Wase 27

1 E na gauna sa vakatulewataki oji kina ni dodonu me keimami sa soko ki Itali, era sa qai soli Paula kei na so tale a kaivesu kina dua a turaga ni valu a yacana ko Juliase, ko kaya, ka wili vata jiko kei na dua a matai lawalawa sotia i Akusito. 2 Keimami sa vodo kina dua a waqa mai Atiramitio ka sa vakarau tu me sokota yani a baravi ni vanua vaka Esia. Keimami sa qai soko yani ki loma ni waitui. Ko Asisitako e dua a kai Cesolonaika mai Masitonia ka sa lako vata jiko kei keimami. 3 A ona siga ka dua keimami sa kele yani kina koro turaga ko Saitoni, sa lomani Paula ko Juliase ka sa qaravi ko koya sara vakavinaka, ka sa vakaio sara me sa na jiko vata kei ira a wekana. 4 Sa toso sara yani a weimami i lakolako ka keimami sa soko volekata sara yani a yanuyanu ko Kipiro me vaka ni keimami sa coqa jiko ga yani a ua ni sa vaka me draki ca mai. 5 Keimami sa soko takosova a wasawasa ka sa siriji Silisia kei Pamifilia, ka keimami sa kele sara yani ki Maira a koro turaga mai Lisia. 6 Mai ei, sa qai boka kina a turaga ni valu e dua a waqa mai Aleksadria ka sa vakarau soko jiko yani ki Itali, sa qai vakavodoki keimami kina. 7 Keimami sa soko vakamalua jiko ka rauta e vica vata a siga, ka sa vaka sa yaco mai veikeimami a dredre levu. Ni keimami sa voleka yani ki Nito, ka sa tawa rawa sara ga ni keimami saqata yani a cagi, keimami sa qai soko volekaji Kiriti ka veidonui sara ga kei Salimoni me keimami vakaruru kina. 8 Sa bau dredre djina sara ga a weimami soko volekata jiko mai a baravi, ka keimami sa yaco sara mai kina dua a vanua ka vakayacani tu me Toba Maravu, ka sa voleka sara kina koro ko Lasea. 9 Sa balavu sara a gauna ni weimami soko, ka keimami sa pasitakina sa a gauna ni odra dau lolo a Jiu, ka sa dau gauna vakadomobula taka ni soko. 10 Sa qai soli i vakasala ko Paula ka kaya, "Kemudou a turaga, ai lakolako ka keta sa lako jiko kina iei, e na levu sara a meca ca e na yacova a weta i lakolako, e na tawa yaco wale ga kina i usana kei na waqa, e na yacovi kei keta sara tale ga a lewe ni lakolako." 11 Ia, a turaga ni valu sa vakabauti rau cake a kapiteni ni waqa kei nai taukei ni waqa mai na ona na vakabauta a meca ka kaya ko Paula. 12 Me vaka ni tawa meca rawarawa a sotava a draki batabata ina loma ni toba, e ra sa dau vakasalataki a dau soko me ra lako sara me ra yaco kina koro ko Finaisi, me ra na dau vakaruru kina ina gauna ni draki batabata. Ko Finaisi, e dua toba mai Kiriti ka tadravi rau ruarua no yani a ceva-i-ra kei na tokalau vualiku. 13 A gauna e sa dau tekivu ola vakamalua toka kina i ceva, ko ira a dau soko e ra sa dau nanuma sara ga sa na qai draki vinaka ni soko. E ra sa dau yavia sara ga a odra i kelekele ni waqa, ka soko raviji Kiriti vaka ki vanua. 14 Ni ogi ga e dua a gauna lekaleka ni odra soko, sa vaka me kaukauwa mai a cagi me vaka sara ga e dua a cagilaba, ka dau yacana tu a Urokilitoni, ka sa waborakina sara ga vakaca a yanuyanu. 15 Sa qai ponoka kosa a weimami waqa a cagi laba ka sa tawa rawa tale ni coqata yani a cagi; e ra sa dau vakarorogo tu ga yani ki na vanua e sa kauji ira tu yani kia a cagi. 16 Keimami sa qai soko volekata e dua a yanuyanu lailai a yacan ko Kilota, ka sa bau dredre sara ga me keimami maroroyo a vebvelo ni waqa. 17 E ra sa dereki takina cake a velovelo, ka ra sa vakayaga takina a dali mera vesuka kina a velovelo ki na waqa. E ra sa qai rere ni sa voleka sara me ra kasa, e ra sa qai biuta ai kelekele ka vakarorogo yani kina cagi se na vanua cava e na savu yani kina a waqa. 18 Sa qai yavalaji vakalevu ga a waqa i na kaukauwa ni cagi, e na siga ka dua sa tekivu me ra viritakina ki wai e so ai usana ni waqa. 19 Sa i katolu ni siga ka ra sa viritakina ki wai ko ira a dau soko a i gacagaca ni waqa. 20 Sa qai tawa cila sara ga a matanisiga kei na kalokalo me vica vata a siga, ka sa waborakini keimami jiko ga a cagi kaukauwa, ka sa qai oji vakadua sara ga meca ka dodonu me keimami vakanuinui kina. 21 Sa dede mai a odra lako, ka sa oji mai a kedra kakana, sa qai tucake ko Paula ka kaya, "Kemudou a turaga, ka dodonu me kemudou a vakarorogo vei au, me keta ka kakua ga ni soko mai Kiriti, ke a tawa yaco kina vei keiketa a mavoa kei na yali ka keta sa mai sotava tu. 22 Ni kua, au sa vakamasuji kemudou mo dou yaloqaqa, ni na tawa dua e na mate vei keiketa, e na ca ga a waqa. 23 E na bogi, e a lako mai vei au e dua agilosi ni Kalou kau dau vakabauta ka qarava, sa mai yavu tu i rukuqu ka kaya, 24 'Kakua ni rere Paula, ko na tucake ina matai Sisa, me na raica a ona veikauwaitaki a Kalou ni sa maroroi kemudou taucoko sara a lewe ni waqa, ka ra sa vakarorogo taucoko tu kina omu vakatulewa.' 25 Au sa kaya kina vei kemudou a turaga, dou yaloqaqa! A qou vakabauta a Kalou, e na yaco djina sara ga a meca e kaya me na yaco vei au. 26 Ia, keta sa na kada wavokita jiko mada ga eso a yanuyanu lalai. 27 Keimami sa yacova mai ai ka jinikava ni bogi ni weimami sokota jiko mai a wasawasa mai Atiria. Ni sa qai lomaloma ni bogi e ra sa nanuma sara ga a dausoko ni ra sa voleka yani kina dua a vanua. 28 E ra sa qai vakorautakina a i yalayala ni wai ka sa rauta ni katu ruasagavulu; ni oji tale e dua a gauna lekaleka, e ra sa baci vakarautakina tale a wai ka ra sa kila ni sa katu jinikalima. 29 Keimami sa rere, lakolako keimami na coqata e dua a vatu, keimami sa qai biuta e va a odra i nokanoka ina mua i mada ni odra waqa ki wai. 30 31 Ia ko Paula sa qai kaya kina turaga ni valu kei ira a sotia, "Kevaka era na jiko i loma ni waqa a tamata, era na tawa rawa ni mate." 32 E ra sa qai musuka a dali ni velovelo a sotia ka biuta me ciri, yawa yani. 33 Sa qai basika cake mai a rarama, ka sa vakayaloqaqatakini ira ko Paula me ra kana mada. A sa kaya, "Ni kua, e sa i ka jinikava ni siga ni omunu lolo tu ka tawa kani a sara e dua a kakana." 34 Au sa vakamasuji kemunu me kemunu veiwaseitakina e so a kakana, e na yaga vakalevu sara me kemunu na bula toka kina. Ni na tawa dua sara vei kemunu e na kukuru e dua a drau ni uluna." 35 Ni sa vosa oji ko koya sa qai taura a madrai ka vakavinavinakatakina a Kalou kina matadra taucoko. Sa qai musuka a madrai ka tekivu kana sara. 36 E ra sa qai yaloqaqa ka ra sa kana sara. 37 Keimami lewe rua a drau vitusagavulu ka ono taucoko keimami bula jiko i waqa. 38 E ra sa kana ka ra sa bula, era sa qai vakamamatakina a waqa ka ra sa biuta ki wai a sila. 39 Sa qai rarama mai, ka ra sa tawa kila a vanua, era sa qai boka ga e dua a toba kei na ona baravi, ka ra sa veitalanoatakina se sa rawa ni ra vakagolea a waqa me kele kina. 40 Sa ra qai taya musuka a odra dali ni nokanoka ka biuta mera ciri yani. A gauna e ra sa musuka kina a dali ni kelekele e sa qai biri ka a laca ka vakarorogo yani kina cagi me kauti ira yani ki vanua. 41 E ra sa coqa tu ga a kui ka sa vakavuna me kasa kina a waqa. Sa tao a mua i mada ni waqa ka sa tawa yavala rawa tale ka sa kavor a waqa ina kaukauwa ni cagi kei na ua. 42 E ra sa nanuma a sotia me ra sa vakamatei ko ira a kai vesu, me na kakua ni dua e qalo bula da ka ra na tuba yani. 43 Ia, a turaga ni valu e vinakata me bula ko Paula, sa qai tarova a odra i tuvatuva me baleji ira a kaivesu, ka sa qai kaya vei ira, me ra rika i mada ko ira era kila a qalo, me ra qalo yani ki vanua. 44 Ia ko ira a vo ni tamata i waqa e ra sa qai muri yani, e sa era taura a papa ni waqa ka so e ra qalo ina so ai yaya ni waqa ga era taura rawa. E ra sa qai toso tu ka yacova ni ra sa cabe bula taucoko lei vanua.