: nywe omusaayi gw'abasaiza bano abaviire mu bulamu bwabwe? kubanga bagaleetere nga baviire mu bulamu bwabwe. Kyeyaviire agaana okuganywa. Ebyo Abasaiza abo ab'a maani abasatu bye baakolere. ²⁰ Era Abisaayi mugande wa Yowaabu niiye yabbaire omukulu w'a basatu kubanga yayimusirye eisimu lye okulwana n'e bisatu n'abaita, n'ayatiikirira ku basatu. ²¹ Ku abo abasatu yabbaire n'e kitiibwa okusinga ababiri, n'afuuka omukulu waabwe: naye n'atekankana abasatu ab'o luberyeberye. ²² Benaya mutaane wa Yekoyaada omwana w'o muzira ow'e Kabuzeeri, eyabbaire akolere eby'a maani, oyo n'aita bataane ba Alyeri, owe Mowaabu bombiri: era n'aserengeta n'aita empologoma wakati mu kiina mu biseera eby'omuzira. ²³ Era n’aita Omumisiri, Omusaiza omuwanvu einu, obuwanvu bwe emikono itaanu; era Omumisiri yabbaire akwaite mu ngalo gye eisimu eryabbaire ng'o musaale ogulukirwaku engoye; yaserengetere gy'ali ag'alina omwigo, n'asika eisimu n'alitoola mu mukono gw'Omumisiri, n'amwita n'eisimu lye iye. ²⁴ Ebyo Benaya mutaane wa Yekoyaada bye yakolere, n'ayatiikirira ku basaiza abo ab'a maani abasatu. ²⁵ Bona, yabbaire n'ekitiibwa okusinga abo asatu, naye n'atekankana abasatu ab'o luberyeberye: Dawudi n'amufuula omukulu w'a bambowa be. ²⁶ Era Abasaiza ab'a maani ab'o mu igye; Askeri mugande wa Yowaabu, Erukanani mutaane wa Dodo ow'e Besirekemu; ²⁷ Samosi Omukalooli, Kerezi Omuperoni; ²⁸ Ira mutaane wa Ikesi Omutekowa, Abiyezeeri Omwanasosi; ²⁹ Sibbekayi Omukusasi, Irayi Omwakowa; ³⁰ Makalayi Omunetofa; Keredi mutaane wa Bayaana Omunetofa; ³¹ Isayi mutaane wa Libayi ow'e Gibeya ow'o ku baana ba Benyamini, Benaya Omupirasoni; ³² Kulayi ow'o ku bwiga obw'e Gaasi, Abyeri Omwaluba; ³³ Azimavesi Omubakalumi, Eriyaba Omusaaluboni: ³⁴ bataane ba Kasemu Omugizoni, Yonasaani mutaane wa Sage Omukalali; ³⁵ Akiyamu mutaane wa Sakali Omukalali, ,Erifali mutaane wa Uli; ³⁶ Keferi Omumekera, Akiya Omuperoni; ³⁷ Kezulo Omukalumeri, Naalayi mutaane wa Ezubayi; ³⁸ Yoweeri mugande wa Nasani, Mibukali mutaane wa Kaguli; ³⁹ Zereki Omwamoni, Nakalayi Omubeerosi, eyatwaliranga Yowaabu mutaane wa Zeruyiya ebyokulwanyisa bye; ⁴⁰ Ira Omuyisuli, Galebu Omuyisuli; ⁴¹ Uliya Omukiiti, Zabadi mutaane wa Akulayi; ⁴² Adina mutaane wa Siza Omulewubeeni, omwami ow'o mu Balewubeeni, n'asatu wamu naye; ⁴³ Kanani mutaane wa Maaka, n'o Yosafati Omumisuni; ⁴⁴ Uziya Omwasutaloosi, Sama n'o Yeyeeri bataane ba Kosamu Omwaloweri; ⁴⁵ Yediyayeri mutaane wa Simuli, n'o Yoka mugande we, Omutiizi; ⁴⁶ Eryeri Omumakavi, n'o Yeribayi, n'o Yosaviya, bataane ba Erunaamu, n'o Isuma Omumowaabu; ⁴⁷ Eryeri n'o Obedi n'o Yaasiyeri Omumezoba.