¹ Era bano niibo baizire eri Dawudi e Zikulagi ng'a kaali yegisire olwa Sawulo, mutaane wa Kiisi: era baabbanga mu basaiza ab'a maani abaamubbeeranga okulwana. ² Bakwatanga emitego era basoboire okuvuumuula amabbaale n'o kulasa obusaale ku mutego n'omukono omulyo era n'o mugooda; babbaire bo ku bagande ba Sawulo, ba Benyamini. ³ Akiyezeri niiye yabbaire omukulu, Yowaasi n'a mwiririra, bataane ba Sema Omugibeya; n'o Yeziyeri n'o Pereti, bataane ba Azumavesi; n'o Beraka, n'o Yeeku Omwanasosi; ⁴ n'o Isumaya Omugibyoni, Omusaiza ow'a maani mu abo asatu, era omukulu w'asatu; Yeremiya, n'o Yakaziyeri, n'o Yokanani, n'o Yozabadi Omugederi; ⁵ Eruzayi n'o Yerimosi, no Beyaliya n'o Semaliya, n'o Sefatiya Omukalufu; ⁶ Erukaana n'o Issiya n'o Azaleri n'o Yowezeeri n'o Yasobeyamu, Abakoola; ⁷ n'o Yowera n'o Zebadiya, bataane ba Yerokamu ow'e Gedoli. ⁸ N'o ku Bagaade ni kweyawula abasengereirye Dawudi ku kirukiro mu idungu abasaiza ab'a maani abazira, Abasaiza abayegereseibwe okulwana, abasoboire okukwata engabo n'eisimu; amaiso gaabwe nga gafaanana amaiso g'e mpologoma, era ab'e mbiro ng'e mpuuli egiri ku nsozi; ⁹ Ezeri omukulu, Obadiya ow'o kubiri, Eriyaabu ow'o kusatu; ¹⁰ Misumanna ow'o kuna, Yeremiya ow'o kutaanu; ¹¹ Atayi ow'o mukaaga, Eriyeri ow'o musanvu; ¹² Yokanani ow'o munaana, Eruzabadi ow'o mwenda; ¹³ Yeremiya ow'e ikumi, Makubannayi ow'e ikumi n'o mumu. ¹⁴ Abo ab'o ku baana ba Gaadi niibo babbaire abakulu b'e igye; omutomuto nga yekankana ekikumi, n'o mukulu nga yekankana olukumi. ¹⁵ Abo niibo baasomokere Yoludaani mu mwezi ogw'o luberyeberye, nga gumalire okwanjaala ku itale lyagwo lyonalyona; ne babbinga abo bonabona ab'o mu biwonvu, ebuvaisana era n'e bugwaisana. ¹⁶ Awo ku baana ba Benyamini ne Yuda ne kwiza mu kirukiro eri Dawudi. ¹⁷ Dawudi n'afuluma okubasisinkana, n'airamu n'abakoba nti Oba nga mwizire gye ndi mirembe okunyamba, omwoyo gwange gwegaita naimwe: naye oba nga mwizire okundyamu olukwe eri abalabe bange, nga mubula kabbiibi mu mikono gyange, Katonda wa bazeiza baisu akiringirire, akinenye: ¹⁸ Awo omwoyo kaisi ni gwiza ku Amasayi, eyabbaire omukulu w'abo asatu, n'atumula nti Tuli babo, Dawudi, era tuli ku lulwo, iwe mutaane wa Yese: emirembe, emirembe gibbe gy'oli, era emirembe gibe eri abo abakuyamba; kubanga Katonda wo akuyamba. Awo Dawudi n'abasangalira, n'abafuula abaami b'e kitongole. ¹⁹ Era n'o ku Manase n'o kusenguka abamu n'o basenga Dawudi, bwe yaizire awamu n'Abafirisuuti okutabaala Sawulo, naye ne batabayamba: kubanga abakungu b'Abafirisuuti bwe bamalire okuteesya ne bamubbinga, nga batumula nti eyasenga mukama we Sawulo n'aleeta akabbiibi ku mitwe gyaisu. ²⁰ Bwe yabbaire ng'ayaba e Zikulagi, ni kumusenga ku Manase Aduna n'o Yozabadi n'o Yediyayaeri n'o Mikayiri n'o Yozabadi n'o Eriku n'o Zirresayi, abaami b'enkumi aba Manase. ²¹ Ni bayamba Dawudi okulwana n'e kibiina eky'abakwekweti: kubanga bonabona babbaire basaiza ba maani abazira, era nga baami ab'o mu igye. ²² Kubanga buli lunaku ni baiza eri Dawudi okumuyamba, okutuusya lwe baafuukire eigye einene, erifaanana eigye lya Katonda. ²³ Era gino niigyo miwendo gy'emitwe gy'abo abaakwaite ebyokulwanisya okulwana, abaizire eri Dawudi e Kebbulooni, okukyusya obwakabaka bwa Sawulo eri iye, ng'e kigambo kya Mukama bwe kyabbaire. ²⁴ Abaana ba Yuda abaakwatanga engabo n'e isimu babbaire kakaaga mu lunaana abaakwaite ebyokulwanisya okulwana. ²⁵ Ku baana ba Simyoni abasaiza ab'a maani abazira okulwana, kasanvu mu kikumi. ²⁶ N'o ku baana ba Leevi, enkumi ina mu lukaaga. ²⁷ Era Yekoyaada niiye yabbaire omukulemberi w'e nyumba ya Alooni, era ni wabba wamu naye enkumi isatu mu lusanvu; ²⁸ n'o Zadooki, omwisuka ow'a maani omuzira, n'o ku nyumba ya itaaye, abaami abiri n'a babiri. ²⁹ N'o ku baana ba Benyamini, Bagande ba Sawulo, enkumi isatu: kubanga okutuusya ku biseera ebyo abasingire obungi babbaire banywereire ku nyumba ya Sawulo. ³⁰ N'o ku baana ba Efulayimu, emitwalo ibiri mu lunaana, abasaiza ab'a maani abazira, abasaiza abayatiikiriire mu nyumba gya bazeiza babwe. ³¹ N'o ku kitundu ky'e kika kya Manase, mutwalo mu kanaana, abayatwirwe amaina gaabwe okwiza okufuula Dawudi kabaka. ³² N'o ku baana ba Isakaali, abasaiza abaategeera ebiseera bwe byabbaire, okumanya ebigwaniire Isiraeri okukola; emitwe gyabwe gyabbaire bibiri; ni babba baabwe bonabona bagonderanga okulagira kwabwe. ³³ Ku Zebbulooni abo abasobola okutabaala mu igye, abasoboire okusimba enyiriri, N'ebyokulwanisya eby'e ngeri gyonagyona, emitwalo itaanu; era abasoboire okusimba (enyiriri,) so abatabbaire be myoyo ibiri. ³⁴ Ne ku Nafutaali, abaami lukumi, era wamu n'abo Ababbaire n'e ngabo n'e isimu, emitwalo isatu mu kasanvu. ³⁵ N'o ku Badani abasoboire okusimba enyiriri, emitwalo ibiri mu kanaana mu lukaaga. ³⁶ N'o ku Aseri, abasoboire okutabaala mu igye, abasoboire okusimba enyiriri, emitwalo ina. ³⁷ N'emitala wa Yoludaani, ku Balewubeeni n'Abagaadi n'o ku kitundu ky'e kika kya Manase, nga balina eby'okulwanisya eby'e ngeri gyonagyona olw'o lutalo, kasiriivu mu emitwalo ibiri. ³⁸ Abo bonabona, abasaiza abalwani, abasoboire okusimba enyiriri, ni baiza n'o mwoyo ogwatuukiriire e Kebbulooni, okufuula Dawudi kabaka wa Isiraeri yenayena: era n'Abaisiraeri abandi bonabona babbaire n'o mwoyo gumu okufuula Dawudi kabaka. ³⁹ Awo ne bamalayo wamu n'o Dawudi enaku isatu nga balya era nga banywa: kubanga bagande baabwe babbaire babategekeire. ⁴⁰ Era ate abo ababbaire okumpi, okutuuka ku Isakaali ne Zebbulooni ne Nafutaali, ni baleeta emigaati ku ndogoyi n'o ku ŋamira n'o ku nyumbu n'o ku nte, ebyokulya eby'o bwita; n'ebitole eby'e itiini n'e biyemba eby'e izabbibu enkalu n'o mwenge n'amafuta n'e nte n'e ntama nyingi: kubanga mu Isiraeri nga mulimu eisanyu.