¹ E sa qai kaya vei Paula ko Akaripa, "Vosa mada me baleji iko." Sa qai solia yani a ligana ko Paula, ka kaya a meca sara ga me baleji ko koya. ² Au sa kaya niu sa kalougata, kemunu a Tui Akaripa, meu sa kaya mada i matamunu a meca e ra sa kaya tu me baleji au ko ira a Jiu, ³ baleta kemunu e dua a ona mesamesa ni kila ai valavala kei na i tovo ni vakatataro. Au sa kerei keimamu munu rogoca ka lomana. ⁴ Sa djina sara ni ra sa kila taucoko a Jiu ai valavala ni bula ni bula ni qou tubu cake ina vanua kau u susugi kina mai Jeruisalemi talega. ⁵ E ra sa kilai au mai nai vakatekivu, kevaka era sa rawata me ra vakadjinata, niu sa bula tu vaka e dua a Farisi ka ra sa dau vakadredretakina tu a weta lotu. ⁶ Au sa tu meu sa lewai me baleta a qou vakabauta ina loma ni qou yalayala vata kei na Kalou a Tamada. ⁷ A vosa ni yalayala kai ei, ka ra a vinakata tu mai ai tabatamata e jinikarua me ra ciqoma ina gauna era dau qaravi Kalou kina, na veibogi kei na veisiga, a vakanananu kai ei kemunu a Tui, ka ra sa dusi au jiko kina a Jiu. ⁸ A cava a vuna me ra dau vakameleya tu kina a meca veivakurabuitaki me baleta a ona vakabulai ira tale a tamata mate a Kalou. ⁹ Ia, kaiei, koi au mada ga au vakasamatakina ni dodonu meu sagata e levu sara a meca me baleji Jisu a kai Nasareci. ¹⁰ Au a valata mai Jeruisalemi. Au a vesuka e levu sara a tamata lotu ina odra vaka-tulewa a veiliutaki vakabete, e na gauna ga era sa vakamatei kina; au sa sagqta tale a odra vakatulewa. ¹¹ Au solia ai totogi vei ira taucoko ina gauna ni lotu, au a saga vakaukauwa meu tolorakini ira mera biuta a lotu ka ra dau lotu jiko kina. Au sa borisi sara ga vakalevu vei ira, au sa yanarakini ira vinaka sara ga kei na so tale a veikaro lalai. ¹² Au valata jiko ai tovo kai ei ina gauna kau dau lako jiko kina ki Tamasiko ina odra vakatulewa a bete levu; ¹³ niu sa lako jiko yani, ina siga levu tutu, kemunu a Tui, au a qai boka e dua a rarama sa cila mai lomalagi, e rama sese cake tale mai na rarama ni matasiga, ka sa cilavi keirau ruarua kei na tamata keirau a lako vata jiko. ¹⁴ A gauna keimami sa bale taucoko kina ki na gele, au a rogoca e dua a domo, ni vosa mai vei au e na vosa vaka-Iperiu ka kaya, 'I Saula, I Saula, a cava ko sa vakacacani au kina? E ca vei iko me ko dau caqeta a mata ni moto.' ¹⁵ Au a qai kaya, "Ko cei kemuni o Turaga?" Sa qai sauma a turaga ka kaya, "Koi au ko Jisu ko koya ko sa vakacacana." ¹⁶ Ia, me ko mata cake ka tu cake i yaramu, niu sa dau vakarairai jiko vei iko ka djigitakini iko me ko tamata cakacaka ka dau vakadjinadjinatakina a meca ko sa dau kila me baleji au kei na meca au na qai vakatakekea vakamalua vei iko; ¹⁷ au na qai vakabuki iko mai vei ira a tamata kei ira mai na veimatanitu tani, ko ira kau na vakatala yani vei iko, ¹⁸ me ra dolava a matadra ka vukici ira laivi mai na butobuto kina rarama kei na kaukauwa i Setani kina kaukauwa ni Kalou, me rawa ni ra na rawata mai vua a Kalou a ona veivosoji mai na weta i valavala ca ka veivakaitaukeitakini ira kei ira e ra sa yalosavasava ka sa vakabauji au. ¹⁹ Ni sa na oji kemunu a Tui Akaripa, au tawa kaikainakidredre kina rai vakalomalagi; ²⁰ ia, e na mada sara ga vei ira mai Tamasiko, qai lako yani ki Jeruisalemi, ka curuma yani a vanua vaka Jutia, kei na veimatanitu tani, au sa solia yani vei ira a qou i tukutuku ni dodonu mera na veivutuni mai na yalodra djina. ²¹ A meca cara ga kai ei ka ra vesuki au kina a Jiu ina loma ni vale ni lotu ka ra saga mera vakamatei au. ²² Ia kai ei, sa yaco mai vei au a veivuke ni Kalou me yacova jiko mai a siga ni kua, ia kau sa na tu meu vakadjinadjinatakina vei ira a gone kei ira tale ga a qase ni tawa dua a meca e levu cake mai nai tukutuku ka kaya ko ira a Parofita kei Mosese ena yaco-- ²³ ni Karisito e dodonu me na vakararawataki, ko koya talega mei matai ni tucake tale mai na mate ka na vakadewatakina yani a rarama ki vei ira a ona tamata kei ira a kai matanitu tani. ²⁴ Ia ni sa vakaojia jiko a ona i tukutuku ko Paula, sa kailavakina mai i na domo e levu ko Fesito, "Paula, ko sa lialia, a levu ni meca ko sa kila, sa kauta ga mai vei iko a lialia." ²⁵ Ia ko Paula e kaya, "Au tawa mai lialia tabu saka yani Fesito, ia au sa vakadjinata a vosa djina ka rogorogo vinaka." ²⁶ Ni sa kila jiko a Tui a meca kau sa kaya jiko; ia, kau sa vosa vakayaloqaqatakini ko koya, niu sa kila sa segabau sara a meca e vunitaki rawa vei ko koya, se vala vakavuni. ²⁷ Ko sa vakabauji ira a Parofita, kemunu a Tui Akaripa? Au kila ni kemunu sa vakabauta." ²⁸ Sa qai kaya ko Akaripa vei Paula, "E rawa beka ni ko vukici au ka veisautakini au meu lotu vakarisito ina dua sara a gauna lekaleka?" ²⁹ Sa qai kaya ko Paula, "Au sa masu kina Kalou, se sa vo levu se sa vo lailai a gauna, me kakua vei iko duadua ga, vei ira taucoko talega e ra sa rogoci au ni kua, me ra tautauvata kei au, ia me ra sereki mai na odra i vesu." ³⁰ Sa qai tucake a Tui kei na Kovana, kei Perinaise, kei ira era jiko vata; ³¹ a gauna e ra sa suka mai kina mai na vale ni bose, e ra sa veitalanoatakina vakaira ka kaya, "A tamata kai ei sa segabau sara ga a meca me keta kaya e ca baleji ko koya me na mate se vesu kina." ³² Sa qai vosa vei Fesito ko Akaripa ka kaya, kevaka sa segabau sara ga a meca me lewai ko koya rawa kina ko Sisa, ia, me sa sereki.