¹ Awo Abafirisuuti ni balwana ne Isiraeri: abasaiza ba Isiraeri ni bairuka Abafirisuuti ni bagwa nga baitiibwe ku lusozi Girubowa. ² Abafirisuuti ni bacoca Sawulo n'a bataane be; Abafirisuuti ni baita Yonasaani, n'o Abinadaabu, n'o Malukisuwa, bataane ba Sawulo. ³ Awo olutalo Sawulo ni lumwabira kubbiibi, abalasi ne bamutuukaku; niyeeraliikirira olw'abalasi. ⁴ Awo Sawulo n'akoba oyo eyatwalanga ebyokulwanisya bye nti Sowola ekitala kyo onsumitire dala nakyo; abatali bakomole abo baleke okwiza ni banswaza. Yena eyatwalanga ebyokulwanisya bye n'agaana; kubanga yatiire inu. Sawulo kyeyaviire airira ekitala kye n'akigwaku. ⁵ Awo eyatwalanga ebyokulwanisya bye bwe yaboine Sawulo ng'afiire, era yena n'agwa ku kitala kye n'afa. ⁶ Sawulo n'afa atyo na bataane be bonsatu; n'a b'o mu nyumba ye bonabona ni bafiira wamu. ⁷ Awo abasaiza bonabona aba Isiraeri ababbaire mu kiwonvu bwe baboine nga bairukire, era nga Sawulo n'a bataane be bafiire, n'e baleka ebibuga byabwe ni bairuka; Abafirisuuti ni baiza ne babibbamu. ⁸ Awo olwatuukire olw'okubiri, Abafirisuuti bwe bairize okwambula abaitiibwe, ne basanga Sawulo n'a bataane be nga bagwire ku lusozi Girubowa. ⁹ Ni bamwambula, ne bairira omutwe gwe N'e byokulwanyisya bye, ni batuma mu nsi y'Abafirisuuti enjuyi gyonagyona, okutwala ebigambo ebyo eri ebifaananyi byabwe, n'eri abantu. ¹⁰ Ne bateeka eby'o kulwanisya bye mu isabo lya bakatonda baabwe, ne basimba omutwe gwe mu isabo lya Dagoni. ¹¹ Awo ab'e Yabesugireyaadi bonabona bwe baawuliire byonabyona Abafirisuuti bye bakolere Sawulo. ¹² abazira bonabona ni bagolokoka ni batoolayo omulambo gwa Sawulo n'e mirambo gya batataane be, ni bagireeta e Yabesi, ni baziika amagumba gaabwe wansi w'o mwera e Yabesi, ni basiibira enaku musanvu. ¹³ Atyo Sawulo n'afa olw'okusobya kwe kwe yasoberye Mukama, olw'e kigambo kya Mukama ky'ataakwaite; era kubanga yalagwiilwe eri eyabbaireku omuzimu, okumubuuliryaamu, ¹⁴ n'atalagulwa eri Mukama: kyeyaviire amwita, n'akyusya obwakabaka eri Dawudi mutaane wa Yese.