¹ PANGAJARAN TANTANG DO'A Pado ari koo, Yesus bado'a kasege tampat. Pas Io ako' bado'a, seko' urokng murid-murid-E bakato ka Io, "Tuhan, ajari'lah kami bado'a sabayo angayo Yohanes ngajari' murid-murid-e ² Ako'koo, Yesus bakato ka ne' ido', "Waktu kau bado'a, bado'alah angayo nyian: 'Bapo', dikudusotnlah dama-Ngu. Atoknglah karajaan-Ngu. ³ Bare'otnlah ka kami makanan nang sacukupe satiap ari, ⁴ lalu ampuni'lah doso-doso kami sabab kamisandiri ugo' ngampuni' satiap urokbg nang basaloh ka kami. Lalu, amelah nabanan kami kadoopm pancobaan."' MINTO'LAH, GAGO'LAH, LALU DODOKLAH ⁵ Ako'koo, Yesus bakato ka ne'ido', "Misalelah seko' ampat ka kito' koo ado barayukng lalu kau ampus ka rumoh ayukngu koo pado tangoh maam lalu bakato ka io, 'Yukng, pinyapmi' aku tau ete' roti, ⁶ karamo ado seko' ayukngku nang bajootn singoh ka rumahku, tapi aku ino' ba dameo-dameo ka rumahku sa' ku bare'atno' ka io." ⁷ Mungkin ge' ayukng ngu nang kadoopm rumoh koo nyahut, 'Ame ngaco aku! Pintu dah takunci agi' aku ba anak-anak kudah katampat tidur. Aku ino' biso umpat mare'o dameopun ka kau.' ⁸ Aku bakato ka kau bahawo biarpun ayukngu koo ino' umpat mare' kau karamo kau ayuknge, tapi karamo kau tarus minto', io pasti umpat lalu mare' dameo nang kau minto'. ⁹ Jadi, Aku bakato ka kau minto'lah kau pasti narimo'. Gago'lah, kau pasti namu. Dodoklah, pintu pasti di bukootn . ¹⁰ Sabab sape pun nang minto' pasti narimo'. Sape pun nang bagago' pasti io namu. Lalu sape pun nang nodok pintu, pintu pasti dibukootn. ¹¹ Ado ge' seko' bapo' ka antara ngu mare'ot uar ka anake kalo' io minto ikotn? ¹² Ato mare' kalo, kali io minto' taor? Kalo' kau nang jahat nahui' ¹³ jamae mare' pamare'otn nang baik ka kamudo'-kamudo' ngu, dameo agi' Bapo' ngu nang ka sarugo.pasti Io mare'otn Roh Kudus ka urokng-urokng nang minto' ka Io." YESUS MAKE KUASO ALLAH ¹⁴ Pado ari koo, Yesus ngoser setan ampat ka seko' kamudo' angaki nang awo'. Ako' setan koo kauar, urukng nang taie awo' koo biso bakato lalu urokng manyak nang heran. ¹⁵ Tapi' ado sangape urokng bakato, "Io ngoser setan pake' kuaso Beelzebul, pamimpin setan." ¹⁶ Sangape urokng nang laine mao ngujio' Yesus, ne'ido' minto' Io magari'otn tando ampat ka sarugo. ¹⁷ Tapi, Yesus nahui' dameo nang ne'ido' mikirotn lalu bakato ka ne'ido', "Satiap karajaan nang tapacoh-pacoh lalu basarang-sarang pasti ancur. Lalu, kaluarga nang urokng-uroknge bamusuhotn pasti tacarai-barai. ¹⁸ Jadi, kalo' ibilis ugo' tapacoh-pacoh lalu malawan diri'e sorokng, jamae biso karajaane tatap batahan? Aku bakato jaiyotn karamo kau ngatootn bahawo Aku make kuoso Beelzebul sa' ngoser' setan-setan. ¹⁹ Kalo' Aku ngoser setan-setan ba Beelzebul,ba kuaso sape nang anak-anakngu ngoser ne'ido'? Karamo koo, ne'ido'lah nang pasti jadi hakimngu. ²⁰ Tapi, kalo' Aku make kuaso Allah sa' ngoser setan, Karajaan Allah dah atokng ka kau. ²¹ Kalo' seko' urokng nang koat basinjato langkap nyago istanae sandiri, harto bandae pasti doopm kaadaan aman. ²² Tapi, kalo' ado urokng nang labih koat dari io mao nyarango' lalu ngalohotn io, makae urokng nang labih koat koo arus ngarampas sinjato-sinjato nang urokng koo ngandalotn, lalu magiotn harto rampasane. ²³ Sape pun nang ino' ado ka pihak-Ku, io malawan Aku. Lalu sape pun nang ino' ngumpulotn barage Aku, io mancare-bareotn." MUOK-E ROH NAJIS ²⁴ Kalo' roh najis kauar ampat ka tubuh urokng, roh koo pasti ba kuliling ngaintas ka tampat-tampat nang karikng, sa'e tampato' ba diopm, tapi io ino' namu. Karamo koo, io bakato, 'Aku pasti atokng ka rumoh nang dah ku ningootn." ²⁵ Waktu io atokng agi, io namuan rumoh koo dah ako 'dinyapui' barasih dah taatur. ²⁶ Ako'koo, roh najis koo ampus mabo tujuh roh nang labih jahat dari io mao taamo' diopm ka ka rumoh koo lalu kaadaan urokng koo jauh labih buruk daripado sanape'e." UROKNG-UROKNG NANG BAREPO ²⁷ Waktu Yesus ngatootn nyian, seko' ambini nang ado katangoh-tangoh urokng rami bakampakotn, "Dibarakatilah paranakotn nang dah maranakotn Kau ba buoh dado nang dah nyusui' Kau ." ²⁸ Tapi Yesus bakato, "Barepolah urokng-urokng nang nangarotn firman Allah lalu naati' io." TANDO YUNUS ²⁹ Waktu urokng-urokng nang bakumpul samangkin manyak, Yesus bakato, "Pangkat nang nyian ihanlah pangkat nang jahat; ne'ido' nuntut sabuoh tando, tapi ini' ino' sabuoh tando pun nang muok ka ne' ido' salain tando Yunus. ³⁰ Angayo Yunus nang jaji tando ka urokng-urokng Niniwe, jakoolah Anak Manusio pasti jaji tando pangkat nyian. ³¹ Pado ari kiamat, Ratu ampat ka salatan pasti bangkit barage urokng-urokng ampat ka pangkat nyian lalu io pasti ngukum ne'ido' karamo io atokng ampat ka ujukng dunio mao' nangaratno' hikmat Salomo, sadangkan disio ado seko' urokng nang labih ayo' daripado Salomo. ³² Pado ari kiamat, urokng-urokng Niniwe pasti bangkit barage pangkat nyian lalu ngukum io, karamo urokng-urokng Niniwe batobat waktu Yesus bakhotbah ka adapotn ne'ido', sadangkan disio ado seko' urokng nang labih ayo' daripado Yunus." MATO KOO PULITO TUBUH ³³ "Ino' seko' urokng pun nang dah ako' nyalootn pulito, lalu nyosokotn pulito koo ato dipuangan kababoh gantang. Sabalike, ne'ido' muangan pulito koo kapoho pulito lalu urokng-urokng nang taamo' biso nanang cahayoe. ³⁴ Mato koo pulito tubuhngu. kalo marangu baik, saluruh tubuhngu pasti dipanuhi' tarokng. Tapi, kalo matangu jahat, saluruh tubuhngu pasti dipanuhi' kakakapotn. ³⁵ Karamo koo, ati-atilah supayo tarokng kadoopm diri'ngu ini' manjaji galap. ³⁶ Kalo tubuhngu dipanuhi' ba tarokng lalu ino' ado bagiane nang galap, tubuhngu koo pasti tarokng saluruhe sabayo angayo wakti sabuoh pulito narakngi' kau ba cahayoe." YESUS NAGUR UROKNG FARUSI BA AHLI TAURAT ³⁷ Ako' yesus bakato, seko' urokng Farisi ngundang Io makotn. Io pun atokng, lalu duduk makotn. ³⁸ Tapi, urokng Farisi koo heran waktu nanang Yesus ino' nyasoh kokot-E doho' sanape' makotn. ³⁹ Tapi, Tuhan bakato ka io, "Urokng- urokng Farisi angayo kau kahe marasihotn uas cangker ba pingitn, tapi ka doopm diri'ngu baisi' ba kasarakohotn ngan ka jahatotn. ⁴⁰ He urokng-urokng bodo! Buke' ge Io nang ngamuat bagiotn uas ba bagiotn doopm? ⁴¹ Karamo koo, dibagiatni'lah dameo nang ado kadoopm ngu koo jadi sadakoh ngu. Kalo jakoo kau pasti banar-banar barsih. ⁴² Tapi cilakolah kau, urokng-urokng Farisi! Sabab, kau mare' pasapuluhotn ampat ka asil salasih, inggu, ba sagalo macam tanaman kabon ngu, tapi ino' paduli ngan kadilotn ba kasih Allah. Saharuse, kau ngarajaan samuo hal koo arus paduli ba hal-hal nang lain ⁴³ Cilakolah kau, urokng-urokng Farisi karamo kau suko duduk ka tampat nang paling baik ka sinagoge lalu ugo' suko narimo' tabe' ka pasar. ⁴⁴ Cilakolah kau karamo kau angayo patunuan nang ino' batando, nang urokng ninyak-ninyak ino' ne'ido' tahui'." ⁴⁵ Ako' koo, saloh seko' urokng ahli Taurat bakato ka Yesus, "Guru, waktu kau ngatootn hal-hal nyian,Kau ngolo'an kami ugo'." ⁴⁶ Tapi, Yesus nyahuti' "Cilakolah kau, he ahli-ahli Taurat! Sabab, kau muangan baban nang barat dipikuto' urokng lain, tapi diri' sandiri' bai' nyameho' baban koo ba sege' jaringu pun. ⁴⁷ Cilakolah kau karamongamuat patunuan sa' nabi-nabi nang nenek moyang ngau munuh. ⁴⁸ Malah kau bakato ka samuo urokng bahawo kau ngako' ka parambuatan nenek muyang ngu; ne'ido'lah nang munuhi' nabi-nabi koo, tapi, kau nang ngamuat patunuane. ⁴⁹ Nyianlah sababe, Allah doopm hikmat-E bakato, 'Aku pasti ngirim nabi-nabi ba rasul-rasul ka ne' ido', tapi sangape urokng nang Kungutus koo pasti dibunuh ba disikso,' ⁵⁰ supayo daroh samuo nabi, nang tatumpoh sajo' dunio nyian dinyiptootn, biso dituntut ampat ka pangkat nyian, ⁵¹ mulai' ka daroh Habel sampe ka daroh Zakharia,nang di munuh ka antaro altar ba Bait Allah. Au', Aku bakato ka kau bahawo pangkat nyian pasti batanggong jawab kapado hal nyian. ⁵² Cilakolah kau, he ahli-ahli Taurat! Sabab kau dah ngicokng kunci pangatahuan, tapi kau sandiri' bai' taamo' lalu maintakngi' urokng lain mao' taamo'." ⁵³ Ako' Yesus ningootn tampat koo, ahlu-ahli Taurat ba urokng-urokng Farisi mulai' musuhi' Io lalu makso Io ba macam-macam patanyaan. ⁵⁴ Ne'ido' bakompolot/ bapakat nangkapo' Yesus ba kato nang Io ngatootn.