¹ Ena gauna sa yaco yani kina ki vanua, ko Fesito ni oji e tolu a siga, sa lako mai Sisaria me lako cake ki Jeruisalemi. ² Era sa kauta mai ko ira na bete levu kei ira nai vakoulesilesi vei ira a Jiu, era kauta maj a odra lawa me lewai kina ko Paula, sara qou kerei Fesito vakamatua, ³ era kerei koi koya me valata vei ira a lomadra kini Paula. Me vakau ko koya mai ki Jerusalemi, kara sa valata oji tu a odrai lawaiki mera nei vakamatea ena wakolo. ⁴ Sa qai sauma ko Fesito, ni sa turi jiko vakavesu ko Paula mai Sisaria, ka koi koya vakai koi koya ena walega, yei sana lako kina. ⁵ Ia kevaka, e so vei ira, "e rawa," e kaya "me lako vata kei keitou. I keva e dua meca e cala vei koi koya dou qai veilewautakina." ⁶ Ia a jiko, i Fesito, e tawa sivia e walu se jin, a siga sa vakarota me kau mai vei koi ioya ko Paula. ⁷ Iani sa yaco yani, era sa tu voleka kina na Jiu kara kauta yani e so na veibilitaki vaka domobula kara tawa vaka gjinagjina takina rawa. ⁸ Sa qai kai koi koya ko Paula ka kaya, "Au tawa valata e dua ca meu cala kina ena odra lawa a Jiu. Se kina vale ni soro se kivei Sisa." ⁹ Ia ko Fesita e vinakata me vaka lomavinaka taki ira a Jiu sa qou tarogi Paula ka kaya, ko via lako cake ki Jeruisalemi me "Ko lewai kina vei au, me baleta a meca kai yei, ki yei?" ¹⁰ Kayai ko Paula, "Au sa tucake tu enai tutu veilewai i Sisa a vanua e dodonu meu lewai kina: Au tawa cala kina dua Jiu, me vaka ko sa kila vinaka. ¹¹ Kevaka kau valata e dua cala, se keu a valata e dua meca me onai sau a mate, au tawa soro ni mate. Ia ke segabau a meca era bilito-kini au kina, e na tawa rawa ni dua e soli au yani vei ira. Ia au sa solia vei Sisa me lewa!" ¹² Sa odi a veitalanoa i Fesito kei ira na mataveilewai, sa qai Sauma, "Ko sa solia vei Sisa Vei Sisa ko na lako kina!" ¹³ Kai sa oji e vica siga, sa yaco mai ko Akanpa-na-Tu kei Perinaise ki Sisaria ratou sa vakidavaki ke Fesito. ¹⁴ Ia sa siga vica a odra tou jikolako, sa qai talanoa takina ko Fesito kina Tui a kisi i Paula, ka kaya, "E dua mataqali tamata e biuta u mai yei ko Filikesa me kaivesu. ¹⁵ Guna au jiko kina mai Jeruisalemi, ko ira bete levu, kei ira qase vei ira Jiu era kauta mai a kisi ni tamatai yei vei au, era kerea e dua ai vaka gjinagjina me lewai kina ko koya. ¹⁶ Au qai sauma vei ira ni tawa onai valavala ena vanua ko Roma me soliani a lua me lewai bera mada ni veilewataki, ka me soli talega kina a gjigigjigi me vakamacalu takini koi koya ki vei ira dau veibeitaki. ¹⁷ Ia nira sa lako vata mai ki yei, au tawa wawatale, ena siga kadua au sa leu toka enai cewacewa ni veilewai kau kaya me kau mai ki loma ko koya. ¹⁸ Ni sa tucake ko koya ka beitaki, su sega meca era bilitakini koi koya kina kau sa taura rawa a malumalumu. ¹⁹ Ia sa dua mataqali veiba era sa valata kei koi koya ena odra lawa goi ka baleta talega a Jisu sei mate oji, ka kaya jiko ko Paula ni sa bula jiko. ²⁰ Au sa tawakila se me lewai vakaivei a meca kai yei, ia au sa qai kerei kei koya se rawa ni vakarawarawa me lako ki Jeruisalemi me lewai kina baleta na kisi. ²¹ Ia ni sa vakatulewa ga ko Paula me jesu jiko ga me warakina a vakatulewa i douinilewa, Au sa qai kaya me sa vesu jiko mada ga me yacova niu sa rawa ni vakauji koi koya vei Sisa? ²² A sa vosa ko Akaripa vei Fesito: "Au via rogoca talega a tamata kai yei." ²³ I ena siga ka dua, e rau a sa tokara mai a odrau i sulu vakaiukuuku ko Akaripa kei Perinaise, e rau sa lako mai kina vale ni veilewai kei ira na vakailesilesi ni mataivalu, kei ira a turaga ni karo. Sa qai taumai a lewa vei Fesito, sa qai ka mai vei ira tou ko Paula. ²⁴ Sa qai kaya ko Fesito, "Kemuni na Tui Akaripa, kei kemunu taucoka sara ka jiko rawa kei keiroui. Nu sa raica a tamata kai yei, ko ira taucoko a Jiu e kaya vei au mai Jeruisalemi i yei talega, era kaila vakina mai vei au ni ko koya e sa tawa dodonu me bula jiko. ²⁵ Au tawaboka e dua meca e valata me mate kina ia baleta ni sa kaya me lewai vei Akusito, kau sa vaka nananu meu vakauji koi koya ki Roma. ²⁶ Ia e segabau a meca au boka rawa meu vola vei kemunu a qou turaga. Ia a meca i yei, Au sa kauji koi kaya mai kina vei iko, ka vaka bibi ga vei kemu nu a Tui Akaripa, da ka na na beui so tale a meca au vola me baleta a kisi. ²⁷ Ju e vaka e segabau a betena vei au me vakau e dua a kai vesu ka tawa dua tu ai vola ni jikojiko baleji koi koya.