¹ Samantaro koo, waktu ado ribuan urokng bakumpul lalh ne' ido' batinyak-tinyak, Yesus mulai' bakato ka para murid labih doho', " Baati-atilah ka ragi urokng-urokng Farisi, nang kok kapuro'-puro'otn. ² Sabab, samuo nang tatutup pasti dibuko' lalu samuo nang ino' gari' pasti dipuokotn. ³ Karamo koo, dameo sajo nang kau katootn kadoopm galap pasti tadangar kadoopm tarokng lalu nang kau misikotn kadoopm biik pasti dibaritootn ka atas atap-atap rumoh. GAI' KA ALLAH ⁴ Aku bakato ka kau, he ayukng-ayukng-Ku, amelah gai' ka ne'ido' nang dapat munuh tubuh, tapi dah ako' koo ino' dapat ngameo-ngameo agi'. ⁵ Tapi, Aku pasti ngingati' kau tantang sape nang arus kau gai'otn; gai'lah ka Io, nang nang ako' munuh, bakuaso ugo' nabakotn kau ka doopm narako. Au, Iolah nang arus kau gai'otn. ⁶ Buke'ge' 5 eko' burukng pipit dijuo kare 2 kapikng ragae? Tapi, ino' seko'pun burukng- burukng koo nang dingaupaatni' kaadapotn Allah. ⁷ Malah, jumbaloh buuk ka kapalangu pun dapat di itung. Ame gai', kau jauh labih barago daripado samanyak burukng pipit." PARINGATAN KA NANG MASANGKOOTN YESUS ⁸ "Aku bakato ka kau, satiap urokng nang ngakoi' Aku kaadapotn urokng lain, pasti Anak Manusio akoi' ugo' kaadapotn malaekat-malaekat Allah. ⁹ Tapi, urokng nang masangkootn Aku kaadapotn urokng lain pasti dipasangkootn ugo' kaadapotn malaekat-malaekat Allah. ¹⁰ Lalu sape pun nang bakato sipate nang malawan Anak Manusio biso diampuni', tapi sape pun nang nyumpoh Roh Kudus pasti ino' diampuni'. ¹¹ Waktu ne'ido' nabanan kau ka sinagoge ba kaadapotn paro pamimpin ba panguaso, ame gai' tantang jamae kau mambeli diri' ngu ato dameo nang arus kau katootn, ¹² sabab pado koo ugo' Roh Kudus pasti ngajari' kau tantang dameo nang arus kau katootn." PARUMPAMAAN TANTANG SEKO' UROKNG KAYO ¹³ Seko urokng ka antaro urokng manyak koo bakato ka Yesus, "Guru, suruhlah kamaru'ku supayo babagi warisan ba aku." ¹⁴ Tapi, Yesus bakato ka io, "Kamaru', saoe nang ngangkat Aku jadi hakim ato pangantaro ngu?" ¹⁵ Ako' koo, Yesus bakato ka ne'ido', "Bajago- jagolah lalu waspadolah kasamuo kasamuo model kasarakohotn karamo idup urokng ini' bagantukng ka sangape manyak hartae." ¹⁶ Lalu, Yesus bacurito sabuoh parumpamaan ka ne'ido', "Ado tanoh nu' urokng paling kayo nang ngaselotn manyak sidi asele. ¹⁷ Jadi, urokng koo bapikir doopm atie, 'Ameo nang mao' ku amuat karamo aku dah ino' agi' batampat nohatnio' asel nyianku ?' ¹⁸ Lalu, io bakato, 'Nyianlah nang mao' ku amuat. Aku mao mungkari' kusong-kusongku lalu ngamuat nang labih kayo'. Di koo, aku nohatnio' samuo gandum ba barang-barangku. ¹⁹ Lalu, aku bakato ka sumangatku, 'He sumangatku, kau manyak barang nang di nohatni' sa' batahutn-tahutn; barantilah, makotn, nyocok, lalu, ba sanang-sananglah!' ²⁰ Tapi, Allah bakato ka urokng-urokng koo, 'He, urokng bodo! maam nyian ugo' sumangatngu pasti diicokng. Lalu, sape ge' nang ngampuio' barang-barang nang kau nyimpan koo?' ²¹ Jakoolah nang pasti tajadi ka urokng nang nohatni' harta sa' diri'e sorokng, tapi ino'lah kayo kaadapotn Allah." AME GAI' ²² Yesus bakato ka murid-murid-E, "Sabab koo, Aku bakato ka kau, ame gaduh tanang idup ngu, tantang dameo nang mao' kau makotn. Atopun, gaduh tantang tubuhngu dameo nang mao' kau pake. ²³ Sabab, idup labih panting daripado makanan lalu tubuh labih panting dari pado pakean. ²⁴ Tananglah burukng-burukng gagak. Ne'ido' ino ngamur atopun bahanyi, ne'ido' ugo' ino' ba gudang atopun kusong, tapi Allah mare' ne'ido' makotn. Kau jauh labih barago daripado burukng-burukng koo, ²⁵ Sape ge di antarkngu nang nang karamo gaduh biso namboh sahasta sajo ka umur idupe? ²⁶ Kalo kau ino' dapat ngarajaan hal-hal nang kenek nyian, ngameo kau ngaduhotn hal-hal nang lain? ²⁷ Paratiotnlah bungo bakokng, jamae ne'ido' koo idup. Bungo-bungo koo ino' bakarajo karas, atopun mamintal, tapi Aku ngatootn ka kau, malah Salomo doopm kamuliaane pun ino' bapakean sagagas saloh sete' angayo bungo-bungo koo. ²⁸ Kalo Allah ngiasi' rumput ka umo, bang ari nyian idup lalu ampagi di buokng ka doopm api, ino' ge Io pasti ngiasi' kau labih daripado rumput koo? He, kau nang kurang picayo! ²⁹ Jadi, amelah kau ngago' dalmeo nang mao kau makotn atopun nang mao kau cocok, lalu amelah naraso gai'. ³⁰ Sabab, bangso-bangso ka dunio ngago nang kok samuo, tapi Bapo ngu nahui' bahawo kau paralu nang koo. ³¹ Sabalike, gago'lah doho' karajaan Allah, jadi samuae nyian ugo' ditamohotn ka kau." KUMPULOTN HARTA KA SARUGO ³² "Ame gai', he kumpulan kenek, karamo Bapo' ngu mao' mare'ot ka kau Karajaan koo. ³³ Juolah samuo nang ado ka kau lalu bare'lah sadakoh. Kau amuatlah saepang duit nang bai' rusak, iyokoo harta ka sarugo nang bai' angit, nang ino' dapat diicokng pangait atopun dirusak panyanget. ³⁴ Sabab, dimae tampat harta ngu diopm, dikoo ugo' atingu diopm."AMBO NANG PALING NGAREBET NGARAJAAN TUGASE ³⁵ "Mao'e pingakngu tatap barikat lalu pulito-pulitangu tatap nyalo. ³⁶ Jadilah angayo urokng-urokng nang nganti'otn tuane puokng ampat ka pesto panganten supayo ne'ido' biso ganceh mukootn io pintu, pas tuan koo puok lalu nodok pintu. ³⁷ Dibarakati'lah ambo-ambo, nang dinapati' tuane basiap sadio,pas io atokng. Aku ngatootn kakau, sasungguhe, io pasti ngikat pingaknge sa' ngalayani' ba nyuruhotn palayan-palayane duduk makotn. Io pasti atokng lalu ngalayani' ne'ido'. ³⁸ Kalo' tuan koo atokng pas tangoh maam atopun daniari lalu napati' ne'ido' tangoh balaku jakoo, dibarakati'lah ne'ido'! ³⁹ Tapi, tahui'lah, kalo' seko' urokng ampu' rumoh nahui' jam sangape pangait pasti ngatakngi' rumahe, pasti io ino' miarotno' rumahe dibobok. ⁴⁰ Karamo koo, kau ugo' arus salalu basiap sadio karamo Anak Manusio pasti atokng pado waktu nang ino' disangko-sangko," ⁴¹ Ako'koo, Petrus batanyo' ka Io, "Tuhan, kahe ka kami ge Kau nyuritootn parumpamaan nyian atopun ka samuo urokng ugo'?" ⁴² Tuhan nyahuti', "Sape ge kapalo palayan nang paling ngarebet ba bijaksano nang dipicayai' tuane sa' ngawasi' paro ambo nang laine, sa' mare' ne'ido' makotn pado waktu nang tapat? ⁴³ Dibarakati'lah ambo koo, nang waktu tuane atokng, napati io tangoh ngarajaan tugase. ⁴⁴ Aku bakato ka kau, sasungguhe, tuan koo pasti milih io sa' ngawasi' samuo barange. ⁴⁵ Tapi, kalo' ambae koo bakato doopm atie, 'Tuanku pasti ino' atokng,' lalu mangkongi' ambk angaki ba ambo ambini laine, ako'koo makotn ba nyocok sampe kamabuk, pas tuane atokng ⁴⁶ pado waktu nang ino' disangko-sangko lalu ino' ditahui' ambo koo, sang tuan pasti munuh ambo koo lalu muangan io sabayo- bayo ba urokng nang ino'.ngarebet ka io. ⁴⁷ Seko'urokng ambo nang nahui' kamao'an tuane, tapj ini' basiap sadio atopun ngarajaan dameo nang sasuai ba kamao'an tuane pasti namu manyak pukulan. ⁴⁸ Tapi, ambo nang ino' nahui' dameo nang dimao'an tuane lalu ngarajaan hal-hal nang pantas namu pukulan, io pasti namuan pukulan nang labih sadikit. Satiap urokng nang di bare' manyak,ditutut manyak. Lalu, ne'ido' nang dipicayai' labih manyak pasti dituntut labih manyak agi'. YESUS NGAMUAT PAMISOHOTN ⁴⁹ Aku atokng nabakatno' api kadunio, lalu, Aku ba arap api koo udah nyalo! ⁵⁰ Tapi,ado parmandi'an nang arus Aku jaatni', lalu Aku maraso paling tatakan sampe hal koo diganapi'. ⁵¹ Kau nyangko' bahawo Aku atokng nabanano' padamaiotn kaatas dunio nyian ge? Ino, Aku bakato kakau, malainkan papacohotn! ⁵² Mulai' kanio', limo urokng doopm sege' rumoh tango' pasti dipisohotn. Talu urokng pasti malawan duo urokng lalu duo urokng pasti malawan talu urokng. ⁵³ Ne'ido' pasti dipisohotn; Bapo' pasti malawan anake angaki, lalu anak angaki pasti malawan bapo'e. Inu' pasti malawan anake ambini, lalu anak ambini malawan inu'e. Datu' paati malawan minantue ambini, lalu minantu ambini pasti malawan datu'e ambini." NGARATIOTN JAMAN ⁵⁴ Lalu, Yesus bakato ka urokng rami, "Waktu kau nanang apuk bakomo' ka sabaloh barat, kau pasti bakato, 'Pasti ari mao ujotn,' lalu ari ujotn ihan. ⁵⁵ Waktu kau ngaraso angin nyiup ampat ka salatan, kau bakato, 'Ari nyian pasti darokng,' lalu ari darokng ihan. ⁵⁶ Kau urokng munafik! kau biso ngaratiotn rupo angit ba dunio, tapi dameo kau ino' biso ngaratiotn jaman nyian?" ⁵⁷ Dameo kau sandiri' ino' biso mutusotn dameo nang banar? ⁵⁸ Waktu kau ampus barage musuhngu ngadapo' pamarentoh, barusahalah ngako'otn masalahngu ba io doopm pajaanan supayo io ino' narik kau ka hakim lalu hakim pasti nyarohotn kau ka pangawal, lalu pangawal koo paati nabakotn kau kadoopm pinjaro. ⁵⁹ Aku bakato kakau, kau pasti ino' kauar ampat ka kana'un sanape' kau mayar utakng ngu sampe peser nang pangabisan."